MUKÉTÍMÙ 20:18-29

¹⁸Kɛ̀ Edɔmmu kóo kpɑ̀ɑ̀tìi bɛ̀ tɛ̃̀ńnɛ́ kɛ dɔ̀: Di í yóó pɛ̃ɛ̃tɛ́ diɛ nh ɛì. Kɛ̀ di mɛ nyetɛ n yóó bɑ́ɑ́tóomu kɛ́ di co kɛ̀ tí dokɛ́.

¹⁹Kɛ̀ Isidɑyɛɛribɛɛ ò tɛ̃̀ńnɛ́ kɛ dɔ̀: Ti yóó kétɛ́ kucɛ diɛkù mɑ́ɑ̀ ndi kɛ ti yɑ̃̀ ɑ ɛì kó mɛniɛ tínti nɛ̀ ti wũɔ̃ ti bo dɑ yietí. Dɛ̀ í tú tìmɑtì, ti yóó nɑ ɑ tenkɛ̀ mɑ́ɑ̀ ndi kɛ́pɛ̃ɛ̃tɛ́.

²⁰Kɛ̀ Edɔmmu kóo kpɑ̀ɑ̀tìi bɛ̀ tɛ̃̀ńnɛ́ kɛ dɔ̀: Di í pɛ̃nkɛ́. Kɛ̀ Edomiibɛɛ bɑ́ɑ́tí nɛ̀ bɛhɑ̃ɑ̃pɔ̀nkperíbɛ̀ pɛ́u kɛ́ bɛ̀ co.

²¹Mɛm̀mɛ Edɔmmu kóo kpɑ̀ɑ̀tì yetɛmɛ̀ Isidɑyɛɛribɛ bo pɛ̃ɛ̃tɛ́mɛ̀ o ɛì, kɛ̀ Isidɑyɛɛribɛ pɛɛ́ nkupíkù tɛkù.

²²Kɛ̀ Isidɑyɛɛribɛɛ ítɛ́ Kɑdɛɛsi kɛ́kɔtɛ ditɑ̃rì bɛ̀ tu dì Ɔdi.

²³Ti Yiɛ̀ nKuyie ndɛ mbɛ́innɛ̀ Mɔyiisi nɛ̀ Anɔɔ Ɔdi tɑ̃rì Edɔmmu temmɑ̀nku kɛ dɔ̀:

²⁴Anɔɔ kũnti o yɛmbɛ̀ borɛ̀ ndɛ, ò í tɑti dihɛì n yɛ̃ n yóó duɔ́ ndì Isidɑyɛɛribɛ kɛ yɛ̃́ di do yetɛmɛ̀ n kpɛti Mɛdibɑ kó mɛniɛ mborɛ̀.

²⁵Túótɛ́ Anɔɔ nɛ̀ o birɛ Edeɑsɑɑ kɛ̀ di dekɛ Ɔdi tɑ̃rì.

²⁶Kɑ̀ɑ dɑ́tɛ́ Anɔɔ yɑ̀ɑ̀tì kɛ́dɑ́tínnɛ́ o birɛ Edeɑsɑɑ. Anɔɔ yóó dɛ nkú.

²⁷Kɛ̀ Mɔyiisii dɔɔ̀ ti Yiɛ̀ nKuyie nhò nɑ̀kɛ́ tì Isidɑyɛɛribɛ bɛmɔu ììkɛ̀, kɛ̀ bɛ̀ɛ dekɛ Ɔdi tɑ̃rì.

²⁸Kɛ̀ Mɔyiisii dɑ́tɛ́ Anɔɔ yɑ̀ɑ̀tì kɛ́dɑ́tínnɛ́ o birɛ Edeɑsɑɑ. Anɔɔ dɛ nku Ɔdi tɑ̃rì ĩ́nkɛ̀. Mɔyiisi nɛ̀ Edeɑsɑɑ kɛ̀ bɛ̀ɛ cútɛ́ní.

²⁹Isidɑyɛɛribɛ tĩ̀nnì dimɔu kɛ̀ bɛ̀ɛ yɑ̀ Anɔɔ kumɛ̀ kɛ́kɔmmú o kṹṹ nkɛ dɔ̀ yɛwe sipísìtɑ̃ɑ̃ti.