Maka 4

1

2

3

4

5

6

7

8

9

10

11

12

13

14

15

16

¹Mo hande ikali leke tea꞉na꞉ hata꞉ Yesuma꞉ pi pa waleekeme. Wanda꞉hali wopu a꞉pa ipiki pa꞉ta꞉ mombelemekeme. Koto ekina꞉ wanda꞉hali paeyao ikali tea꞉na꞉ haena꞉ Yesuta꞉ ikali pa꞉ta꞉ wieke palai kawaso homekena꞉ pua pitiekeme.

²Kutupa ipikana꞉ma꞉ iki pa꞉ta꞉ onkoluma꞉ laa pimanu wotu waleekeme. Pi walolo hata꞉ alota꞉

³Opua꞉pe. Hali ma꞉nda꞉ma꞉ wae alemanu tandeloluekema꞉ peekeme.

⁴Kutupa tandela꞉tiki pulu haena꞉ mandane wae manuta꞉ pota꞉na꞉ lopa꞉ lopa꞉ pieke ekita꞉ ba titima꞉ a꞉pa talopu nemekeme laata꞉

⁵Mandane wae manuta꞉ toopimanu manda taleeke kenke sikina꞉ lopeekeme. Koto wae sunu koto kone opeekepate kenke hosiki siki taleekeeki yaalo hata꞉

⁶nate talo hata꞉ piki lopaapeke na yaalo pou ta hapiekeme

⁷Mandane wae manuta꞉ tekeke hake ale polu pa꞉ta꞉manu lopeekeme. Kutupa mo tekeke hake alemanu opa꞉liaaso hande wae alemanu opolo pieke ekita꞉ tumbuaeyekeme. Kutu pieke ekima꞉ kiliki na a꞉eyekeme.

⁸Kutu piekepate mandane wae ale manuta꞉ epeke kenkena꞉ lopeekeeki patela opa꞉liaota꞉ napeke wiekeeki manuta꞉ dupae. Mandaneeki 30 tupa꞉ mandaneeki 60 tupa꞉ mandaneeki 100 tupa꞉ wiekeme leekeme.

⁹Kutupa Yesuma꞉ alota꞉ Katake lomba꞉la꞉ halima꞉ wotu opina꞉e leekeme.

¹⁰Ipika꞉ honu make haena꞉ wanda꞉hali pemeke naneta꞉ ipiki teke pa꞉ta꞉ haemeke wanda꞉halima꞉ hande 12 haliweki ame̱le̱ make Yesu pa꞉ta꞉ ipika꞉ onkoluma꞉ leeke ekina꞉ lota꞉ pimikime.

¹¹Ipikana꞉ma꞉ iki pa꞉ta꞉ alota꞉ Ikana꞉ma꞉ Koda꞉na꞉ Kilu Tombuao Hala꞉eki a꞉mbaala꞉ ekimanu handilimikie. Pate pa hao haleme wanda꞉hali pa꞉ta꞉ta꞉ onkoluma꞉ ala꞉ ekimanu homeke opilimikie.

¹²Handena꞉yeke onkoluma꞉manu la꞉la꞉pate handa꞉ wina꞉yeke na la꞉la꞉me. Opina꞉yeke onkoluma꞉ pimanu la꞉la꞉pate ota꞉ hone wina꞉yeke na la꞉la꞉me. Opimika꞉na꞉ yoluta꞉ hone ma꞉nda꞉ la꞉ka꞉la꞉ mina wimika꞉na꞉ta꞉ ika꞉ hoke hau paeyaalo pia꞉me leekeme.

¹³Kutupa Yesuma꞉ iki pa꞉ta꞉ alota꞉ Do onkoluma꞉ alo ekita꞉ ikana꞉ma꞉ hone na witelemepe. Kota꞉ do alo ekita꞉ hone na wimika꞉na꞉ta꞉ onkoluma꞉ aloeki paeyao ekipa hone wilimikipe leekeme.

¹⁴Hande wae alemanu tandeleeke halima꞉ Koda꞉na꞉ pi alemanu tandelo hala꞉me leekeme.

