Numero 20:18-29

¹⁸Baribʌrʌ Edoʌ̃nebema boroba panusia: –Bãrãra mʌ̃ druad̶e wãnacara panʌa. Maʌ̃da ĩjãnaẽ́bʌrʌ dairãra bãrãmaa djõne wãnia.–

¹⁹Dji iwid̶id̶e wã panʌba jarasid̶aa: –Wãrãda quĩrãipa od̶e wãnia. Maʌ̃ne dairãba wa dai animarãba bãrã baidoda dod̶ibʌrʌ, maʌ̃bari paratada diad̶ia. Ab̶abe bʌ druad̶e wãyã wãna quĩrĩã panʌa. Ab̶abe maʌ̃drʌ iwid̶i panʌa.–

²⁰Baribʌrʌ Edoʌ̃nebema boroba wayacusa panusia: –Bãrãra mʌ̃ druad̶e wãnacara panʌa.– Ara maʌ̃da Edoʌ̃nebema boroba sordaorã bio mẽsrã b̶eara zocãrã israelerãmaa djõne edesia.

²¹Edoʌ̃nebema boroba idji druad̶e idu wãbiẽ́ bẽrã israelerãra dewara óare wãsid̶aa.

²²Cadé abadad̶eba Israel purura Hor eyad̶aa wãsid̶aa.

²³Hor eyara Edoʌ̃ drua caita b̶ʌa. Mama Ãcõrẽba Moisea Aaroʌ̃a bid̶a jarasia:

²⁴–Nama Aaroʌ̃ra jaid̶aya. Idjira mʌ̃a israelerãa diai jarad̶a druad̶e ed̶a wãcara b̶ʌa, Meribád̶e mʌ̃a baido weabid̶ama bãrãba mʌ̃a jarad̶ara ĩjã od̶aẽ́ basi bẽrã.

²⁵Moise, bʌ djaba Aaroʌ̃ra idji warra Eleaza sid̶a Hor eyad̶e ʌ̃taa ededua.

²⁶Mama Aaroʌ̃ba jʌ̃ b̶ʌ djiora ẽrãped̶a idji warra Eleazaa jʌ̃bidua sacerdote dji dromada b̶emãrẽã. Maʌ̃be Aaroʌ̃ra mama jaid̶aya.–

²⁷Ara maʌ̃da Moiseba jũma osia Ãcõrẽba jarad̶a quĩrãca. Jũma israelerãba acʌ panʌne Aaroʌ̃ra, Eleaza sid̶a Hor eyad̶e ʌ̃taa edesia.

²⁸Mama Aaroʌ̃ba jʌ̃ b̶ʌ djiora jũma ẽrãped̶a Moiseba Aaroʌ̃ warra Eleazaa jʌ̃bisia. Maʌ̃be Aaroʌ̃ra eya borod̶e jaid̶asia. Mãwãnacarea Moisera Eleaza sid̶a eyad̶eba ed̶aa zesid̶aa.

²⁹Israelerãba Aaroʌ̃ jaid̶ad̶a cawasid̶ad̶e idji carea jũmarãda jed̶eco ab̶a jĩãsid̶aa.