Mareko 4

1

2

3

4

5

6

7

8

9

10

11

12

13

14

15

16

¹Dzesui paha oba ttuuho samaqata bosaho eete abi banaitemi noko samanenipamu noke sengibetetaho quba noi sisimata peiteqi oho nakuta habese oba heeta oota. Oomi abi quba mina nokoi gama igasata habeseqi oba pouqata soubireta.

²Qate noi qahura noota noo samaneke nokoke pobi hiireta.

³Hiireqi noi hee, Nookare, Bababa eetaqu abi teei bababa eetare biranateta.

⁴Biranate bababa eesuhimi goottara qesai tete sigiqata taatemi nee biranate oke muuna bamuiteta.

⁵Ma qesai oma quhirata taasuqi suuna eetetahe, ttoka obera oomi ete peite moomi,

⁶bubuso naatemi noho orotu bamu naatemi ngorubateta.

⁷Ma gottara qesai baa bisata taatemi baa pei kharanate pesunaitemi goomaama naateta.

⁸Qate gottara qesai ttoka bibinomata taate suna eeteqi qesai 30, qesai 60, qesai 100 oho isakita gairai goomata.

⁹Hiireqi noi hee, Tomanomai nookare ooiqi hiireta.

¹⁰Noko noke qaasumi noi qesa Tuerebema noko ooqi nokoi noke qahura oho qasa hiireta.

¹¹Hiiremi noi noko pobi hiireta, Ohongaho pobi oho noo rurunake nikeho quba paanaitaridzoni. Oonihe sasana oorai nokoho quba oke gama qahura noota keke hiiremi oorai.

¹²Oi qetaqetai hee, Kahosa nokohoke Ohonga dzamutainoho quba nokoi qupa burisi eetaama naateqi nesema mooqi moo pobitaama, ma tomama nookaqi nooka pobitaamani. Oiqi qeetemi ooraiqi Dzesu hiireta.

¹³Noi hee, Qahura noo erake nike ruume naate mae? Oonita niike ikanomake eeteqi qahura noo qesaqesa qupadzomaqu?

¹⁴Bababa eetaqu abi noi sinabidza nooke bababa eetorai.

¹⁵Noo oke tete sigiqata bababa eesumi, qesai ota ooqi nookahimi Saatai hairiamake baaqi noo nokoho torota bababa eetoraike karabetorai.

¹⁶Oho qesa oma quhirata bababa eesumi nokoi noo oke nookaqi ttidza qidza eeteqi aimorai.

¹⁷Oonihe, nokoho nakuta orotu ooraama naatemi nokoi bodza hoteqata oomi sinabidza nooho quba kaiponi mae uuba ma sakaba biranatemi nokoi ao taatorai.

¹⁸Ma qesa baa bisata bababa eesumi nokoi noo oke nookorai.

¹⁹Oonihe, ttokaho iiha ma dzoobidza, ma qurumaho ikoiko ma quba qesaho qeraqera oi gama ota peiteqi sinabidza nooke pesunaitemi noo oi meeama naatorai.

²⁰Qate qesa ttoka bibinomata bababa eetemi, noko noo oke qupata mootomi qesa 30 qesa 60, qesa paha 100 oho isakita mee goomorai. Oiqi hiireta.

²¹Ma noi noko pobi hiireta, Abi dzongi aima baa oke bamu qapuma uhesabaqu, mae meramera pesuta mootaqu, baamu.

²²Noi isanate oke qohare heeta mootakoi. Oonita quba dzukuna oi gama paana naataquho isaki, ma quba dzahedzahena oi gama paana naataquho isaki oni. Tomanomai nookare!

²⁴Hiireqi noi eraiqi hiireta, Quba nike nookaqu oke korabete nookare, Oi nike nooka beedzae eetoraiho isakita mee saridzakoi. Sarihimake nikeke paha moitakoi oi teeho torota isaki baura eesuma Ohongai paha qesa noke moitakoi. Qate teeho neta oho isaki bamu naatemi oke paha noho neta karabetakoi. Oiqi hiireta.

²⁶Hiireqi noi paha erake hiireta, Nebe teeta Ohongaho pobi erake eete oorai. Abi teei goottara qesa ttokata bababa eeteqa qupibake meeqa etebake qoridzakoi.

²⁷Oonihe, gottara suuna eete bitotorai oho teteke noi ruumeni.

²⁸Oi ttoka nomae beedzae moitemi mee eetorai. Bosata suuna biranatemi quhisa ota takobami oho nakuta mee goomorai.

²⁹Qate, mee ba naatemake rumutaquho bodzata abi oi oho dzube mootakoi.

³⁰Dzesui hiireta, Ohongaho pobi oke napai quba apeho tomidzata mootaqu? Mae qahura noo apeta hiiremi isanataqu?

³¹Oi pobidzo benarai benara minaraho neta gattingaqanita abi oke ttokata aubotaquho isaki.

³²Aubotomi oi peiteqi kuna minarake riiteqi goha dzoobiremi mina naatemi nee ota sumudzatorai. Oho isakita sinabidza gattiqai minanate abi kokora eetakoi.

³³Oonita nokanoka nokohoho isakita noi sinabidzake qahura noo samaneta mootoqi abi minarake pobi hiire qaaqi teqaha qahura nooamake noko pobi hiire qaarara.

³⁴Oonihe, noi qaheubaqata tumakhameto nomeke oho khooba gama hiire paanaite qaata.

³⁵Qate oho surenake noi noko pobi hiireta, Napamae oba ttuuho totaqita qeemare.

³⁶Hiireqi noko abi tupu oke aipo biire noi ao sisima nakuta oomi noko paha ota peite noma noko tuusumi sisima qesai paha nokoma gama tuumata.

³⁷Tuusuhimi bapamu mina teei tooromi pouma sisima nakuta quura hee eetare eeteta.

³⁸Qate noi sisima ipita bosaqure heeta meeqomi nokoi noke tukutoqi pobi hiireta, Banaita, napai dzaetare boohibita nii bamu oho atti eetaqu?

³⁹Hiiremi noi tukubaqi uta qamuni hiireqi oba ttuu pobi hiireta, Nipanate, kebaratare. Hiiremi uta bamu naasumi oba kebaratanipamuke eeteta.

⁴⁰Eetemi noi erake noko pobi hiireta, Nike naane quba atti eete?

⁴¹Nike ai tatauma saridzaamake oorai mae? Hiiremi nokoho sama suu qooromi noko qesa pobi hiireta, Abirai apeni uta ma oba ttuui oonomake eete noho noo qusubaite? Oiqi hiireta.