¹⁵Mo hande pota꞉na꞉ haleme wanda꞉hali pa꞉ta꞉ pi alemanu lopa꞉ lopa꞉ pu hala꞉me. Kutupa opitolo haena꞉ kone mo tandeleeke pi ale manuta꞉ Sadanima꞉ koto kone a꞉pa yoka꞉ mea pu hala꞉me.

¹⁶Mandane wanda꞉halita꞉ toopi manda taleeke kenke sikina꞉ lopa꞉niaasa꞉ wae ale manuma꞉ handelememe. Pi opuelemepate koto kone ta꞉na꞉ma꞉ homolo hata꞉ minelemepate wopu na mendiaake hosiki hao kutupa ka꞉nda꞉ma꞉ homa꞉la꞉eki make a꞉nda꞉ lita꞉la꞉eki make koto pi alena꞉ epea꞉ka꞉na꞉ta꞉ koto kone lopo halememe leekeme.

¹⁸Mandane wanda꞉halita꞉ mo tekeke hapeleke ale polu pa꞉ta꞉ tandeleeke wae ale manuma꞉ handelememe leekeme. Mo hande pi alemanu opitelemepate

¹⁹kenke hau hone wita꞉la꞉eki manuma꞉ hamoko alemanu pa꞉ta꞉ ta꞉na꞉ homa꞉la꞉eki manuma꞉ mandane alemanu pa꞉ta꞉ we pamba꞉la꞉eki manuma꞉ mo hande pi alemanu da꞉ka꞉pa꞉ miniki pita꞉ka꞉na꞉ta꞉ napeke na u halememe leekeme.

²⁰Kutu pitelemepate mandane wanda꞉halita꞉ epeke kenke seliapona꞉ lopeekeeki manuma꞉ handelememe laa pi alemanu opua meata꞉ kutupa napeke a꞉eyo halememe leekeme. Mandaneeki 30 tupa꞉ mandaneeki 60 tupa꞉ mandaneeki 100 tupa꞉ a꞉eyo halememe leekeme.

²¹Kutupa Yesuma꞉ iki pa꞉ta꞉ lota꞉ pitolo alota꞉ Ola꞉pake mea epemeka꞉na꞉ta꞉ disi tieke oto pa꞉ta꞉ wilimikipe o bedi tokele pa꞉ta꞉ wilimikipe. Dia꞉me. Manda keo u halememe leekeme.

²²Kutupa panka꞉ wilimieki manuta꞉ ma꞉nda꞉ma꞉ walena꞉yeke panka꞉ wilimime. A꞉mbao wilimieki manuta꞉ ma꞉nda꞉ma꞉ ka꞉la꞉pena꞉yeke a꞉mbao wilimime leekeme.

²³Katake lomba꞉la꞉ halima꞉ wotu opina꞉e leekeme.

²⁴Kutupa Yesuma꞉ iki pa꞉ta꞉ alota꞉ Mo opiteleme ekimanu hone wopu wia꞉pa꞉peke. Ikana꞉ma꞉ haleme tupa꞉ kone koto ana꞉na꞉ paa milimikie. Kutupa pa haka꞉ta꞉pao mandane ekimanu make milimikie leekeme.

²⁵Ala꞉ta꞉ ala꞉ta꞉ wia hala꞉ halima꞉ mandane ekimanu make haka꞉ta꞉pao milieke leekeme. Ala꞉ta꞉ ala꞉ta꞉ na wia hala꞉ halima꞉ta꞉ ala꞉ta꞉ ma꞉nda꞉ na milieke. Ipika꞉ wia hala꞉eki kone mata꞉lieke leekeme.

²⁶Kutupa Yesuma꞉ alota꞉ Koda꞉na꞉ Kilu Tombuao Hala꞉eki dupae. Hali ma꞉nda꞉ma꞉ wae alemanu kenkena꞉ tandeleekeme.

²⁷Kutupa timba꞉ leeke pelia꞉tiki da ka꞉la꞉peeke tiatiki piekeme. Kutupa hande wae alemanu patela opa꞉liaeyekeme. Opa꞉liao pieke ekita꞉ ekipa opa꞉la꞉pe mo halita꞉ mateekeme.

