1Yesu ɛ̀ara èe yã daańnɛ sɛ̀bɛ saɛ. Wà pàzi paripari, ben à gɛ̃̀ à vɛ̃̀ɛ góro'itɛn íla, gbɛ̃nↄ gↄ̃̀ kaɛna sĩ̀sĩ baa sɛ̀bɛ lɛ́a ń píngi.
2À yã dàńnɛ kↄ̃n yãlɛkↄ̃zinanↄ pari. Lán èe daańnɛ nà à bè:
3À swã kpá! Búbari ke bé à kuu à bↄ̀ à gàa pↄ́wɛɛ fã.
4Lán èe fãa nà, ben à kenↄ lɛ̀ɛ zɛ́ guu, bãanↄ mↄ̀ wà blè.
5À kenↄ lɛ̀ɛ gbɛ̀ sàra musu, gura kɛ̀ bùsu vĩ bítaro, ben aↄ̃ bↄ̀ɛ gↄ̃ↄ, kɛ̀ bùsu bíta gwero yãnzi.
6Kɛ̀ ↄfãntɛ̃ fɛ̀ɛ, ben aↄ̃ tɛ́ kũ̀ wà gàga, kɛ̀ aↄ̃ↄ kãsãa vĩro yãnzi.
7À kenↄ lɛ̀ɛ lɛ̀nↄ guu, ben lɛ̀ fɛ̀ɛ à nàkↄ̃rɛḿma aↄ̃ↄe nɛ́ iro.
8À kenↄ sↄ̃ lɛ̀ɛ tↄↄtɛ maaa guu. Aↄ̃ bↄ̀ɛ wà fɛ̀ɛ aↄ̃ nɛ́ ì, à kenↄ kaarana kɛ̀ baaakurikuri, kenↄ baaagↄ̃gↄ̃, kenↄ basↄsↄↄro.
9Ben Yesu bè: Gbɛ̃ kɛ̀ swã vĩ à ma.
10Kɛ̀ Yesu gùńnɛ gwe à kú ado, ben à gↄ̃ↄn kuri awɛɛplaaanↄ kↄ̃n gbɛ̃ kɛ̀ aↄ̃ↄ kúzinↄ mↄ̀ wà yã pìnↄ mì gbèkaa.
11Ben à bèńnɛ: Luda kpata kɛ̀ bↄ̀ à kiia asii kpàawa àgↄ̃ dↄ̃, mↄde mɛɛ̀ yã píngi o gbɛ̃ kpaaanↄnɛ kↄ̃n yãlɛkↄ̃zinanↄmɛ,
12lɛ aↄ̃gↄ̃ guu gwaa pↄ́ke'ena sai, aↄ̃gↄ̃ swã kpakpaa à dↄ̀rↄ dↄ̃na sai, lɛ aↄ̃ton aɛ dↄ Ludaa, à ń durunnↄ kɛ̃ńnɛro yãnzi.
13Ben Yesu ń lá à bè: Á yã pì dↄ̃roo? É kɛ dia à yãlɛkↄ̃zina ke dↄ̃ↄ?
14À ma! Búbari pì Luda yãn èe fãa.
15Gbɛ̃kenↄ dɛ lán zɛ́ guu pↄ́wɛɛ bà, guu kɛ̀ wà Luda yã fã̀n. Tó aↄ̃ↄ mà, ben Setãn è mↄ́ à Luda yã kɛ̀ wà fã̀ ń tɛ́ pì síḿma gↄ̃ↄ.
16Gbɛ̃kenↄ dɛ lán pↄ́wɛɛ kɛ̀ lɛ̀ɛ gbɛ̀ sàra musu bà. Tó aↄ̃ Luda yã mà, aↄ̃è sí gↄ̃ↄ kↄ̃n pↄnnaao.
17Zaakɛ aↄ̃ↄ kãsãa vĩro, aↄ̃è kɛ gurↄ plaaro. Tó yã'ↄ̃amma ń lé ke tó wà wɛ́ɛ tã̀ḿma yã pì yãnzi, aↄ̃è fumɛ gↄ̃ↄ.
18Gbɛ̃kenↄ dɛ lán pↄ́wɛɛ kɛ̀ lɛ̀ɛ lɛ̀nↄ guu bà. Aↄ̃ Luda yã mà,
19mↄde anduna yã kã̀hãnkɛna kↄ̃n yena auzikizio kↄ̃n pↄ́ kpaaanↄ nidɛnao è nakↄ̃rɛḿma, ben yã pì è gↄ̃ àre sai.
