ማርቆሳ 4

1

2

3

4

5

6

7

8

9

10

11

12

13

14

15

16

¹ዬሱሲ ሺሬቲካ ጋሊላ ኣባ ማታን ታማሪሱዋ ዶሜዳ፤ ጮራ ኣሳይ ባሬ ሚዪያን ዩዪ ኣꬊዴ ሺቂ ኡቲና፥ ኣባን ዴዒያ ዎንጊሪያ ጊዶ ጌሊዴ፥ ኣኒ ኡቴዲኖ፤ ቃሲ ሄ ኣሳይ ኡባይ ኣባ ሚዪያን ዴዔ።

²ኢ ኡንቱንታ ዳሮባ ሌሚሱዋን ታማሪሲዴ፥

³«ሲሲቴ፤ ኢቲ ቢታኒ ዜሬꬃ ዜራናው ኬሴዳ።

⁴ኢ ዜሪሺን፥ ኢቲ ኢቲ ዜሬꬃይ ኦጊያ ዶናን ዎꬌዳ፤ ሄዋ ካፉ ዪዴ ሜዳ።

⁵ኢቲ ኢቲ ዜሬꬃይ ኣንጮ ቢታ ቦላ ዎꬌዳ፤ ዳሮ ቢታይ ባይና ዲራው፥ ሄ ዜሬꬃይ ኤሌካ ሞኬዳ።

⁶ኣዋይ ኬሴዳ ዎዴ ሹሌዳ፤ ኣዱሳ ፃጱዋ ዬዲቤና ዲራው፥ ሜሊ ኣጌዳ።

⁷ኢቲ ኢቲ ዜሬꬃይ ኣጉንꬃ ጊዶን ዎꬌዳ፤ ሄዋን ሞኬዳዋ ኣጉንꬃይ ዲጪዴ ጩሊና፥ ኣይፌናን ኣቴዳ።

⁸ኢቲ ኢቲ ዜሬꬃይ ቱዔ ቢታን ዜሬቲዴ ሞኬዳ፤ ዲጪዴ ኢቱ ሃታሙዋ፥ ኢቱ ኡሱፑን ታሙዋ ኣይፊና፥ ኢቱ ፄቱዋ ኣይፌዳ።»

⁹ቃይካ ዬሱሲ፥ «ሲሳናው ሃይꬃይ ዴዒያ ኡራይ ሲሶ» ያጌዳ።

¹⁰ታማኔ ላዑ ዬሱሳ ካሊያዋንቱኔ ኢ ኦዴዳዋ ሲሴዳ ሃራ ኣሳቱ ኢ ባሬካ ዴዒሺን ኣኮ ሺቂዴ፥ ሄ ሌሚሱዋ ቢሌꬃ ኣ ኦቼዲኖ።

¹¹ዬሱሲ ኡንቱንቱሲ፥ «ሂንቴንቶ ፆሳ ካዉቴꬃ ፁራ ዬዉዋ ኤራይ ኢሜቴዳ፤ ሺን ሃራቱ ካዉቴꬃፔ ካሬና ዴዒያዋንቱ፥ ፄላ ፄሊዴ ቤዔና ማላ፥ ቃሲ ሲሳ ሲሲዲካ ኣኬኬና ማላ፥ ኡንቱንቱ ሺሬቲዴ ፆሳኮ ሲሚና፥ ኢ ኡንቱንቱ ናጋራ ኣቶ ጌና ማላ፥ ኡንቱንቶ ኡባባይ ሌሚሱዋን ኦዴቴ» ያጌዳ።

¹³ዬሱሲ ኡንቱንታ፥ «ሃ ሌሚሱዋ ኤሪኪቴ? ያቲና፥ ሌሚሱዋ ኡባ ዎቲ ኤራኒቴ?

