1Vaš kada savoro, so pes ačhiľa, amen keras a pisinas e zmluva. Amare vodci, o Leviti the o rašaja la zapečaťinas.
2E zmluva zapečaťinde o Nehemiaš, o čhavo le Chachaljoskero the o Cidkijah.
3O Serajah, o Azariah, o Jeremiah,
4o Pašchur, o Amariah, o Malkijah,
5o Chattuš, o Šebaniah, o Malluch,
6o Charim, o Meremot, o Obadiah,
7o Daniel, o Ginneton, o Baruch,
8o Mešullam, o Abijah, o Mijamin,
9o Maaziah, o Bilgaj the o Šemajah.
10O Ješua, le Azanijoskero čhavo, o Binnuj, le Chenadadoskere čhavendar, o Kadmiel
11the leskere phrala: o Šebaniah, o Hodijah, o Kelita, o Palajah, o Chanan,
12o Michas, o Rechob, o Chašabiah,
13o Zachur, o Šerebiah, o Šebaniah,
14o Hodijah, o Bani the o Beninu.
15O Paroš, o Pachat-Moab, o Elam, o Zattu, o Bani,
16o Bunni, o Azgad, o Bebaj,
17o Adonijah, o Bigvaj, o Adin,
18o Ater, o Chizkija, o Azzur,
19o Hodijah, o Chašum, o Becaj,
20o Charif, o Anatot, o Nebaj,
21o Magpiaš, o Mešullam, o Chezir,
22o Mešezabel, o Cadok, o Jadduas,
23o Palatiah, o Chanan, o Anajah,
24o Hošeah, o Chananijah, o Chaššub,
25o Hallocheš, o Pilcha, o Šobek,
26o Rechum, o Chašabnah, o Maasejah,
27o Achijah, o Chanan, o Anan,
28o Malluch, o Charim the o Baanah.
29Aver manuša, o rašaja, o Leviti, ola, save giľaven the stražinen, o služobňika andro Chramos the savore, save pes odďelinde avre narodendar, hoj te doľikeren le Devleskero zakonos, the lengere romňija a čhave, save imar oleske achaľonas,
30pridine pes ke peskere vodci a ile pre peste vera, hoj ena prekošle, te na doľikerena le Devleskere zakoni, so diňa avri o Del prekal peskero služobňikos Mojžiš, a hoj doľikerena savore leskere prikazaňja.
31Avke phende: “Amare čhajen na daha avre narodenge romňenge a lengere čhajen na laha amare čhavenge.
32Te o manuša andral aver narodi anena vareso te bikenel andro Šabbatoskero džives abo andre aver inepos, či oda ela o ďiv, na cinaha lendar ňič. A sako eftato berš amen na laha le uľipnastar ňič a omukaha o love olenge, kas diňam kečeň.
33A mek ke oda dojekh amendar sako berš davkeraha rupune love štar grami pre služba andre amaro Devleskero Chramos
34pro sentne mare, pre chabeneskeri obeta, labarďi obeta, Šabbatoskeri the Neve Čhoneskeri obeta, pro inepi, pro sentne dari the pro obeti vaš o bini le Izraeloskere the pre savore službi andro Chramos.
35A amen – o rašaja, o Leviti the o manuša – prekal o losos kidaha avri, kana andro berš savi famelija anela o kašta pre labarďi obeta prekal o RAJ, amaro Del, avke sar hin pisimen andro zakonos.
36Davkeraha sako berš ešebne (perše) uľipnastar, so skidaha pal e maľa the pal ovocna stromi a daha andre le RAJESKERO Chramos.
37Mek ľidžaha amare ešebne čhaven andro Chramos le rašajenge a odďelinaha len le Devleske; a daha the amare gurumňen the bakren, save uľile ešebne, avke sar hin pisimen andro zakonos,
38the o ešebno le arestar the le uľipnastar pal savore stromi, o ešebno la moľatar the olejostar a ľidžaha oda andro Chramos le rašajenge prekal amaro Del. A le Levitenge daha o dešto kotor le uľipnastar, bo on oda kidena avri andral savore amare gava.
39Jekh rašaj andral e fajta le Aronoskeri mušinel te el paš oda, sar o Leviti kidena avri o dešto kotor a paľis on olestar mušinen te anel o dešto kotor andro chramoskere skladi.
40O Izraeliti the o Leviti mušinen te anel o dari le ďivostar, la moľatar the le olejostar, andre ola skladi, kaj hine o sentne veci a kaj bešenas o rašaja, o stražňika the ola, save giľaven. Daha savoro, so kampel prekal o kher amare Devleskero.”
