Luka 3:4-25

⁴Porofete Jesajazi irec findaŋdâŋ kecʒiŋuc qâreŋkewec fokac: “Mareŋ tuhuo wiwira moc fuakac: Wofuŋte hata bâʒâweniŋ, hata‐ticne hepie wâneŋkeoc;

⁵wâcne wâcne hemase‐fârezo, tikine facne hezu hewâneŋ ezo; hehesicne hetiŋnezo â bahacne hefâsâezo.

⁶Eme mâreŋŋic ʒeŋgoma Anuture bâbâpiaŋ honeniŋmu.”

⁷Eme ŋic guru sâko Johanerao ra Miti Opâre mupie ʒiŋuc jazawec: “Homare ɋâric, ŋoŋe sâqocnere okacne fisizo ekac i wisecneniŋte mozi ŋazawec?

⁸Ŋoŋe maŋŋeŋic bârisiehuc irec sâcko fârine bâfuaniŋ me! Erâ maŋŋeŋiczi ʒiŋuc mi muniŋ: Nâŋe Abrahamte ɋâricfâc. No ŋazape mananiŋ: Anutu e muzo murâ sâcne mume qânâ ʒizi Abrahamte ɋâricfâc fuaniŋmu.

⁹Râric biac jâcfuŋko râekicne. Irec jâc moc fâri tâmiric domame qafararâ ʒocko rikezo.”

¹⁰Iŋuc muhuc jazame ŋic jaŋe wiocnerâ mumbiŋ: “Wemo enʒepeneŋ?”

¹¹Mupie jazawec: “Ŋic moc e ŋaqi jajahec bajurâ âgone ŋaqi tâmiric honerâ moc râcnezejec. Â nânâre iŋuc jaha enʒepieŋ.”

¹²Eme takesi roro jaŋe iŋuc jaha Miti Opâre fisirâ indiŋkerâ mumbiŋ: “Qaqazu, nâŋe weniŋuc enʒepeneŋ?”

¹³Mupie jazawec: “Ŋoŋe mumutâc qâsuahuc ŋic moneŋ mi jowac ronʒepieŋ.”

¹⁴Â momori jaŋe iŋuc jaha fisirâ mumbiŋ: “Eme nâŋe wenac enaŋmu?” Mupie jazawec: “Ŋoŋe ŋic jopa qâʒâic me qoqoric kosa mi ejarenʒepieŋ. Mosare wiac roeŋgopieŋ irec manapie tarazejec.”

¹⁵Eme ŋic jaŋe Johanere buâkec ejareme mana kikiwehuc ʒiŋuc mumbiŋ: “E Kristo ine hâcne mecne.”

¹⁶Iŋuc mupie mâmâc sasawa dâŋ ʒiŋuc jazawec: “No opâ rua‐ŋarekopac. Râpefuŋ‐naneo warehuc jukac, e ine tâpiri sâc moc focnekac. E sâko no iŋucnezi mafahe decnepe mi sâckeocmu. Eki hâcne Tiri Mâro â ʒoc rua‐ŋareocmu.

¹⁷E oofaŋ‐ticnehec warerâ nânâfic‐ticne emasaŋkeocmu, ehuc nânâ fârine wosâerâ ficko râeme ŋeocmu â jawa rasa wiac ofaŋne behec eme ʒocsanaŋko ʒaocmu.”

¹⁸Johanezi uŋdâŋ i â gâcne muhuc ŋic Biŋebiaŋ jazawec.

¹⁹Jaŋe jazahuc ŋicwofuŋ Herode e iŋuc jaha mumu hehec ecnewec. E ɋaticnere ŋonâŋ, ʒâŋene Herodia, jâoc rowec â sindaŋ gâcne wâc ewec.

²⁰Eme irec fainao qizecne sâko ehuc Johane kâpâcwâru ficko râewec.

²¹Ŋic bocjaha Johanerao fisirâ Miti Opâ ruahapie Jesu e iŋuc jaha rârâ ruawec. Ruarâ numuhame sambâŋ aŋkeme

²²Tiri Mârozi sahac fârihec erâ hâpâ hawario ere faio wahawec. Ehame sambâŋkonec dâŋ ʒiŋuc wahawec: “Joroc Ŋokâ biaŋ‐nane, go hone aŋac agareekopac.”

²³Jesu e jara‐ticne 30 qâririŋ bazurâ gie‐ticne fuŋkewec. Eme ŋic jaŋe ere manapie Josefere ŋokâ ewec. Josefe e Elire ɋâric,

²⁴e Matatare ɋâric, e Lewire ɋâric, Lewi e Melikire ɋâric, e Janaire ɋâric, e Josefere ɋâric,

²⁵e Matatiare ɋâric, e Amosire ɋâric, e Nahumte ɋâric, e Esilire ɋâric, e Nagaire ɋâric,