¹⁴ዜሪያዌ ፆሳ ቃላ ዜሬ።

¹⁵ቃላይ ዜሬቲያ ኦጊያ ዶናን ዴዒያዋንቱ ሃዋንታ፤ ኡንቱንቱ ቃላ ሲሲያ ዎዴ፥ ሴፃናይ ኤሌካ ዪዴ፥ ኡንቱንቱ ዎዛናን ዜሬቴዳ ቃላ ኣፊዲጌዳ።

¹⁶ሃዋዳንካ ቃሲ ኣንጮቲያ ቢታን ዜሬቴዳዋንቱ ሃዋንታ፤ ኡንቱንቱ ቃላ ሲሲዴ፥ ኤሌካ ናሼቻን ኣኪኖ።

¹⁷ኡንቱንቱ ሃዒው ዴዒኖፔ ኣቲን፥ ኡንቱንቶ ሚኖ ፃጱ ባዋ፤ ጉዬፔ ቃላ ጋሱዋን ዋዪ ዎይ ዬዴርሱ ዪያ ዎዴ፥ ኡንቱንቱ ኤሌካ ꬉቤቲ ኣጊኖ።

¹⁸ቃሲ ኣጉንꬃ ጊዶን ዜሬቴዳዋንቱ ሃዋንታ፤ ኡንቱንቱ ቃላ ሲሲያዋንታ።

¹⁹ሺን ሃ ሳዓ ዴዖ ሂርጊያዌ ዱሬቴꬃ ዶሲያዌኔ ሃራባ ኣሞቲያዌ ኡንቱንቱ ዎዛናን ጌሊዴ፥ ቃላ ጩሊና ኣይፌናን ኣቲ ኣጌዳ።

²⁰ሺን ቱዔ ቢታን ዜሬቴዳዋንቱ ቃላ ሲሲዴ ኣኪያዋንታ፤ ኢቱ ሃታሙዋ፥ ኢቱ ኡሱፑን ታሙዋ ኣይፊና፥ ኢቱ ፄቱዋ ኣይፌዳ» ያጌዳ።

²¹ዬሱሲ ጉጂዴ፥ «ፆምፒያ ኣሂዴ፥ ጊላፔ ዎይ ኣርሳፔ ጋርሳና ዎꬂያ ኣሳይ ዴዒ? ꬎቃሳን ዎꬄኔ?

²²ኣዪሲ ጎፔ፥ ቆሴዳባይ ኡባይ ቆንጪያ ኬሳናዋ፤ ቃሲ ጌማን ዎꬄዳባይ ኡባይ ቤቴናን ኣቴና።

²³ሲሳናው ሃይꬃይ ዴዒያ ኡራይ ዴዖፔ ሲሶ» ያጌዳ።

²⁴ቃሲካ ኡንቱንታ፥ «ሂንቴንቱ ሲሲያዋ ኣኬኪዴ ሲሲቴ፤ ፆሳይ ሂንቴ ማኬዳ ቁንዓን ሂንቴንቶ ማካናዋ። ኢ ሂንቴንቶ ዳሪሲዴ ኢማና፤

