Luka 8:3-18

³i Jovana (i romni e Irodesere upravnikosiri, e Huzesiri); i Suzana hem but avera. Adala đuvlja pumare lovencar kandle e Isuse hem lesere učenikonen.

⁴Ked čedinđa pe uzalo Isus baro narodo taro razna dizja, ov vaćerđa lenđe jekh paramiz:

⁵“Iklilo o sejači te frdel o seme ki njiva. I sar sejini ine, nesave semke pele ko drom, inele gazime hem o čiriklja xale len.

⁶Avera pele ko bar, barile hem šućile adalese so na inolen pani.

⁷I avera pele maškaro kare, o kare barile olencar hem tasavde len.

⁸I avera pele ki šukar phuv, barile hem bijande bijandipe šel puti više.” Ked vaćerđa adava, vičinđa: “Phraven tumare kana te šunen!”

⁹Tegani lesere učenici pučle le so manglja te vaćeri adala paramizaja.

¹⁰A ov phenđa: “O Devel tumenđe dinđa te džanen o garavdipa oto lesoro carstvo, a averenđe vaćerava ano paramiza, te pherđol okova so terđola ano Sveto Lil: 'anglo jaćhai korore hem anglo kanai kašuke.'

¹¹A akava i paramiz vaćeri: O semei sar o lafi e Devlesoro.

¹²Nesave manušai sar o semke save pele ko drom. On šunena o Lafi, ali avela o beng hem lela o Lafi lengere vilendar te na verujinen hem te na oven spasime.

¹³A nesave manušai sar o semke save pele ko bar. On šunena o Lafi, lena le radosno, ali oni sar luluđa saven nane koreno. Kola nesavo vreme verujinena, ali ked avela o iskušenje perena.

¹⁴A nesave manušai sar o semke save pele maškaro kare. Oni adala kola šunde o Lafi, ali živinena ano brige, ano barvalipe hem ano dživdipasoro šukaripe, i ovena tasavde hem na anena šukar bijandipe.

¹⁵A nesave manušai sar o semke save pele ki šukar phuv. Oni adala kola e šukare hem e bimelale vileja šunena o Lafi hem ićerena le sa đikote na anena šukar bijandipe.”

¹⁶“Niko na tharela i svetiljka te učhari la čareja ili te čhivel la talo than e pašljojbnasoro, nego čhivela la ko than zaki svetiljka te šaj okola so đerdinena dikhen o svetlost.

¹⁷Sa soi garavdo ka dičhol; sa soi garavdipe ka šunđol.

¹⁸Adalese pazinen sar šunena. Jer, kas isi lese ka del pe pana, a kas nane, ka lel pe olestar hem adava so mislini da isi le.”