Ol Provep 7

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

¹Go naaki neme nina agaa waru pago ratua nena kone-para mea saape.

²Nina agaa pagoa ratali rabu ne oroyalo epe-rupa mada piruali. Nina agaa-re nena ini surube-rupa waru surubape.

³Nina agaa nena kone-para oroyalo waru inaloa aape. Oroyalo kiaalo nena-ki madaa mapiraae-rupa mada pirinalape.

⁴Epe kone-para epe makuae yae lapo rata nena kone-para inaloa aape. Gore nena baani-para epe aa yago raapu aatede-rupa mada aape.

⁵Aa medana ore-me ne ogeyoa nipu raapu paake napana tea raburi epe kone ne raapu oro yalo piralia-pulu ne goa mada napali. Goa pea-pulu neme go onana agaa mada gimali.

⁶Yapi medame nina ada-para pirua widua-para ini penaato pare no pora-nini ogegeaanu pamuaeme. Gore nimu epe kone page makuae yae page yada ora na-i madaa pama pamuaeme. Goa peme pare aa padane-ma nipu ora maeyaaya.

⁸Ogegeaa nipuri ona ora wae piri medana ada pera-pera pamea.

⁹Gore naare pabola penaloa ribaa yolalo popea.

¹⁰Mo ona nipuri pora pami onanumi pemede-rupa pepena pua nipumi mo ogege aame adena kone ia. Goa pua mo-aa puaa mada lamu mea.

¹¹Go onare nipu ora wae pupitagi ne ona yalo nipuna ada-para page epe-rupa napia.

¹²Oro yalo nipu makete-nini page pora-nini pamualaina pua nipuna ada-para page epe-rupa napia. Aa agu asapala pirina pea.

¹³Neme adesu pare go ogege aa i rulu ripinaawa nipumi nunu lalaina adesu. Goa pua mo oname nipuna ini agaa-para adabaa sua goa sa.

¹⁴Abiare nina ada-para agu raapo pirua opa kalape yaere meda iya-daa sa.

¹⁵Goaene nina ada gimoa ne asapula epawa. Goa pawa-pulu abia ne go epa adalo-da.

¹⁶Goa pua ne patape yapara page aba rabolo saayo. Go yapara rabolo saayo pare nena adipu patape yakopi laplap page epe pepena pubae saayo. Go epe u-patape yaenuri mo Isipi supara mea-epe yaenu saayo.

¹⁷Neme go nena u-patape epe bet madaare paura epe kaapi yae luabu koyoa saayo.

¹⁸Goa pea-ga abiare saana bana. Goa puare raapa palaawa rabialo tu patua yapi malaapana. Goa pua raana adaape meapana.

¹⁹Ninaa aaniri pala naomape. Nipu su adaalu meda-para naepope-rupa pisa.

²⁰Gore akoloya nipumi mone ora adaapupe mea pisa-pulu sarara laapo popenaloa orope epalia. Goa pua abia go akua epola pola raapu raapu-para epalia.

²¹Go oname epe rede pi agaa luabu loa mo ogege aa nipuna lo-robaa ora waru marekaaya.

²²Mo aa nipumi mo omeme agaa pagoa mo onana ada-para ratamea pea. Gore mo mena gawa ti ada-para mea pemede-rupa mada mea pea. Go page maeyae aa opeada patinalo mea pemede-rupa mada mea pea.

²³Go aa nipuri koyati pua sua nipu aawalia kone na-i. Pa yaa-madaa biya pua mo poga madaa puaa roayade-rupa mada pea. Gore yaa nipu poga sabae-para roalua kone na-i. Pa biyaa pea-rupa mada pea.

²⁴Go naaki nina agaa madaa-re aane waru lobapa-inaloa waru pagalepape.

²⁵Nimimi go piaene ona rata mea popere nimina lo-robaa ora aipapulu narekena tapape. Goa pua nipuna kone gimape.

²⁶Gore akolo ya? Aa adaapu go onana kone ratua luabu taala-pupa yabeme.

²⁷Go ona nipuna ada-para pope porare, aa tapa-para pemede pora-rupa ia. Go yapare nimi go pora ratalimiri nimi aipapulu aba omeme onaanuna su-para palimi.