1Miki tabab Jesus bayay ko machib u to’oben e lipath nu Galile. Ma girdi’ ni mu’ulung ngak ni kar cholngobiyed e ri yad pire’, ma aram me af Jesus nga daken bbowoch ni bay u lan e lipath, me par u daken nga but’; me par fapi girdi’ ni aram urngirad u daken e binaw u dap’e ran.
2Ma bo’or ban’en ni i machibnag ngorad u fithik’ e fanathin, ma nap’an ni be machib nagrad me ga’ar ngorad,
3“Mu telmed! Be’ nib mo’on e yan ni nge wereg awochngin e woldug.
4Ma nap’an ni be wereg fapi awoch nga daken e milay’ me wear boch nga daken wo’en e girdi’ u milay’, me yib e arche’ i kay nge m’ay.
5Ma boch e wear nga daken boch thal i but’ ni bay u daken e war. Ma de n’uw nap’an me tugul, ya dariy e but’ nib dib’ag u daken fapi awoch.
6Ma nap’an ni tolang e yal’ me li’ fapi woldug ni ka fini tugul, ni bochan e de yan lik’ngirad nib to’ar nga fithik’ e but’, ma aram ma de n’uw nap’an me mororoy.
7Ma boch fapi awochngin e woldug e wear nga fithik’ e pan ni bay rachangalen, me ga’ fapi pan ni bay rachangalen nge yabochboch ko fapi woldug nge li’, ma aram ma de k’uf.
8Machane boch fapi awoch e wear nga daken e but’ nib yong’ol, me tugul nge ga’ me k’uf, ni yu kaen e guyey wom’ngin, ma yu kaen e nel’ i ragag, ma yu kaen e ra’ay.”
9Me ga’ar Jesus, “Fa’anra bay telmed ni ngam rung’aged ban’en ngay, me ere mu telmed!”
10Nap’an ni bay Jesus ni go’ ir me yib boch fa pi’in ur motoyilgad ngak ni yad fare ragag nge l’agruw i gachalpen ngarbad ra weniggad ngak Jesus ni nge weliy fan fapi fanathin ngorad.
11Me ga’ar Jesus ngorad, “Gimed e kan weliy ngomed e tin nda nnang ni murung’agen e gagiyeg rok Got. Machane boch e girdi’ e kan machibnag urngin ban’en ngorad u fithik’ e fanathin,
12ni fan e ‘Bay ur changargad, ma dab ra guyed ban’en; ma ngar motoyil ra motoyilgad, ma dab ra nanged fan. Ya fa’an yad ra nang fan, ma sana yad ra pigicheal ngak Got, nge n’ag fan u wan’ e kireb ni kar rin’ed.’”
13Me fith Jesus ngorad ni ga’ar, “Da mu nanged fan e re fanathin ney? Ere ra di’iin mi gimed nang fan urngin e fanathin?
14En nma wereg e awoch e er e en ni be wereg e thin rok Got.
15Ma fapi awoch ni wear nga daken wo’en e girdi’ u milay’ e be yip’ fan e pi’in ni rung’ag e thin rok Got, me yib mo’onyan’ i fek fapi thin rok Got ni kan wereg nga lanin’rad.
16Ma boch e girdi’ e bod e awoch ni wear nga daken bochi thal i but’ ni bay u daken e war. Nap’an ni yugu yad ra rung’ag e thin rok Got nnog ngorad miyad fol riy ni kar felfelan’gad ngay.
17Machane ri de rich nga fithik’ i lanin’rad, ma aram e de par fapi thin rok Got u lanin’rad nib n’uw nap’an. Ma fa’ani yib e gafgow fa togopluw ni bochan e re thin rok Got nem, mra paged yad ni ka chingiyal’ nem.
18Ma boch e girdi’ e yad bod e awoch nni wereg nga fithik’ e pan ni bay rachangalen. Ireray e picha’ nrung’aged e thin rok Got,
19machane bochan e pin’en nma magafan’ e girdi’ ngay ko biney e tamilang, nge chogowen e fel’ rogon, nge urngin mit ban’en ni yad be chogownag ni nge yag ngorad e sugnag lanin’rad nge thang fapi thin rok Got u lanin’rad, ma aram ma dar k’ufgad.
