1Wzelo Jesus rneluu Ne mén runis ste. Kom kesentyent ndal mén wdop lo Ne, lex wdee Ne lenbark ne zob nga, wzob Ne lenbark guin, le yra mén wyan runis.
2Ndal ne wneluu Ne men, teblose zegnak kwent wneluu No. Or ne kaneluu Ne men, re Ne:
3―Gugon neree gante: Te dxe wruu te mén ne rguu bni, zalabni men zhobxtil.
4Chene kalaal meno, nuu we wyab nëz; lex wyab mgyin wu ma we.
5Nuuzego wyab lad gye ledne yëtet ndal yu; wlengoo por ne yëtet ndal yu lad gye guin.
6Per chene wlen ngbiz, wzeey ngbizo; kom yëtet ndal lu we, wbidxo.
7Nuuzego wyab lad lbagyëts; wroo lbagyëts, wket lbagyëtso, por neguin wakdeto.
8Per nuuzego wyab ledne wen lyu; wleno, wroo we, no kesentyent wako; nuu we wak galebchii zhob, nuuzego wak tsonlal zhob, nuuzego wak tebgwyuu zhob.
9Lex re Ne lo men: ―Men ne rkagyedyag diiz, gon men neree ne rzëët noo.
10Chene che wyan Jesus noze laa Ne, wbig yra men ne ndxin guex lo Ne no le yra chibtxup xpén Ne, wnabdiiz men lo Ne gan pe rna neguin ne wzëët Ne zegnak te kwent.
11Lex re Ne lo men: ―Laa de yra de, Dëdyuzh wniiz si ne gaknan de logne ngueedx ne rkyeen Ne; per le yra men ne nakdet xpén noo, yrandxee ne rzëët noo lo men, teblose zegnak kwent rzëët noo we;
12chen mase mazre rwii men, per nak men zegnak mén ne rwiidet; mase mazre ron men diiz, per ydeedet men kwento, chen ysaandet xgyelmal men no chen gakdet perdon xdol men.
13No re ke Jesus lo men: ―Belne rdeedet de kwent gan pe rna diizree ne wzëët noo zegnak te kwent, ¿pezee ydee de kwento stebëdo?
14Men ne rguu bni nak zegnak men ne rzëët xdiiz Dëdyuzh.
15Le zhobbni ne wyab nëz nak zegnak mén ne ron xdiiz Dëdyuzh, per chene rluzh ron meno, rdxiin Bzelo rboo we lextoo men.
16Le zhobbni ne wyab lad gye nak zegnak mén ne ron xdiiz Dëdyuzh; rzhiilen men ron meno,
17per kom nak men zegnak ne yëtet ndal lu, rundet men wantar; chene le men pe rzak o chene rwinyaan mén men por ne rlaleedx men xdiiz Dëdyuzh, rsalzaangue men ne rlaleedx meno.
18Le zhobbni ne wyab lad lbagyëts nak zegnak mén ne ron xdiiz Dëdyuzh,
19per por ne mazre za yra ne nuu gyëzlyuree lextoo men no por ne rbode ne non ne nuu gyëzlyuree men no por ne zoon men pezee gap men yrandxee ne nuu gyëzlyuree, neguin rlaa ne le men rsalzaan xdiiz Dëdyuzh; rdeedeto si ylaa men ne wen.
20Per le zhobbni ne wyab ledne wen lyu, nak zegnak mén ne ron xdiiz Dëdyuzh, rukas meno, lex rlaa men ne wen. Nuu men nak zegnak zhobbni ne wak galebchii zhob, nuuzeg men nak zegnak zhobbni ne wak tsonlal zhob, nuuzeg men nak zegnak zhobbni ne wak tebgwyuu zhob.
21No re ke Jesus lo men: ―¿Peguin rgoob mén te bnii por ne yzoob meno zhiin te kaj u por ne yzoob meno zhiin loon? ¿Pe let rzoobdet meno ledne gya chen yzenii we?
22Bet ne ngueedx yët ne yrunyoodet, ni yët ne rak rlaanguel ne gaknandet mén.
23Men ne rkagyedyag diiz, gon men neree ne rzëët noo.
24No re ke Ne lo men yra men: ―Gukagyedyag neree ne ron de. Zegne rukas de xdiiz Dëdyuzh, zenga ke tsukas Ne de no ntozdee tsukas Ne de.
25Men ne che rukas xdiiz Dëdyuzh, laa Ne ylaa ne mazre tsukas meno; per le men ne rukasdeto, axtegue ne chendxee rukas men, tsukasdetre meno.
26No re ke Jesus: ―Ne rkyeen Dëdyuzh nak zegnak chene rguu te mén zhobxtil lenlyu.
27Lex rya men raguees men; rluzh nga raxee men. Zenga za dxe, za gyëël. Lex rleno, rroo we, per nandet men pezee rleno no pezee rroo we.
28Laa lyu nak ne rguu gyelembán lextoo we. Primer rlen xgyizho, zhich guin rlen do we, zhich guin ruleedxo.
29No chene le we che wal, rtop meno porke che wdxiin tyemp ne ydopo.
30No re ke Jesus: ―¿Pagox rzaglo ne rkyeen Dëdyuzh, u pagox ynesaglo bo?
31Rzaglo we te medx lyagwlizh ne rlabni mén lyu. Laa we nak ne mazre windee ke lo yrandxee medx ne nuu gyëzlyu.
32Per chene le we che wakbni, rroo we, laa we nak ne mazre raknzhoodee ke lo yrandxee gyizh; kesentyent rroo zhuuko, axtegue mgyin ra rzhexkwaa xeftxëës zhuuko.
33Zeree wzëët Jesus xdiiz Dëdyuzh, teblose zegnak kwent wzëët No, chen ydee mén kwento.
34Bet nzëëdet Ne lo mén belne nzëëdet No zegnak kwent; per le lo yra xpén Ne, waandxee wzëët Ne gan pe rna we.
35Dxe ke guin, chene che rzëë lyu, re Jesus lo yra xpén Ne: ―Yoo tekaa be stebkoo nis.
36Orguin wsan men yrandxee mén ne ndxin nga, lex za men yra men Ne lenbark guin ne zob Ne; no zanal ke stxup stson bark ne zob nga.
37Lex wlen te meroo meduxtee, axtegue lenbark rasob nis, le nis chexke zayezaa lenbark.
38Le Jesus nexguees lenbark, nkuuk Ne te lmad. Orguin wboo men mkaal lo Ne, re men: ―¡Maxter! ¿Pe bet zadet lextoo de ne sebgyët be lo nis?
39Orguin waxee Ne wakndux Ne lo meroo guin, no re Ne lo nis: ―¡Chi gutsuu! ¡Tsë gutsuu! Orguin wyakchi mee, no wutsë nis, nonchee chi wak.
40Lex re Ne lo yra xpén Ne: ―¿Penak kesentyent rdxe de? ¿Pe rlaleedxdet de Dëdyuzh?
41Kesentyent wdxe men yra men, lex rnabdizlsaa men, re men: ―¿Pezee nakleg ménree ne axtegue mee, axtegue nis ron xdiiz men?
