1Mago'ene Jisasi'a ra tiru'mofo ankenare mani'neno naneke erigafa huno rempi huzami'ne. Tusi'a vahe krerfamo'za regorave hazageno, Jisasi'a votifi marerino maninege'za, tusi'a vahe krerfamo'za tiru ankenarega mani'naze.
2Agra rama'a fronka ke zmasami'ne. Rempima huzamifina, anage hu'ne,
3kma antahiho! Hoza ne'mo avimaza ruraniku hozarega vu'ne.
4Ana'ma huno ome runernigeno, mago'a avimzamo'a kamofo ankinafi evuramigeno, namamo'za eme ne'naze.
5Mago'a avimaza avimo'a havege huno rama'a mopa omanenefi evuramino ame huno hagene. Na'ankure havege huno osia mopa me'negeno'e.
6Zagema hanatino'a teosaparene, na'ankure rafunamo'a fempina uorami'negeno osapare'ne.
7Mago'a avimaza avimo'a ave'ave trazampi evuramigeno, aveave trazamo'a hageno, rentrako higeno raga'a reonte'ne.
8Hu'neanagi mago'a avimzamo'a tima'ane mopafi evuramiteno hageno raga'a rente'ne. Mago'amo'a 30ti'a rentegeno, mago'a 60ti'a rentegeno, mago'a wan 100 ti'a rente'ne.
9Ana nehuno anage hu'ne, izano agesa me'nenigeno nentahisimofona, atregeno ama kea antahise hino.
10Anama huteno Jisasi'ma Agrakema umani'negeno, mago'a manigagi'naza vahe'mo'zane, 12fu'a amage'ma nentaza disaipol nagamo'za, ana fronka keramimofo agafa'a antahise hunaku antahige'naze.
11Jisasi'a anage huno zmasami'ne, Anumzamofo kumamofo oku'a antahintahia tmagrira ko tamine. Hianagi megi'ama mani'naza vahe'mo'za fronka kege nentahize.
12Ana higu Avontafepina anage hu'ne, kegahazanagi keama osugahaze. Antahigahazanagi antahi amara osugahaze. Zamagra aru zmagu'a rukrahe hanageno Anumzamo kumizimi eri atrezankure. (Aisa 6:9-10)
13Jisasi'a anage huno zmasami'ne, ama fronka kemofo agafa'a antahi ama'ma osanutma, inankna hutma mika fronka kemofo agafa'a antahi amara hugahaze?
14Avimaza rurani'nea ne'mo'a, Anumzamofo ke ome krine.
15Mago'a avimaza kamofo ankinarega evurami'neana, mago'a vahe'mo'za Anumzamofo kea nentahizageno, Sata'a ame huno zamagu'afima krinea kea eritrene.
16Havege mopafima rurani'neana, Anumzamofo kema nentahi'za, muse hu'za ame hu'za eneri'ze.
17Hianagi zmagu'afina rafuna ore'nazanki'za oti hanave otinazankiza, anante'ma Anumzamofo kegu hu'za hazenke zano, zmazeri haviza huzama fore hige'za, ame hu'za atre'za nevaze.
18Mago'amo'za ave'ave trazampi avimaza ruranineankna hu'naze. Anamo'za Anumzamofo kea antahinazanagi,
19mopafi zankuke zmagesa nentahi'za, zago afu fenoma eri atruma huzamo rezmatga nehuno, mago'azama zamesinte'zamo zmagu'afina efreno Anumzamofo nanekea rentrako higeno ne'za raga'a renonte.
20Hianagi tima'ane mopafi rurani'nea avimazana, zamagra Anumzamofo kea antahi ankere'za, ana kea e'neri'za nena raga'a renentaze. Mago'mo'a 30'a rentegeno, mago'mo'a 60'a rentegeno, mago'mo'a 100ti'a renente.
21Jisasi'a amanage huno mago'ane zamasmi'ne, rampe tavi'ma rekruma hazana, sipa gampi ome nentafi, kavo agu'afinka ome nentazo? A'o anara nosaze. Rekru hutma tavima rekru hunte azotare ome nentaze.
22Na'ankure miko'zama fra'ma ki'nesiazamo'a, eama nehanigeno, oku'a me'nesiazamo'a, msare eama hugahie.
23Izano agesa me'nenigeno nentahisimofona, atregeno ama kea antahise hino.
24Mago'ane anage huno zamasmi'ne, kema nentahizana antahi so'e hiho. Tamagrama amisaza avamente, ana avamente tamagrira neramamino, mago'ane agofetu huno tamamigahie.
25Na'ankure iza'o eri'nenimofona mago'ene agofetu huno amigahie. Hagi iza'o e'orinesimofona, osiama eri'neniazana eritre vgaregahie.
26Jisasi'a mago'ane anage hu'ne, Anumzamofo kumamo'a, mago vahe'mo avimza avi mopafi ruranino kriankna hu'ne.
27Kriteno umasenegeno feru ene kenage'enena hageno, ana avimza avimo'a ru hanana huno hagegeno, anama hageana nankna huno hage'neo agra ontahine.
28Mopamo'a agra'a azerinena higeno ne'zama'a rente'ne, esera asina reno rampa'a fore huteno, anante amosare aheno, rampareara nezana rente avinete.
29Anantera raga'a renteno nena hutegeno, agena kazaki kazinteti eme taga hu'ne, na'ankure hozama hamarekna egeno'e.
30Jisasi'a mago'ane anage huno zmantahige'ne, inankna ke hunteta Anumzamofo kumakura hugahune. Inankna fronka ke hunteta eriama hugahune?
31Masteti raga'agna hunege'za mopafi negrize, ama mopafima me'nea avimzana agatereno onensatfa hu'ne.
32Karitageno'a hageno nena huno, maka hozafima me'nea ne'zana ra huno agetenereno, rama'a azankuna'a hageno vuno eno higeno, maka afi' namamo'za ana zafamofo tonapi nona eme kigahaze.
33Ana nehuno rama'a fronka kefinti zamagrama antahi ama hanaza avamente zmasami'ne.
34Agra mago'a kema hunakura fronka kefintike zamasmi'ne. Ana hu'neanagi amage'ma nentaza disaipol naga'ma zamagrake mani'nageno, eriama huno maka'zana zmasami'ne.
35Ana zupa kinaga segeno Jisasi'a amage nentaza disaipol naga'agura hu'ne, erinketa kantu kaziga tinkenare vamneno huno hige'za,
36vahe krerfama zmatrete'za Jisasi'ma mani'nea ventefi mareri'za vazageno, mago'a ventea zamagrane vu'naze.
37Nevzageno tusi'a ununko atuno, tina erikranto kranto nehuno, ana ventefi timo'a marevite'za higeno, timpi tami'za hu'ne.
38Hagi Jisasi'a ventemofona arigarega fita runo mase'negeno, azeri oti'za anage Agrikura hu'naze. Rempi hurami ne'moka, timo'ma tazeri nakri'za nehiana nonkano?
39Anante otino zaho'mofona kenesuno, tami avazago huno timofona ke higeno, ako heno urami avazagene.
40Ana higeno Jisasi'a anage huno zmantahige'ne, Nahigetma amanahu huta koro nehaze? Tamentintia nosazo?
41Ana nehige'za tusi'a zamagogo fege'za, Inankna ne'mo kea nehigeno zahomo'ene timo'ene ke'a antahine hu'za hu'naze.