²⁵ዴዒያ ኡራው ጉጂ ኢማና፤ ባይናዋፔ ሃራይ ኣቶ፥ ኣው ዴዒያ ሄ ጉꬃቶካ ኣኪዲጋና» ያጌዳ።

²⁶ዬሱሲ ቃሲካ፥ «ፆሳ ካዉቴꬃይ ጋዴን ካꬃ ዜሪያ ኣሳ ማላ።

²⁷ሄ ቢታኒ ቃማ ጌሚዒሼ፤ ጉራ ዴንዴ፤ ኢ ባሬ ሁጴው ዋኒንቶ ኤሬናን፥ ሄ ዜሬꬃይ ሞኬኔ ዲጬ።

²⁸ቢታይ ካꬃ ባሬካ ሞኬኔ ኣይፌ፤ ኮይሮ ጫርሻይ ጫሬ፤ ጉዬፔ ኣይፋናው ኩኩሜ፤ ቃሲ ዉርሴꬃን ኩሜንꬃ ኣይፊያ ኣይፌ።

²⁹ሺን ካꬃይ ጋኪያ ዎዴ፥ ካꬃ ሺሺያ ዎዲ ጋኬዳ ዲራው፥ ቢታኒ ኤሌካ ባጫን ጫኩዋ ጌሊ ኣጌዳ» ያጌዳ።

³⁰ዬሱሲ፥ «ኑኒ ፆሳ ካዉቴꬃ ኣያ ማላቴ ጋኔ? ዎይ ኣያና ሌሚሳኔ?

³¹ፆሳ ካዉቴꬃይ ሳናፊጪያ ኣይፋቶ ማላቴ። ሄ ኣይፋታ ዜሪያ ዎዴ፥ ሳዓን ዴዒያ ሚꬃ ኣይፊያ ኡባፔካ ጉፃው፤

³²ሄኖ ዜሪና ሞካዴ ሃራ ኣታኪልቲያ ኡባፔ ዳራው፤ ዳሮ ዳሻ ዳሻው። ካፉ ኢዚ ቃንካ ኩዋን ጎሊያ ኬፃና ዳንዳዬ» ያጌዳ።

³³ዬሱሲ ሃዋ ማላ ዳሮ ሌሚሱዋን ኣሳይ ሲሳናው ዳንዳዪያዋ ኬና፥ ባሬ ቃላ ኦዴዳ።

³⁴ኣሳው ሌሚሱ ባይናን ኦዴና፤ ሺን ዬሱሲ ባሬና ካሊያዋንቱ ፃላላና ዴዒያ ዎዴ፥ ኡንቱንቶ ኡባባ ቢሊዴ ኦዴ።

³⁵ሄ ጋላሲ ሳዓይ ኦማርሲና፥ ዬሱሲ ባሬና ካሊያዋንታ «ኣባፔ ሄፊንꬃ ፒኖይቴ» ያጌዳ።

³⁶ኣ ካሊያዋንቱ ኣሳ ኣጊዴ፥ ዬሱሲ ካሴ ጌሊ ኡቴዳ ዎንጊሪያን ጌሊዴ፥ ዬሱሳ ባሬንቱና ኣፌዲኖ፤ ሃራ ዎንጊራቱካ ሄዋን ዴዒኖ።

³⁷ዎልቃማ ጎቱ ዴንዲና፥ ቤታይ ዎንጊሪያ ሾጪና፥ ሃꬃይ ኩማና ጋካናው ዎንጊሪያ ጊዶ ጌሌዳ።

³⁸ሄ ዎዴ ዬሱሲ ዎንጊሪያን ጉዬ ባጋና ቦርኮꬃ ቦርኮቲዴ ጌሚዒሼዳ። ዬሱሳ ካሊያዋንቱ ኣ ዴንꬂዴ፥ «ታማሪሲያዎ፥ ኑኒ ꬋዪያ ዎዴ ጮዑ ጋዴ ፄላይ?» ያጌዲኖ።

³⁹ኢ ቤጎቲዴ ጎቱዋ፥ «ጮዑ ጋ» ጊዴ፥ ኣባካ፥ «ዎፑ ጋ» ጌዳ፤ ጎቱካ ጮዑ ጊና፥ ኡባባይካ ዎፑ ጌዳ።

⁴⁰ዬሱሲ ባሬና ካሊያዋንታ «ኣዪሲ ሃዋዳን ያዪቴ? ሂንቴንቱ ዋኒ ኣማኒኪቴ?» ያጌዳ።

⁴¹ኡንቱንቱ ዳሮ ያዪዴ ባሬንቱ ጊዶን፥ «ሃዌ ላ ሃራይ ኣቶ፥ ጎቱኔ ኣባይ ኣዛዜቲያዌ ኦኔ?» ያጌዲኖ።