Luk 8:3-18

³Ambi kun qetŋi Joana. Yaŋgö apŋi qetŋi Kuza yaŋön kiŋ Herodkö jakömbuak miri miaŋgöreŋ gawmangö moneŋ galömŋa malök. Ambi kun qetŋi Susana, Yeŋön aka ambi tosatŋi gwötpuk yeŋön nanŋini moneŋ inapŋinan Jisös aka gwarekurupŋi könanöŋ galöm köla naŋgöm eŋgiget. Mewö.

⁴Ambazipnöŋ taon dop miaŋgöreŋök öröba Jisösgöreŋ kaba kambulelembenöŋ tokogetka Jisösnöŋ dopkeu kun kewö jiyök:

⁵“Azi kunöŋ nene kötŋi qesiŋ gilmamgö anök. Anda qesiŋniga kötŋi tosatŋan köna jitŋe geba kölget. Geba kölgetka ambazipnöŋ tim tökötahögetka könakemba (warawen) neiŋi neiŋi kaŋgota mi nem teköget.

⁶Kötŋi tosatŋan köt jamönjiŋnöŋ geba kölget. Geba köla miaŋgöreŋ gölme oŋambuk qahö miwikŋaiba korapŋi kota soholiba gororoŋgöget.

⁷“Kötŋi tosatŋan siri uret wahiŋinambuknöŋ geba kölget. Geba kölgetka mieŋön öröröŋ kota eŋgoŋgita qem turuba böbölohot mem eŋgiget.

⁸Kötŋi tosatŋan gölme ölöpŋe geba kölget. Geba köla jula wahöta ölŋini ölöpŋi asuhuba handötkö dop ahum sehiget.” Keu mi jim teköba qet ketaŋi kewö qerök, “Kunŋan urukezapŋambuk malja ewö, yaŋön mönö dopkeu ki kezap ala möt kutuma.” Mewö.

⁹Mewö jiiga gwarekurupŋan dopkeu kiaŋgö könaŋaŋgöra Jisös qesim waŋgiget.

¹⁰Qesim waŋgigetka jiyök, “Anutugö bemtohoŋe aŋgota malbingö keu tölapŋi mi eŋgöra aukŋe jibi möt kutuzemö, tosatŋi yeŋgöra mia dop keunöŋ jibi mörakze. Mewö möta nanŋini jeŋinan yuai ekagun könaŋi töndup qahö ek kutume. Nanŋini kezapŋinan keu törörök mötagun könaŋi töndup qahö möt asarime.”

¹¹“Dopkeu miaŋgö könaŋi kewö: Köt qesiŋ giljawi, mi Anutugöreŋ Buŋa keu.

¹²Nene kötŋi köna jitŋe geba kölgeri, mi kewö: Ambazip tosatŋan Buŋa keu mötzemö, mi mötketka Bölöŋi Toŋan kaba uruŋini meleŋda Suepkö buŋa akepuköra keu kötŋi mi uruŋineyök qeköba eŋguaŋgirakza.

¹³Nene kötŋi qesiŋniga köt jamönjiŋnöŋ geba kölgeri, mi ambazip söpsöpŋi kun. Yeŋön Buŋa keu möta mi sösöŋgai qakŋe möt aŋgön kölakzemö, uruŋine geba jalöŋini qahö megeraŋgöra nalö töröptökŋi miyök möt nariba malgetka esapesapkö nalöŋe mönö tala eŋguma.

¹⁴“Nene kötŋi qesiŋniga siriuret wahiŋinambuknöŋ geba kölgeri, mi kewö: Yeŋön Buŋa keu mötketka uruŋine gezapmö, gölmenöŋ malmalgö waimanjatŋi aka moneŋ inap memegö urukönöpŋi ahuba lömbörim eŋgimakza. Qetbuŋaŋinambuk akingöra köpösöŋgögetka sihim kömbönaŋi bölöŋi tosatŋan mewöyök uruŋine dumgöba Buŋa keu böbölohot mem waŋgize. Mewö aiga ölŋini qahö gilipitŋi akŋe.

¹⁵Qahöpmö, nene kötŋi gölme ölöpŋe geba kölgeri, mi ambazip kewöŋi: Yeŋön Buŋa keu kezap ala mötketka uruŋini ölöpŋi geŋmoŋi qahö miaŋgöreŋ geiga sohobapukö mökösöŋda 8kapaŋ köla galöm kölgetka ölŋini ölöpŋi ölöpŋi miwikŋaimakze.” Mewö.

¹⁶“Kunŋan lambe me kiwa ohotiriba kimbutnöŋ kude köl turuma me dum bapŋe qahö alma. Mi qahöpmö, mi miaŋgö dum qakŋe ali tatma. Tata asariiga tosatŋan miri uruŋe öŋgöbingö mötzei, yeŋön miaŋgö asakŋi eka ölöp öŋgöme.

¹⁷“Mewöŋanök urunine yuai kun asambötket tölapŋe ahözawi, mi mönö aukŋe asuhum tiŋgitma. Yuai kun köl turuin ahözawi, mi mönö luluŋgetka kötula ahöma.

¹⁸“Miaŋgöra Anutugö keu mötzei, mi mönö urukönömŋine ala mötmöriba köl guliba malme. Kunŋan mötkutukutuŋambuk maljawi, Anutunöŋ mönö mi toroqem waŋgii qarimapmö, kunŋan mötkutukutuŋi qahö maljapmö, ‘Miambuk maljal,’ jizawi, Anutunöŋ mönö mötmötŋi moröŋi mi mewöyök qeköba waŋgitma.” Mewö.