Text copied!
CopyCompare
Le Devleskero Lav Andre Romaňi Čhib 2019 - Nehemiaš

Nehemiaš 3

Help us?
Click on verse(s) to share them!
1Avke o nekbareder rašaj o Eljašib the leskere pašutne rašaja kerenas e Bakrengeri Brana. On la oprikerde a thode upre o vudar. Ola branatar chudle te prikerel o muros dži paš e veža Mea a odarik dži ke veža Chananel.
2Paš leste prikerenas o murša andral o Jericho a nadur lendar o Zachur, le Imrioskero čhavo.
3E Ribno Brana prikerenas le Senaoskeri fajta. Zoraľarde la le kaštenca pal o seri the pro maškar a thode upre o čopi, o vudar the zavori.
4Paš lende prikerelas le Urijoskero čhavo o Meremot, saveske sas papus o Hakkoc. Paš leste prikerelas o Mešullam le Berechijoskero čhavo, saveske sas papus o Mešezabel. Paš leste prikerelas o Cadok le Baanoskero čhavo.
5Paš leste prikerenas o murša andral e Tekoa, ale o anglune manuša andral oda foros na kamenas te kerel prekal peskero Raj e buči.
6E Puraňi Brana prikerenas o Jojada, le Paseachoskero čhavo, the o Mešullam, le Besodejoskero čhavo. Zoraľarde la le kaštenca pal o seri the pro maškar a thode upre o vudara the trastune zavori.
7Paš lende prikerelas o Melatiah andral o Gibeon, o Jadon andral o Meronot the o murša andral o Gibeon the Micpa dži paš o kher le guverneriskero upral e provincija o Zapadno Eufrat.
8Paš lende prikerelas o muri Uzziel, le Charchajoskero čhavo, savo kerelas veci le somnakastar. Paš leste prikerelas o muri o Chananijah, savo kerelas o voňava masci. On zoraľarde o Jeruzalemoskere muri dži ko Buchlo Muros.
9Paš lende prikerelas Refajah, le Churoskero čhavo, savo ľidžalas jepaš Jeruzalem.
10Paš leste, angle peskero kher, prikerelas o Jedajah, le Charumafoskero čhavo. Paš leste prikerelas o Chattuš, le Chašabnejoskero čhavo.
11O Malkijah, le Charimoskero čhavo, the o Chaššub, le Pachat-Moaboskero čhavo, prikerenas o aver kotor le muroskero the e Bovengeri Veža.
12Paš lende prikerelas o Šallum, le Hallochešoskero čhavo, peskere čhajenca. Ov sas vodcas upral jepaš le Jeruzalemoskero.
13E Dolinakeri Brana prikerenas o Chanun the o manuša andral o foros Zanoach. On la ačhade upre a thode o vudara the o trastune zavori pal o seri the pro maškar. Prikerde mek štar šel the saranda (440) metri muros dži ke Šmecengeri Brana.
14E Šmecengeri Brana prikerelas o Malkijah, le Rechaboskero čhavo. Ov sas vodcas andro Bet-Kerem. Ov la ačhaďa a thoďa upre o čopi, o vudar the o zavori.
15E Prameňiskeri Brana prikerelas o Šallun, le Kol-Chozehoskero čhavo, savo sas vodcas andro foros Micpa. Ov la ačhaďa, kerďa upral late o pados a thoďa upre o čopi o vudar the o zavori. Oprikerďa the o muri paš o paňi Siloam, paš e kraľiskeri bar (zahrada) dži ko garadiči, pal save pes džal tele avri andral o Foros le Davidoskero.
16Pal leste prikerelas o Nehemiah, le Azbukoskero čhavo, o muri paš e nadrža, paš o hrobi le Davidoskere the paš o kasarňi. Ov sas vodcas upral jepaš foros Bet-Cur.
17Pal leste prikerenas o Leviti a ľidžalas len o Rechum, le Baniskero čhavo. Pal lende prikerelas o Chašabiah, savo sas vodcas pro jepaš okresis Keilate.
18Pal leste prikerenas aver Leviti, saven ľidžalas o Chenadad, le Bavvajoskero čhavo, savo sas vodcas upral dujto jepaš okresis Keilate.

