1Iesu ia hadibaia lou kone dekenai. Bona taunimanima momo idia haboua ia dekenai. Idia be momo herea dainai, Iesu be vanagi ta dekenai ia guia, davara latanai. Vanagi latanai ia helai, bona taunimanima idia noho kone dekenai.
2Gau momo ia hadibaia parabole dekenai. Iena hadibaia hereva lalonai ia gwau,
3“Umui kamonai. Tau ta ena uhe ia hadoa tano dekenai.
4Ia hadoa neganai, uhe haida idia moru dala dekenai, bona manu idia mai idia ania.
5Uhe haida idia moru nadi gabuna dekenai, unuseni be tano momo lasi dainai, idia tubu haraga, badina be tano ia dobu lasi.
6Dina ia daekau neganai, iena siahu ese unai uhe matamata ia hamasea, badina idia be ramudia lasi.
7Uhe haida be idia moru ava ginigini lalonai, bona uhe edia tubu dala be ava ginigini ese idia koua, bona au huahua ia atoa lasi.
8To uhe haida idia moru tano namona dekenai, idia tubu namo herea, huahua idia atoa, haida 30, haida 60, haida 100.”
9Vadaeni Iesu ia gwau, “Mai taiana tauna, namo ia kamonai.”
10Gabeai, Iesu sibona ia noho neganai, ia kamonai henia taudia bona iena diba tahua taudia 12 ese unai parabole ena anina idia tahua.
11Ia hereva idia dekenai, ia gwau, “Dirava ena Basileia hereva ia hunia lasi umui dekenai, to murimuri taudia dekenai, gau ibounai lau hadibaia parabole dekenai.
12Buka Helaga ia gwauraia inai: “ ‘Idia itaia, to anina idia diba lasi, bona idia kamonai, to hereva ena anina idia davaria lasi, edia lalona idia giroa garina, bona edia dika be do ia gwauatao garina.’ ”
13Iesu ia hamaoroa idia dekenai, “Bema inai parabole ena anina umui diba lasi, edena bamona parabole haida edia anina dohore umui diba?
14Uhe hadoa tauna ese Dirava ena hereva ia hadoa.
15Taunimanima haida be unai hereva ia moru dala dekenai tano bamona. Hereva idia kamonai, to nega tamona Satani ia mai, idia lalonai hadoa hereva gauna ia abia lao.
16Hegeregere, uhe haida idia moru nadi dekenai, be taunimanima haida bamona. Hereva idia kamonai neganai, idia abia dae haraga, mai moale danu.
17To idia be ramu lasi dainai, nega sisina mo idia goada. Gabeai inai hadibaia hereva dainai, nega dika bona dagedage idia mai neganai, idia moru haraga.
18Bona haida be uhe ia moru ava ginigini lalonai hegeregere. Inai taudia be hereva idia kamonai vadaeni.
19To tanobada gaudia dekenai laloa momo, bona kohu ura henia bada, bona ura dika idauidau dainai, hereva ena tubu dala idia koua. Bona au huahua idia atoa lasi.
20To haida be uhe ia moru tano namona dekenai hegeregere. Hereva idia kamonai, idia abia dae goada, au huahua idia abia. Haida 30, haida 60, haida 100.”
21Iesu ma idia dekenai ia hereva, ia gwau, “Lamepa ita abia neganai, ita atoa uro lalonai, o mahuta patana henunai, a? Lasi, to lamepa ena gini gabuna dekenai ita atoa.
22Hunia gaudia ibounai dohore idia hedinaraia, koua gaudia ibounai dohore idia kehoa.
23Mai taiana tauna, namo ia kamonai.”
24Bona ia gwau, “Umui kamonai gaudia umui laloa namonamo. Umui henia hegeregere, dohore unai bamona idia henia lou umui dekenai, bona gau haida danu.
25Mai ena gau tauna, gau haida danu do ia abia, to gau lasi tauna, ena gau abia dala do ia koua.”
26Ma Iesu ia gwau, “Dirava ena Basileia be inai bamona: Tau ta tano latanai uhe ia negea.
27Hanuaboi ia mahuta, dina neganai ia toreisi, vadaeni uhe hadoa gauna ia tubu bona ia vara, to hadoa tauna ia diba lasi edena bamona uhe ia tubu.
28Tano sibona ese huahua ia havaraia, rau ia tubu guna, gabeai kwarana, inai murinai be anina ia vara.
29To anina ia mage neganai, karaharaga ia utua kaia dekenai, badina huahua gogoa negana ia ginidae.”
30Iesu ia gwau, “Dirava ena Basileia be dahaka bamona? Edena parabole dekenai anina ita hedinaraia?
31Ia hegeregere mastadi au ena uhena bamona, tano dekenai hadoa neganai be ia maragimaragi, tanobada ena uhe idauidau edia bada ia be henunai.
32To idia hadoa, bona ia tubu neganai, ia bada herea, aniani ava ibounai edia bada ia hanaia, iena rigi danu be bada herea, bona ataiai manudia idia helai unuseni, iena keruma dekenai.”
33Bona parabole unai bamona momo dekenai Iesu ia hadibaia, idia kamonai diba hegeregere.
34Ia hadibaia parabole dekenai sibona. To gabeai, ia bona iena diba tahua taudia sibona idia noho neganai, anina ibounai ia hadibaia idia dekenai.
35Unai dina, adorahi neganai, Iesu ese diba tahua taudia dekenai ia hamaoroa, ia gwau, “Davara unai kahanai ita hanaia lao.”
36Vadaeni, idia ese unai taunimanima momo idia rakatania, Iesu danu vanagi dekenai idia guia, idia heau. Vanagi haida danu idia lao.
37Lai bada herea ia mai, bona hurehure bada idia daekau, ela bona vanagi kahirakahira ia honu.
38Iesu ia mahuta vanagi duduna dekenai, geda manokamanoka latanai. Idia lao ia dekenai, idia hanogaia. Idia gwau, “Hadibaia tauna e, oi laloa lasi, kahirakahira ita mase?”
39Vadaeni Iesu ia toreisi, lai dekenai ia gwau henia, bona davara dekenai ia hereva, ia gwau, “Umui doko, umui maino noho.” Vadaeni, nega tamona lai ia doko, bona hurehure be lasi.
40Iena diba tahua taudia dekenai Iesu ia gwau, “Umui dahaka gari momo? Edena bamona umui be abidadama lasi?”
41Idia hoa bona gari bada, idia hereva, “Inai tau be daika? Lai bona davara ese iena hereva idia kamonai henia!”