20Machane boch e girdi’ e bod e awoch nni wereg nga daken e but’ nib yong’ol. Nrung’aged e thin rok Got, miyad fol riy miyad k’uf, ni boch i yad e guyey wom’ngin, ma boch i yad e nel’ i ragag wom’ngin, ma boch i yad e ra’ay wom’ngin.”
21Me ul ul Jesus ngay ni ga’ar, “Bay be’ ni ka’a fek ba magal i yib nga naun ni kan abweg meyib i tay nga tan baraba’ i ban’en fa nga tan e bet? Gathi ra tay nga tagil’ e magal?
22Demturug e n’en ni kan mithag ma bay ni fek i yib ngalan e tamilang.
23Fa’anra bay telmed ni ngam rung’aged ban’en ngay, me ere mmotoyilgad!”
24Miki ga’ar ngorad, “Mu uthmed telmed ko tin ni gimed be rung’ag! Ya rogon ni gimed ra turguy ban’en nga daken be’ e ku aram rogon nra turguy Got nga dakenmed, nra pag e fol riy.
25Ya en ni bay ban’en rok e bo’or e bay ni pi’ ngak; ma en ndariy ban’en rok e bay ni fek rok e chu’uw ni bay rok.”
26Miki ga’ar Jesus, “Gagiyeg rok Got e bod be’ ni wereg e awoch u milay’ rok.
27Mi i mol nneap’ ma be od ni rran, ma be tugul fapi awoch ni be ga’ i yan. Machane de nang rogon e n’en ni rin’ me yodorom.
28But’ e ir e ayuweg e woldug nge ga’ nge yib wom’ngin; som’on e mak’uf riy ni ka fini bugor ni kab mererey, ma bin migid e ke m’ug fare muk’uf riy ni polo’ ndawori puf, me migid me puf iman wom’ngin me m’ug wom’ngin ni pire’.
29Ma nap’an ni el fapi wom’ngin ma aram me fek fa’anem e kama rok nge tabab ko maruwel, ya ke taw ngal’an ni ngan th’ab e woldug ngan fek wom’ngin.”
30Me ga’ar Jesus, “Susun e be mang e gadad ra susunnag e gagiyeg rok Got ngay? Fa mang fanathin e ir e gadad ra maruwel ngay nge mang ir e tamilangnag?”
31Bod rogon ba awochngin e mustard, ni ir e th’abi achichig u fithik’ urngin mit e awoch u fayleng. Me fek be’ nge yung;
32ma fa’ani munmun me tugul nge ga’ nge mang ir e th’abi ga’ u fithik’ urngin e woldug. Me yib papa’ngin ni ba ga’, me yib e arche’ ra toyed taferad ko yungi n’en nib tagalul’ u fithik’ i papa’ngin.”
33Mi i machibnag Jesus e thin rok ngak e girdi’ ni i maruwel nga bo’or e fanathin ni bod e tiney, ni i weliy ngorad urngin e tin nrayag ni ngar nanged fan.
34Kemus nu fithik’ e fanathin e i machib ngorad riy; ma ngiyal’ i n’en ni go’ yad pi gachalpen e aram e ngiyal’ nma weliy urngin ban’en ngorad nge puf u wun’rad.
35Chirofen nem nike yan i gonowrug me ga’ar Jesus ngak pi gachalpen, “Mmarow ngdarod nga ba’nem e lipath.”
36Me ere ra paged fapi girdi’ ni aram urngin; me af pi gachalpen Jesus ko fare bowoch ni bay Jesus u lan ngranod. Ma ku bay yugu boch e bowoch u rom.
37Me yib e nifeng nrib gel ngorad ma be t’ar e n’ew ngalan e bowoch, nge chugur i sug e ran u lan e bowoch.
38Ma bay Jesus u p’ebuk’ e bowoch nike mol nike teyey’ ko gayul, miyad pug me lungurad ngak, “Tamchib, mog, dariyfan u wun’um ni gadad ra yim’?”
39Me suwon Jesus me non ko nifeng ni ga’ar, “Mmocha’!” Me ga’ar ngak e n’ew, “Mu gapas!” Me mocha’ e nifeng, me aw e cho’.
40Me ga’ar Jesus ngorad, “Mang ni kam rusgad? Kadawori michan’med ngak Got?”
41Me ri gel e tamdag rorad, me lungurad rorad, “Mini’ e cha’ney? Ni mus ko nifeng nge n’ew ma be fol rok!”