19Paš lende prikerelas o Ezer, le Ješuaskero čhavo, o vodcas andre Micpa. Ov prikerelas aver kotor le muroskero dži pro rohos, kaj sas o zbraňi andro sklados.
20Pal leste prikerelas o Baruch, le Zabbajoskero čhavo, savo igen mištes kerelas le muroskere rohostar dži paš o vudar le Eljašiboskere khereskero, le bare rašaskero.
21Pal leste kerelas o Meremot, le Urijoskero čhavo, saveske sas papus o Hakkoc. Ov prikerelas le Eljašiboskere vudarestar dži pro agor leskere khereske.
22Paš leste prikerenas o rašaja, save sas andral o gava pašal o foros.
23Pal lende kerenas o Benjamin the o Chaššub a paš lende o Azariah, le Maasejoskero čhavo, saveske sas papus o Ananiah; sako prikerelas paš peskero kher.
24Pašal le Azarioskero kher dži pro rohos le muroske kerelas o Binnuj, le Chenadadoskero čhavo.
25Paš leste prikerelas o Palol, le Uzajoskero čhavo. Chudľa te kerel paš o agor le murostar, paš e veža le uprune palaciskeri, pašes paš e dvora le stražňikengeri. Pal leste kerelas o Pedajah, le Parošoskero čhavo.
26O chramoskere služobňika, save bešenas pro brehos Ofel, prikerenas dži paš e Paňeskeri Brana pro vichodos dži paš e veža, khatar pes stražinelas o Chramos.
27Pal lende prikerenas o murša andral o foros Tekoa. Kerenas ola vežatar dži paš o muros pro Ofel.
28Upreder le Grajengera Branatar kerenas o rašaja, sako angle peskero kher.
29Paš lende kerelas o Cadok, le Immeroskero čhavo, angle peskero kher. Pal leste kerelas o Šemajah, le Šechanioskero čhavo, savo stražinelas e Vichodno Brana.
30Pal leste prikerelas o Chananijah, le Šelemioskero čhavo the o Chanun, o šovto čhavo le Calafoskero. Pal lende kerelas angle peskero kher o Mešullam, le Berechijoskero čhavo.
31O Malkijah, savo kerelas veci le somnakastar, prikerelas pal lende dži paš o kher, kaj bešenas o chramoskere služobňika the ola, save cinen a bikenen, paš le Stražňikengeri Brana, anglo kher, so sas ačhado pro rohos le muroske.
32Maškar oda kher pro rohos the maškar e Bakrengeri Brana prikerenas o muros ola, save kerenas o veci le somnakastar the ola, save bikenen a cinen.
33Sar pes došunďa o Sanballat, hoj ačhavas o muri, igen choľisaľiľa a asalas avri le Izraeliten.
34Paš peskere manuša the Samarijike slugaďa phenďa: “Oda so keren kala Židi? Se on nane ňič! Gondoľinen peske, hoj pale ačhavena o foros? So, šaj obetinena? Dokerena e buči tel jekh džives? So šaj keren kale šmecenca pro kopi? Se hine zlabarde!”
35O Ammončanos Tobiaš ačhelas paš leste a phenďa: “Ča mi ačhaven! E liška lenge čhivela tele o muri, sar upre chučela!”
36No me man chudľom te modľinel: “Devla amaro, šun, sar asan amendar. Odvisar oda pale pre lende a mi en ajse sar ola, saven zalen a odľigenen andre aver phuv.

37Ma odmuk lenge oda nalačhipen, so amenge kerenas, a ma bister pre lengere bini. Bo olen, ko ačhavelas kada foros, andro jakha asanas avri.”
38Avke amen dureder ačhavahas o muri. O manuša pačivalones kerenas e buči a o muros pašal calo foros sas imar jepaš dokerdo.