Luka 8:3-18

³Ebu Kuza inuḡa niḡa Ioana. Kuza aniꞌe kiniḡa Heroda gau zu neḡa taufeꞌeteꞌe vazeḡa. Roḡae ꞌahoga niḡa Susana zu roḡae ꞌahoga ꞌahoganiꞌa zeḡe zeḡe ḡau hina Iesu ebu ane tahiꞌatahiꞌa danaziro.

⁴Mada ꞌahogano vaze ḡuḡuvaḡaniꞌa Iesu haba nunuonoꞌo Iesu vaḡe ariro. ꞌOugadu Iesuꞌa hari ꞌahoga idaniro, raenaꞌa,

⁵“Hihi vazeḡa ꞌahoganiꞌa mebaḡano ezone ḡora onamiro. Ani mebaḡano ezone feune ragavirotene, nuꞌe oda ibiḡano rururaro. Eꞌe ezoneḡaꞌe vazeꞌa rana edau oname onainu zu niniꞌa onadu au hauḡiro.

⁶Ezone nuꞌe hadi habaꞌano rururaro. Eꞌe ezoneḡaꞌe ḡuhuriro, rehano roraro, mazaḡa rahaꞌe mene abuꞌa.

⁷Ezone nuꞌe ve renogano rururaro. Ebu ezone zu ve renoga tibano ḡuhure bororaro. Rehano ve renoganiꞌa ezone ḡuhuḡa simarinadu mene iniro.

⁸U ezone nuꞌe raha manoḡano rururadu faine ḡuhure bororaro, ebu vesu hugaꞌe ḡae 100 hudaro.” Iesu ani ḡoere hauḡirotene, ani ḡihau ḡoeriro, raenaꞌa, “Teḡaḡeta vazeḡaꞌe faifaine egadu huga ederoꞌi!”

⁹Ebu Iesu tahiꞌatahiꞌaꞌa hari eꞌe huga ani ḡadiniro.

¹⁰Iesuꞌa naenaeziro, raenaꞌa, “Zaꞌe Badiꞌaꞌa ibitoziniꞌeteꞌe moneo ꞌuꞌuru tiꞌeteꞌe ihozeꞌohe. Rehano vaze nuꞌe hari huga niduꞌa hari idaidaḡa hina ihozeꞌohe, eꞌanoꞌo zeꞌe huga mene ederiꞌuma. Peroveta azaḡaniꞌa amahi ꞌahige reiro, raenaꞌa, 'Zeꞌe Badiꞌaꞌa nagini haḡaeꞌetaꞌe horoneꞌohe rehano, hugaꞌe mene horoniꞌuma. Zeꞌe Badiꞌaꞌa nagini raꞌetaꞌe igiꞌohe rehano, eꞌe hugaꞌe mene ederiꞌuma.'

¹¹Eḡeꞌa ezone feune ḡorauꞌeteꞌe hariḡa idaidaḡa hugaꞌe rae deheniꞌuma. Ezoneꞌe Badiꞌa ḡoere.

¹²Ezone ibio ruruneꞌetaꞌaꞌe, vazeꞌa Badiꞌa ḡoere igiꞌohe. Rehano zeꞌa Badiꞌa ḡoere mene mae ḡihinadu ḡabone mene hidifine, Sataniꞌa zeḡe zamaonoꞌo Badiꞌa ḡoere mae vaḡineꞌohe.

¹³Ezone hadi habaꞌano rururuꞌetaꞌe, Badiꞌa ḡoere igiꞌetene matuꞌuzeta mae ḡihineꞌohe. Rehano ze fieꞌe ire taiga oꞌoꞌa heuḡa, eꞌanoꞌo mada tahiḡa daꞌo fieꞌohe. Ebu Sataniꞌa tuhuze nuriꞌetene uiteꞌohe.

¹⁴Ezone ve renoga zamaḡano rururuꞌetaꞌe, ze Badiꞌa ḡoere igiꞌohe. Rehano radiuꞌeteꞌe madaḡano, zamarone aduga borofeꞌohe, haba toheḡa ufeta zamareꞌohe zu haba ḡauḡa manomano hina ufeta matuꞌeꞌohe. Eꞌanoꞌo zeꞌe mene iniꞌohe.

¹⁵U ezone raha manoḡano rururuꞌetaꞌe, mene ḡurireꞌenaꞌa zama manoḡano Badiꞌa ḡoere igiꞌohe. Ebu zeꞌe aduga hideꞌe rehano, Badiꞌaꞌa matuꞌeꞌeteꞌe haḡaiḡa haḡaeꞌenaꞌa, hudauꞌohe.

¹⁶Vaze ꞌahoganiꞌa ihure hufine siuva hina mene ogone tiꞌuma ga fata ꞌuꞌuḡano mene tiꞌuma. Rehano ne diuḡeꞌeteꞌe vazeꞌa agaḡa horonoga veize, midau tiꞌeteꞌe habaꞌano midauꞌohe.

¹⁷Ihureꞌa ḡau niduꞌa aganeꞌeteꞌe teige, ꞌuꞌuru radiuꞌeteꞌe ḡauḡa niduꞌa fureraꞌuma. Ebu ogone ḡahineꞌeteꞌe ḡauḡa zuni horoniꞌuma.

¹⁸Eꞌano'o eḡeꞌa ziꞌeteꞌe ḡoeꞌa faine zamare egoꞌi! Faifaine zamare igiꞌeteꞌe azaḡaꞌe, Badiꞌaꞌa edeḡa boro ziniꞌuma. U mene faine zamare igiꞌeteꞌe azaḡaꞌe, Badiꞌaꞌa zeꞌe tahiḡa edeḡa rae zamareꞌeteꞌe zuni mae vaḡiniꞌuma.