Lucas 8:3-18

³aw si Juana sìyan esawa i Cusa sebad opisyal i Herod, aw si Susana, aw medita heman se doma. Se menge bayi sìyan, yan se migtabang ki Jesus aw menge doma din.

⁴Gayed dimoton ki Jesus se menge otaw lekat te kedita te lonsod. Pegketipon te ontò medita otaw, mig-indan si Jesus te tegdeyanan, kagi din,

⁵“Doen otaw dimoton te pawà amon menabog te benì, so yan se ketanem te pegpenanem din. Pegsabog din, doen benì nesabog diyà te dalan, aw negìtan iyan te otaw aw kinaen te menge manok te kebenesan.

⁶Doen heman benì nesabog diyà te tanà kebeto-betowan. Pegtobò niyan, nelanes aw nematay te wedà kenamay so nepangkag se tanà.

⁷Doen heman benì nesabog diyà te pinonoan te sagbet doen tigis. Timilles heman se sagbet doen tigis aw kinelep se menge tobò aw nematay.

⁸Meneng doen benì nesabog diyà te melambò tanà. Yan se timilles aw minongo te ginatos.” Penga niyan, minikagi si Jesus te dakel se kagi din, “Keilangan menenalan se kedita niyo doen telinga.”

⁹Nayan, mig-insà se menge tinoledaan i Jesus aw eden se kedegdagan te tegdeyanan sìyan.

¹⁰Minikagi si Jesus, “Sikiyo se pinetega-tegahan te Timanem te kebenalan tepad te peglowan din. Meneng olò pineokit te tegdeyanan se pegtoladà ko te menge doma otaw amon pengkey tomengteng dan, meneng eked dan kità te kedegdagan niyan. Pengkey domineg dan, meneng eked dan ketaga-taga te kebenalan.”

¹¹“Seini se kedegdagan te tegdeyanan sìyan. Se benì insabog, yan se kagi te Timanem.

¹²Na, se benì nesabog diyà te dalan, yan se iling te menge otaw domineg te kagi te Timanem intoladà. Penga niyan, doen inangen i Satanas amon kelibelan dan se kagi te Timanem dinineg dan, so ibeg i Satanas, eked dan pemenal aw eked dan heman pekelowà lekat te salà.

¹³Nayan, se benì nesabog diyà te tanà kebeto-betowan, yan se iling te otaw domineg te kagi te Timanem, aw meluba dan, aw tomolò dan kenyan te eked kenamay. Meneng aw meboyo dan, tenanan dan se pinemenalan dan, so iling dan te tinanem wedad nael dalid.

¹⁴Nayan, se benì nesabog diyà te pinonoan te sagbet doen tigis, yan se iling te otaw ontò domineg te kagi te Timanem intoladà. Meneng penga niyan, wedad ontong dan, so dàgen dan te ibeg dan megkeyaman, aw ibeg dan te keluba te keneyonan, aw doma ibeg te pedowan dan.

¹⁵Meneng se benì nesabog diyà te melambò tanà, yan se iling te otaw ontò melobos se pedowan dan. Aw domineg dan te kagi te Timanem, ontò dan iyan egtoloen. Egtayod dan te kelimahan lamig doen ontong dan.”

¹⁶“Aw menemtem se otaw te solò, eked din iyan sengkobi. Eked din heman elesi doton te siyong te katri. Meneng mèpiya aw isawol din iyan diyà te kelengkawan amon keenyagan se didalem te balay.

¹⁷Iling heman kenyan, wedad in-eles songkani eked kitai te modi aldaw. Wedad heman imbolon songkani eked keindan te modi aldaw.

¹⁸“Nayan, keilangan toloen niyo se dinineg niyo. Se otaw kominawà te kebenalan, yan se dogangan te kebenalan. Meneng se otaw eked kinawà te kebenalan, yan se pegwedadan te kebenalan.”