Lucas 8:3-18

³ri Juana rixoqil rachi Chuza ri aj wach re rubꞌitaq re ri Rey Herodes, ri Susana kukꞌ jujun chik ixoqibꞌ kakinimaj ri Jesús rukꞌ taq rubꞌitaq ke.

⁴Kꞌo jun qꞌij lik e kꞌi ri winaq xebꞌel lo pa taq tinamit y xkimol kibꞌ rukꞌ ri Jesús. Ekꞌuchiriꞌ, ri Jesús xujeq kakꞌutun chikiwach rukꞌ taq kꞌambꞌal naꞌoj, jewaꞌ xubꞌiꞌij:

⁵«Julaj jun awanel xel bꞌi che rawaxik ri rijaꞌ. Ekꞌuchiriꞌ katajin che ujopopexik rijaꞌ, kꞌo xtzaq kan chuchiꞌ ri bꞌe. Y waꞌ xyiqꞌ uwiꞌ kuma ri kebꞌikꞌowik y xtij bꞌi kuma taq ri tzꞌikin.

⁶»Kꞌo ijaꞌ xtzaq kan pa taq abꞌaj; yey echiriꞌ xel loq, xchaqijik ma na kamuꞌmut ta ruxeꞌ.

⁷»Kꞌo ijaꞌ xtzaq kan pa taq kꞌiix. Ekꞌu riꞌ waꞌ xkꞌiy junam rukꞌ ri kꞌiix, pero xjiqꞌ kan chuxeꞌ ri kꞌiix.

⁸»Noꞌj kꞌo xtzaq kan pa chomilaj ulew. Ekꞌu riꞌ waꞌ, echiriꞌ xkꞌiyik, lik xuꞌan reqaꞌn; chujujunal raqan xel jun ciento che» xchaꞌ. Tekꞌuchiriꞌ, lik ko xchꞌaw ri Jesús, jewaꞌ xubꞌiꞌij: «China kꞌu ri kꞌo utanibꞌal che utayik, ¡chuta kꞌu riꞌ!» xchaꞌ.

⁹Tekꞌuchiriꞌ, rutijoꞌn xkitzꞌonoj che: —¿Saꞌ keꞌelawi wa kꞌambꞌal naꞌoj? —xechaꞌ.

¹⁰Ri Jesús xubꞌiꞌij chike: «Chiwe riꞌix yaꞌtalik kaqꞌalajisax runaꞌoj ri Dios chwi rutaqanik. Noꞌj chike ri winaq, kankꞌut xew rukꞌ kꞌambꞌal naꞌoj. Ma tobꞌ rike ketzuꞌnik, e junam rukꞌ na ketzuꞌn taj; tobꞌ ketanik, e junam rukꞌ na ketan taj y e riꞌ na jinta kꞌo kakimaj usukꞌ.

¹¹»Woꞌora kanqꞌalajisaj chiwe saꞌ keꞌelawi wa kꞌambꞌal naꞌoj. Rijaꞌ e Ruchꞌaꞌtem ri Dios.

¹²»Ri xtzaq kan chuchiꞌ ri bꞌe, e pachaꞌ ri tikawex kakita Ruchꞌaꞌtem ri Dios, pero kakꞌun lo ritzel winaq y karesaj waꞌ pa kanimaꞌ chaꞌ na kakikoj taj y na kekolobꞌetaj ta kꞌu riꞌ.

¹³»Ri xtzaq kan pa taq abꞌaj, e pachaꞌ ri tikawex kakita Ruchꞌaꞌtem ri Dios y kakikꞌul rukꞌ kiꞌkotemal; noꞌj na e tikil ta chi utz. Kakikoj kꞌu Ruchꞌaꞌtem xa kebꞌ oxibꞌ qꞌij; yey echiriꞌ kakꞌun lo kꞌambꞌal kipa, kakesaj bꞌi kibꞌ chirij ri Dios.

¹⁴»Ri xtzaq kan pa taq kꞌiix, e pachaꞌ ri tikawex kakita Ruchꞌaꞌtem ri Dios, yey na kakiꞌan taj saꞌ ri kubꞌiꞌij. Kokꞌil kꞌu riꞌ kasach uwach Ruchꞌaꞌtem ri Dios kꞌo pa kanimaꞌ ruma rubꞌis kikꞌuꞌx, ri kibꞌeyomalil y ruqusil ruwachulew; y na chom ta kꞌu riꞌ ri kilitaj che ri kibꞌinik.

¹⁵»Noꞌj ri xtzaq kan pa chomilaj ulew, e pachaꞌ ri tikawex kakikꞌul pa saqil wi Ruchꞌaꞌtem ri Dios y rukꞌ ronoje kikꞌuꞌx kakikꞌol pa kanimaꞌ. Lik chom kꞌu riꞌ ri kilitaj che ri kibꞌinik.

¹⁶»Na jinta junoq kutzij juna aqꞌ y kuchꞌuq uwiꞌ rukꞌ juna mulul re pajbꞌal o kujuꞌ chuxeꞌ ruwarabꞌal. Ma ri kuꞌan che, e kuya lo chupa rukꞌolibꞌal chikaj chaꞌ jelaꞌ kutzij kiwiꞌ ri kebꞌok bꞌi.

¹⁷Ma kopon ri qꞌij echiriꞌ janipa ri na qꞌalajisam taj, kaqꞌalajisax na; yey janipa ri ewatalik, ketaꞌmaxik.

¹⁸E uwariꞌche chita chi utz janipa ri kambꞌiꞌij chiwe; ma china ri kukꞌul chi utz janipa ri kakꞌut chwach, riꞌ kakꞌut ne más chwach y jekꞌulaꞌ kumaj más. Yey china ri na kukꞌul ta ri kakꞌut chwach, riꞌ kamaj ne che janipa ri kuchꞌobꞌo umajom chi usukꞌ» xcha ri Jesús.