1Tedib welt mndelo Jesús mloo Jesús lo naroob men roo nitdoo, tak kwathoz zha mkaltaa roo nitdoo, tsa mke Jesús leen thib kano, ne mndob Jesús leene lo nitdoo. Ne lee re men mrin roo nitdoo.
2Tsa mloo Jesús tyen kuu lo re men kon diiz nanzee. Ne nzhab Jesús:
3―Kenza goo kwent kuu tan lo goo. Thib welt lee thib zha mroo ndalo bin.
4Leettsa ngego zha bin, thib nete mla roo net, ne myaad re min ndowe.
5Tedib nete mla xid ke, ta lut yu nzo. Ne neyta mlene tak lut yu nzib ditse.
6Per leettsa mla be, tee mgole ne mbize tak yent naroob lozhe.
7Tedib nete mla xid yits, ne lee yits mzhen ne mluux yitse, ta mod mndaate xle.
8Per lee tedib nete mla lo yu naal, mlene ne mzhene ne mndaay xle. Thib nete mndaa galbtsii bin por thibka bin, lee tedib nete mndaa tson gale, ne lee tedib nete mndaa thib gayooy. Tbaa nak kwent.
9Ne nzhab Jesús: ―¡Os lee goo ndob nza goo, ndoblo yen goo koree!
10Leettsa myaan Jesús kon re tsiibchop zha kuu ngeteed lo Jesús, lee chop tson zha kuu nzi gax mnaabdiz lo Jesús, naa xomod nak kwent kuu mndaa Jesús.
11Tsa nzhab Jesús: ―Diox mzhyal ne goo naa xomod nak re kuu nzogaats kuu nak chaan Diox, tsa ne goo xomod nabee Diox. Per lee lo re zha kuu nlaazt teke ditsʼn, pur diiz nanzee nin lo zha.
12Tegal wii zhay ne yent zha kuu ngwii zha, ne tegal gon zhay per yent zhay, ta mod nyent zha xkiiz Diox ne nyelaazt zhay, tsa tuyyt Diox re falt zha.
13Tsa nzhab Jesús lo re zha: ―¿Os nyent goo koree? ¿Xomod yen goo tedib nete?
14Lee zha kuu ngoo bin nak taxal thib zha kuu ndaa kwent xkiiz Diox.
15Thib net men nak taxal bin kuu mla roo net. Leettsa nzhon zha xkiiz Diox, tsa nyaad Maxuuy nkib xkiiz Diox leettsoo zha, taxal nak bin kuu ndow min roo net.
16Tedib net zha nak taxal bin kuu mla xid ke, kwathoz wen nyoo leettsoo zha or nzhon zha xkiiz Diox.
17Re zhaʼa nak taxal thib ya kuu yent lozh, ta mod nxegt zha, ne leettsa nzin thib yalti lo zha o ndreke zha dits zha, tak nyelaaz zha Diox, tsa tee nlaa zha Diox.
18Tedib net zha nak taxal bin kuu mla xid yits, nzhon zha xkiiz Diox,
19per kwathoz ntsow zha xgab re kuu yezlyu ree, ndablaaz zha temi, ne reta kwaa yezlyu ree, kona nak kuu nkedi zha, re koree nluux xkiiz Diox leettsoo zha. Re zhaʼa nak taxal ya kuu ndaat xle.
20Per lee re zha kuu nak taxal bin kuu mla lo yu naal. Nzhon zha xkiiz Diox, ne nkayaa zhay kon dib ndroo leettsoo zha, re zhaʼa nak taxal bin kuu mndaa galbtsii bin por thibka bin, taxal bin kuu mndaa tson gal bin ne taxal bin kuu mndaa gayoo bin.
21Noga nzhab Jesús: ―Neeka thib zha nkeet thib kandil ne ntow zhay kon thib zhibey, o ngoo zhay xann luun, sinke lee zha ntobe thib ta ya ndab, tsa nteniy.
22Tak yent thib kuu nagaats kuu loot, ne yent thib kuu xlaan kuu net men.
23¡Os lee goo ndob nza goo ndoblo yen goo koree!
24Noga nzhab Jesús: ―Wen kenza goo reta kuu nin. Leeka taxal ntsow goo lo re taben goo, tataka rid goo, ne asta masraa kuu rid goo.
25Tak lee zha kuu nap kwaa, masraay kayaa zha, per lee zha kuu yent kuu nap, asta lut kuu nap zha teyiibe lo zha.
26Noga nzhab Jesús: ―Nalor tan tedib kwent, tsa ne goo xomod nak leettsa nabee Diox leettsoo men, leey nak taxal thib bin kuu ngo zha lo yu.
27Tegal nzhat zha o naxna zha, tse ne yaal lee bin nlen ne nzhen, per net zha naa xomod nzhene.
28Leeka yezlyu nxeene. Ner nlen kottse, tsaraa nziib gatte, nla doy, nziib kwate ne nla yattse.
29Ne bluz leettsa nzhatslay, tsa nthop zhay, tak mzina wiz dope. Tbaa nak kwent.
30Noga nzhab Jesús: ―Nal tan tedib kwent lo goo, tsa ne goo xomod nak leettsa nabee Diox leettsoo men.
31Leey nak taxal thib mbiz mostaz, mbiz mostaz nak thib mbiz kuu mas lut lo re mbiz kuu nzhann men.
32Leettsa nyelo nzhann mene, nlene nzhene ne nziib tyen zhite, ne ndaay xkal, ne asta ndyaad re min ndexkwaa lyaat loy. Tbaa nak kwent.
33Kon tyen kwent nanzee mloo Jesús xkiiz Diox lo re men. Tata mni Jesús lo re men asta plotha kuu takta yen re mene.
34Leettsa ni Jesús lo re men pur nanzee ni Jesús, per leettsa nyaan Jesús kon re zha kuu ngeteed lo Jesús, tsaraa nambi ni Jesús lo re zha.
35Leeka wiza or mbix wiz, tsa nzhab Jesús lo re zha kuu ngeteed lo Jesús: ―Nda goo reʼaa tedib lad roo nitdoo.
36Tsa mlaa re zha reta men kuu nzi tya, ne mkendab re zha leen kano kuu ndob Jesús. Ne noga nzi techop tson kano tya.
37Ne leettsa nda re zha lo nitdoo, tsa mndelo ngoth thib mbi thoz lo nitdoo, ne mndelo mbi mchop mbi kano, ne asta ndaab nit leen kano.
38Ne lee Jesús naxat par ya xann kano, ne mtob Jesús thib xkoog Jesús yek Jesús. Tsa lee re zha kuu ngeteed lo Jesús mloo mkaal lo Jesús, ne nzhab re zha: ―Maestr, ¿chu ndat leettsooʼa mer lowgwaa leen nitdoo?
39Oraaka ngwache Jesús ne mkox mbi ne nitdoo lo Jesús, ne nzhab Jesús: ―¡Keeta bi! ¡Zheta gok! Ne lee nitdoo zheta ngok.
40Tsa nzhab Jesús lo re zha kuu ngeteed lo Jesús: ―¿Chebee kwathoz nzeb goo? ¿Chu ntsow goo xgab lee Diox nkenapt goo?
41Kwathoz mzegey leettsoo re zha ne kwathoz mzeb zha, ne nzhab zha lo re altaa zha: ―¿Cho nak zha ree? ¿Chebee asta mbi ne nitdoo nzhon diiz lo zha?