²⁸Wae ale manuta꞉ kenkema꞉ peaaseke handaa wae ale opo halememe. Katake titina꞉ amba꞉la꞉ ka꞉la꞉paata꞉ wetepena꞉ honke pankaata꞉ kutupa napeke panka tumba꞉ wilieke leekeme.

²⁹Kutu piliepate napeke naa pia꞉ka꞉na꞉ta꞉ koto kone kepetema꞉ poka꞉mepi pilieke. Mo naa pita꞉la꞉ dina꞉ ya꞉leke handaa milieke leekeme.

³⁰Kutupa Yesuma꞉ alota꞉ Koda꞉na꞉ Kilu Tombuao Hala꞉ ekita꞉ alekema꞉ handena꞉ loluma꞉pe o eki onkoluma꞉ loluma꞉pe leekeme.

³¹Ipikita꞉ masidadi wae ale sikima꞉ handa꞉la꞉me leekeme. Mo wae alesiki ota꞉ hosiki alesiki ya꞉la꞉pate

³²kenkena꞉ nokepea꞉ka꞉na꞉ta꞉ opa꞉liaota꞉ beli ponda꞉pa ota꞉ tieke halieke laa kutupa paleke paleke tiekemanu pilia꞉ka꞉na꞉ kotota꞉ ba titima꞉ katake tu̱ pa꞉ta꞉ a꞉pa dake hapeke ya꞉la꞉me leekeme.

³³Kutupiki onkoluma꞉manu Yesuma꞉ iki pa꞉ta꞉ waleeke ekita꞉ opuma homaena꞉ leekeme.

³⁴Onkoluma꞉manu pi waleekepate pi ma꞉nda꞉ na waleke ipika꞉ disaipolo haliweki pa꞉ta꞉ homeke pi tekemanu la haleekeme.

³⁵Koto onkoluma꞉ leeke natena꞉ welealo nane Yesuma꞉ iki pa꞉ta꞉ alota꞉ Nikita꞉ do ikali tunkula mo tea꞉ nane pomana꞉e leekeme.

³⁶Kutupa wanda꞉hali mina꞉pa꞉lao Yesuta꞉ mo kawaso pa꞉ta꞉ pitieke tupa꞉ pita꞉ pelia haena꞉ haliwekima꞉ mea pemekeme. Kawaso mandane ekimanu make tonka꞉na꞉ apa꞉tao pemekeme.

³⁷Po tilipu tieke epeekeme. Kutupa ikali ho a꞉meiya mo kawaso litolo hata꞉ ikali pambo tumbiekeme. Koto ekina꞉ mo kawasona꞉ ikalima꞉ amba꞉ tumbuluekema꞉ dodo piekeme.

³⁸Kutu piekepate Yesuta꞉ kawaso mendeke nane pita ka꞉nda꞉ lia peliekeme. Haliwekima꞉ Yesu mea tiao ipiki pa꞉ta꞉ alota꞉ Disao. Niki homoluma꞉ma꞉ hone na witelepe lemekeme.

³⁹Yesuma꞉ tiao mo po tilipu pa꞉ta꞉ make mo ikali pa꞉ta꞉ make pi alo hata꞉ alota꞉ Pae. Tunkulie leekeme. Po tilipu tunkula ikali la꞉ma꞉ la꞉ma꞉ na piki pa wiekeme.

⁴⁰Kutupa ipikana꞉ma꞉ iki pa꞉ta꞉ alota꞉ Alekena꞉ paala꞉ma꞉ homelemepe. Ikita꞉ Koda꞉ pa꞉ta꞉ hone na tulaasemepe leekeme.

⁴¹Mo disaipolo haliwekima꞉ penkilipa꞉tia pomua ika꞉ ika꞉ kone pi lemekeeki dupa. Do halita꞉ epi ya꞉ka꞉ta꞉pe. Po tilipuma꞉ make ikalima꞉ make ipika꞉ pi opua tunkulia꞉me lemekeme.