Luka 8:3-18

³Eo, Ioana Kusa monena, Heroda ena numa tauitawataina, maena Susana, eo sisine gamagaridi hinage, edi ginauri se mosemosedi ia arinai, ia se taubigai.

⁴Hari eanua, hari eanua, tataodi gamagaridi se tupagogoma ia arinai, parabole esau abo i heribadi:

⁵“Tuma tauhesuhesuruna ie lau sitona tumana i hesuruauri: ma hesuhesuruna, na headi se beu eda gegesina eai; aedi eai se ututawatawaidi, malagaibu manudi abo se aidi.

⁶Headi se beu malatetepari eai; abo se ini, se wowoea, paana ede tano nige ie buta.

⁷Headi se beu lagau nurinuri boeadi eai; maedi lagau nurinuri se iniesega, se initawatawai.

⁸Headi hinage tano lolona eai se beu, se ini, abo se ua aiaidi tatao‐haligigi‐se‐mate se toredi.” Teina riba i ribalautom, i eoga, i ene, “Ia beana eai i ataiei, abo i ataieididini.”

⁹Ena heaheatayao se oimurilau ia arinai, si ene, “Teina parabole ta aniona saha?”

¹⁰Ia i ene, “Omi Eaubada ena basileia riba eamuyamuidi au nuatuidi: na isi aridi eai mo parabole se ribaedi; se itaita taba nige se ita, eo se ataiei taba nige se nuatui.

¹¹Parabole wa ia ede ina: tuma wa ia ede Eaubada ena riba.

¹²Isi eda gegesina eai wa, isi ede tauataiena: diabolo abo i laoma, riba wa nuaboeadi eai i abihaidi i laedi, ata se sunumaei eo ata se mauri.

¹³Isi malatetepari eai wa, isi ede tauataiena, riba wa se abi ma kodedi; isi nige lamdi, huia kuukuu mo se sunumaei, noho se hearo abo se beu.

¹⁴Isi se beu lagau nurinuri boeadi eai isi ede riba wa tauataiena, abo se lau, teina mauri ta modemodedi eo ginauridi eo abakodedi se tubutawatawai, aiai lolodi nige se toredi.

¹⁵Isi tano lolona eai wa, isi ede, ma nualolodi, eo ma nuaduduraidi, riba wa se ataiei, abo se sogohididini, eo aiaidi se toredi ma nuapaipaidi.

¹⁶Taba nige tau esau lamepa i healasi, abo lasi esau arinai i hebuitawai, e i tore abaeno ubuna eai; na lamepa ena aba ota eai wa ie tore, isi se awasaema marana bena se ita.

¹⁷Riba se ribayamuyamui, abo i masaraha; eo ginauri esau se tautauyamui, abo se wasawasaei, eo se hemasaraha.

¹⁸Temeta mo au ataiwataikomakomani; paana ia i abi enana abo se mosei; ia hinage nige i abi, enana begana i nuatui bena i abi wa, abo se abiuioi.”