Luka 8:3-18

³e Jovana (manušnji e Huzašći e Herodošće upravitelješći), e Susana, thaj but aver save pomožisardine e Isuse thaj e dešudujen apostolen pire lovenca thaj okoleja so saslena.

⁴A kana ćidape o but them thaj avenas andar sa e gava ko Isus, vo phendas lenđe ande paramiči:

⁵“Inkljisto o sijači te sijol o seme. Dok sijolas, varesavo seme pelo po drom, thaj o them uštadale a e čiriknja aviline thaj halineles.

⁶Aver pelo po bar, thaj tek so inkljisto, šućilo kaj nasle vlaga.

⁷Aver palem pelo maškar e kangre, thaj e kangre tasadinele sar barjonas zajedno lesa.

⁸Aver palem napokon pelo pe lačhi phuv, niknosarda thaj bijanda šeldrom majbut.” Phendas godova thaj čhuta muj: “Putaren tumare kan te svatisaren so ašundine!”

⁹E učenikurja phučlinele e Isuse so phenel godoja paramiči.

¹⁰A vo phendas lenđe: “Tumen o Del dijas gođi te džanen e tajne e Devlešće carstvošće, a averenđe si dino samo ande paramiča, kaj ando Sveto lil ačhel ramome: 'te vi ako dićhen či primetisaren, te vi ako čhon kan a či haćaren.'

¹¹A akaja paramiči phenel: “O seme si sago o alav e Devlesko.

¹²Okova seme savo pelo po drom si sago e manuša save ašunen o alav ali avel o beng thaj inđarel o alav e Devlesko andar lenđe ile te na paćan thaj te či spasinpe.

¹³A okova seme savo pelo po bar godola si sago okola manuša save kana ašunen, bahtasa primin o alav, ali si sago e biljke koreno najlen. Godola varesošći vrjama paćan, a kana aven e kušnje von peren.

¹⁴A okova seme savo pelo ande kangre si sago e manuša save ašunen o alav ali još pe lengo drom e trajošće brige tasavenlen, e barvalipeja thaj akale trajošće nasladenca thaj či anen lačho plodo.

¹⁵Okova seme savo pelo pe laćhi phuv si sago e manuša save ašunen o alav thaj inćarenle ando lačho thaj plemenito ilo thaj ustraisaren dok či anen plodo.”

¹⁶“Khonikal kana del jag o stenko či čholes talo čaro niti talo kreveto, nego čhonles po stalko, te dićhen o svetlo okola save den andre.

¹⁷Gajda vi sa so si garado thaj ćerdo tajno avela sikado javno thaj inkljela po videlo.

¹⁸Len sama sar ašunen, kaj kas si haćaripe delape lešće, a kas naj haćaripe, lelape lešće vi kova so gndil kaj sile.”