1Sar pes dodžanle o Sanballat, o Tobiaš, o Arabčanos Gešem the savore amare ňeprijaťeľa, hoj doprikerďom o muri a nane andre imar ňisave cheva, choc o vudara pro brani mek na thoďom,
2o Sanballat the o Gešem mange dine te phenel: “Av, zdžas pes andre varesavo gav pre rovina Ono.” Ale on mange oleha kamle te kerel vareso nalačho.
3Bičhaďom ke lende mire muršen, hoj lenge te phenen: “Hin man te kerel bari buči a našťi akana džav ke tumende. Soske te mukav e buči ča avke, hoj man tumenca te zdžav?”
4On mange oda dine te phenel štarval, ale me lenge odphenďom avke sar ešebnovar (peršovar).
5Paľis o Sanballat ke ma bičhaďa peskere muršes pandžtovar. Sas leste andro vast phundrado ľil
6a sas andre pisimen: “Maškar o narodi pes vakerel a the o Gešem ada phenel, hoj tu the o Židi kamen te kerel vzbura, a vašoda oprikeres o muri. A mek hin phendo, hoj kames te ačhel kraľis
7a hoj ačhaďal proroken, hoj te vakeren pal tu andro Jeruzalem: ‘Andre Judsko hin kraľis!’ Tu džanes, hoj o kraľis andre Perzija pes pal oda dodžanela! Vašoda av, zdžas pes a vakeraha pal oda.”
8Akor leske odphenďom: “Ňič olestar, so vakeres, nane čačipen. Korkoro tuke ada gondoľinďal avri.”
9On savore amen kamenas te daravel avri a phenenas peske: “Našavena e zor a na dokerena e buči.” Ale me man modľinavas: “Devla, de man zor!”
10Andre jekh džives geľom andro kher ko Šemajah, saveske sas dad o Delajah, a leske o Mehetabel. O Šemajah sas phandlo andre peskero kher a phenďa mange: “Av, zdžas pes andre le Devleskero Chramos te garuvel andro Sentno Than a phandaha o vudar, bo tire ňeprijaťeľa tut kamen te murdarel. A avena adadžives rači!”
11Ale me leske odphenďom: “Me na som ole dženendar, save denašen. Gondoľines tuke, hoj man džava te garuvel andro Chramos, hoj man te zachraňinav? Na, na džava!”
12Avľom pre oda, hoj les na bičhaďa ke ma o Del, ale ola lava mange phenďa, bo o Tobiaš the o Sanballat leske počinde, hoj oda te phenel.
13Bičhade les ke ma, hoj man te daravel avri, hoj man te garuvav andro Chramos a oleha te kerav binos. Paľis oda hiros pal ma rozľigendehas, hoj te meľaren miro lačho nav.
14Me man modľinavas: “Ó, Devla miro, leper tuke pre savoro nalačhipen, so kerde o Tobiaš the o Sanballat. Leper mek the pre prorokiňa Noadja a pre ola aver proroka, save man daravenas avri!”
15E buči pro muri ľikerelas penda the duj (52) džives a sas dokerďi andro bišupandžto (25.) džives andro čhon Elul.
16Sar pes savore amare ňeprijaťeľa pal oda došunde a sar oda dikhle o narodi, save bešenas pašal amende, daranas pes a sas pokorimen. Džanenas, hoj o Del amenge pomožinďa te dokerel e buči.
17Andre ola dživesa o Judske anglune manuša the o Tobiaš pisinenas but ľila a bičhavkerenas maškar peste.
18But manuša andre Judsko sas dothode la veraha le Tobiašoha, bo sas džamutro le Šechanioske, saveske sas dad o Arach. Le Tobiašoskero čhavo o Jochanan peske iľa romňa la čha le Mešullamoskera, saveske sas dad o Berechijah.
19O manuša angle mande vakerenas pal savoro lačhipen, so kerelas o Tobiaš, a paľis leske vakerenas savore mire lava. A dureder o Tobiaš mange bičhavkerelas o ľila, hoj man te daravel avri.
