Namba 20:18-29

¹⁸Mago Edom kêsôm gêdêŋ eŋ gebe “Ôsa ŋoc gamêŋ ômôêŋ atom. Embe ôsa ômôêŋ, oc ôndac aêŋoc siŋ.”

¹⁹Ma lau Israel sêsôm gêdêŋ eŋ gebe “Aêac asêlêŋ amoa intênasêgageŋ. Ma aêac to ma bulimakao embe anôm nêm bu, oc anam ôli bu tau. Aêac abe ateŋ tageŋ tonec, gebe asêlêŋ amoa intênasêgageŋ e aô lasê ŋamadiŋ ônêŋa.”

²⁰Mago eŋ kêsôm gebe “Aôm ôsa tonec ômôêŋ atom.” Ma Edomnê lau taêsam sêsa dêdêŋ êsêac sêja toŋajaŋageŋ.

²¹Amboac tonaŋ Edom gedec ma gêlôc, gebe lau Israel sêsa nê gamêŋŋageŋ sêna atom, tec lau Israel sêjac jaê eŋ.

²²Lau Israel to nêŋ gôlôac samobgeŋ sêsêlêŋ e sêô lasê lôc Horeb.

²³Aŋga lôc Horeb, taŋ kêkô lau Edom nêŋ gamêŋ ŋamadiŋ naŋ, Apômtau kêsôm gêdêŋ Mose agêc Aron gebe

²⁴“Aron naêwiŋ nê lau, gebe eŋ êsa gamêŋ, taŋ kakêŋ gêdêŋ lau Israel naŋ, atom. Eŋ êsa atom gebe amagêc ali awem sa to taŋempêc gêdêŋ ŋoc jatu aŋga bu Meriba.

²⁵Amboac tonaŋ ôkôc Aron agêc latu Eleasar ma ôwê êsêagêc sêpi lôc Horeb sêna.

²⁶Go ôkwalec Aronnê ŋakwê su ma ôkêŋ êndêŋ latu Eleasar êsô sa. Ma Aron êmac êndu aŋga tônê naêwiŋ nê lau.”

²⁷Mose gêgôm Apômtaunê jatu ŋanô kêsa ma êsêac sêpi lôc Horeb sêja ma gôlôac samob sêlic.

²⁸Ma Mose kêkwalec Aronnê ŋakwê su ma kêkêŋ gêdêŋ ênê latu Eleasar kêsô sa. Go Aron gêmac êndu aŋga lôc ônê. Ma Mose agêc Eleasar sêsêp aŋga lôc sêmêŋ.

²⁹Gêdêŋ taŋ gôlôac samob sêlic gebe Aron gêmac êndu naŋ, lau Israel nêŋ gôlôac samob têtaŋ taŋiboa kêtu eŋŋa kêtôm bêc 30.