1Andro ešebno (peršo) džives andro eftato čhon pes savore manuša jekhetane zgele angle Paňeskeri Brana a phende le zakoňikoske Ezdrašoske, savo sas the o rašaj, hoj te anel o zakonoskero zvitkos, so o RAJ diňa le Izraelitenge prekal o Mojžiš. Avke o Ezdraš anďa o zakonos anglo manuša, save sas zgele: anglo murša, džuvľa the angle savore, save šaj achaľile oleske, so šunenas.
3Tosarastar dži ko dilos angle Paňeskeri Brana genelas andral o zakonos le džuvľenge, muršenge the savorenge, save šaj oleske achaľonas. A savore manuša mištes šunenas, so andral genelas.
4O zakoňikos Ezdraš ačhelas pro kaštuno javiskos, so sas prekal oda kerdo. Paš leskeri čači (pravo) sera ačhelas o Mattitiah, o Šema, o Ananiah, o Urijah, o Chilkijah the o Maasejah. Pal leskeri baľogňi (ľavo) sera ačhelas o Pedajah, o Mišael, o Malkijah, o Chašum, o Chašbaddanah, o Zecharijah the o Mešullam.
5Sar o Ezdraš phundraďa o zakonoskero zvitkos, savore manuša les dikhle, bo ov sas pro učeder than. Akor savore manuša ušťile upre.
6O Ezdraš lašarelas le RAJES, le bare Devles, a savore manuša hazdle upre o vasta a phende: “Amen! Amen!” A banďonas anglo RAJ le mujeha dži ke phuv.
7O Leviti – o Ješua, o Bani, o Šerebiah, o Jamin, o Akkub, o Šabbetaj, o Hodijah, o Maasejah, o Kelita, o Azariah, o Jozabad, o Chanan the o Palajah – pomožinenas le manušenge te achaľol o zakonos, medik ode ačhenas.
8On genenas andral le Devleskero zakonos a mištes prethovenas le manušenge, hoj te achaľon oda, so sas lenge pregendo.
9Sar o manuša šunde, so o zakonos vakerel, chudle te rovel. Akor o guverneris Nehemiaš, o Ezdraš, savo sas zakoňikos the rašaj, the o Leviti, save sikavenas le manušen, phende lenge: “Kada džives hino sentňardo le RAJESKE, tumare Devleske. Vašoda ma aven smutne a ma roven!
10Džan khere, chan o lačhipen, pijen e nevi mol a den the olen, kas nane ňič, bo kada džives hino sentňardo amare RAJESKE. Ma aven smutne, bo o radišagos le RAJESKERO hin tumari zor.”
11The o Leviti len prevakerenas le lavenca: “Kada džives hino sentno. Vašoda aven andro smirom a ma aven smutne!”
12Paľis savore manuša gele khere te chal a te pijel, bičhavenas peske o chabena a oslavinenas bare radišagoha, bo achaľile o lava, so sas lenge pregendo.
13Pre dujto džives pes zgele savore fajtakere vodci, o rašaja the o Leviti paš o zakoňikos Ezdraš, hoj len te sikavel o zakonos.
14Andro zakonos, so o RAJ prikazinďa prekal o Mojžiš, arakhle pisimen, hoj o Izraeliti mušinen te bešel andro stani, sar oslavinen andro eftato čhon o Inepos le Stankengero.
15Phende, hoj mušinen te rozvakerel všadzik andre savore fori the andro Jeruzalem: “Džan pro brehi a anen o prajti pal o olivi the pal o dzive olivi, mirti, palmi the pal aver stromi, hoj lendar te keren o stani, avke sar hin pisimen andro zakonos.”
16Paľis savore manuša gele, ande o prajti a kerde peske o stani pre peskere strechi the dvori, pre dvora anglo Chramos a pro phundrade thana angle Paňakeri the Efrajimiko Brana.
17Avke savore manuša, save avle pale andral o Babilon, peske kerde o stani a bešenas andre. Se o Izraeliti oda na kerenas akorestar, sar len ľidžalas o Jozua, le Nunoskero čhavo, dži adadžives. A sas len igen baro radišagos.
18Sako džives, le ešebne (perše) dživesestar dži ko posledno džives, genenas le Devleskero zakonos andral o zvitkos. Efta dživesa oslavinenas o inepos a pro ochtoto džives, savore pes jekhetane zdžanas, avke sar sas pisimen andro zakonos.