20Gbɛ̃kenↄ dɛ lán pↄ́wɛɛ kɛ̀ lɛ̀ɛ tↄↄtɛ maaaanↄ bà. Aↄ̃è Luda yã ma wà sí, ben aↄ̃è kɛ kaarana pↄ́ ũ, aↄ̃ kenↄ baaakurikuri, kenↄ baaagↄ̃gↄ̃, kenↄ basↄsↄↄro.
21Yesu bèńnɛ: Wè fitia na wà gbaka kúɛa ke wà diɛ gádo gbáruↄ́? Dabu musun wè dinloo?
22Asiiyã kee kuu kɛ̀ weé gí bↄaziro. Pↄ́kee kuu utɛna kɛ̀ eé bↄ gupuraaro.
23Gbɛ̃ kɛ̀ swã vĩ à ma.
24À bèńnɛ dↄ: À làakari kɛ yã kɛ̀ ée maaa. Zaka kɛ̀ eè yↄ̃̀ońnɛn Luda é yↄ̃oare eé ɛara à kaaraare dↄ.
25Gbɛ̃ kɛ̀ pↄ́ vĩin Luda é kaaranɛ. Gbɛ̃ kɛ̀ pↄ́ke vĩroo sↄ̃, baa à nɛ́ngo kɛ̀ à vĩi Luda é sía.
26À bè dↄ: Kpata kɛ̀ bↄ̀ Luda kiia dɛ lán pↄ́wɛɛ kɛ̀ gbɛ̃ fã̀ buraa bà.
27Gwãavĩ kↄ̃n fãantɛ̃o baa tó èe ii oo ke à bɛ̃ɛ, pↄ́wɛɛ pì è bↄrɛ à ìsi kũ, gbɛ̃ pì ègↄ̃ dↄ̃ lán è kɛ nàro.
28Tↄↄtɛ bé è pↄ́wɛɛ i a zĩnda. È kà pá gĩa, gbasa à nↄ̀ sí, à gbɛran è pia.
29Tó à mà, ben wè kɛ̃ kontoo, zaakɛ à kɛkɛgurↄↄ bé à kà.
30À bè dↄ: Bↄ́n kpata kɛ̀ bↄ̀ Luda kiia bↄ̀kↄ̃bao? Bↄ́n wé e wà lɛ́kↄ̃zio?
31À dɛ lán musadi wɛ́ɛ bà, kɛ̀ à wɛ́ɛ kete dɛ pↄ́wɛɛ kɛ̀ wè tↄ̃nↄla píngi,
32mↄde tó wà tↄ̃̀, è bↄɛ à kɛ bíta dɛ dò pↄ́nↄla píngi. È gã̀ gègetenↄ kɛ ai bãanↄ è mↄ́ wà zↄ̃zↄ̃ à lá ↄran.
33Yesu Luda yã òńnɛ pari kↄ̃n yãlɛkↄ̃zina beee takanↄ aↄ̃ mana lɛ́n.
34Èe yãke ońnɛ yãlɛkↄ̃zina sairo. Tó à kú kↄ̃n a ìbanↄ ńtɛ̃ɛ, ben è yã píngi bↄkↄ̃tɛńnɛ.
35Kɛ̀ uusiɛ e kɛɛ, à bè a ìbanↄnɛ: Wà bikũ baa kãa kpa.
36Zaakɛ Yesu kú góro guu, ben aↄ̃ gɛ̃̀o lɛdo aↄ̃ dà zɛ́n lɛ wà parii tò gwe. Góro pãndenↄ gàańyo.
37Ben zàga'ĩa gbãaa fɛ̀ɛ. Í e góro yĩpayĩpaa èe kaa à guu ai à yezi à pa.
38Yesu kú góro kpɛɛ kpa, èe ii oo à mì di mìbↄkↄa. Ben à ìbanↄ à vù aↄ̃ bènɛ: Dannɛri! Kɛ̀ wée kaatɛɛ, nɛ́ɛ bídi kɛroo?
39Ben à fɛ̀ɛ à gì ĩanɛ à bè ínɛ: Ǹ yĩtɛ! Ǹ zɛ tɛɛɛ! Ben ĩa kpàɛ, guu yĩ̀ kítikiti.
40Ben à ń lá à bè: À kɛ̀ dia á seka vĩ lɛee? Ase á ma náanɛ vĩro ai tiaↄ́?
41Ben aↄ̃ gↄ̃̀ bídi guu, aↄ̃ↄe kↄ̃ lalaa wà bè: Dén gbɛ̃ kɛ̀ ũee? Baa ĩa kↄ̃n ío è à yã mamɛ.
