San Lucas 3:4-25

⁴An ñamin Isaíasne uzta. Sun Dios pit kainammmikane kaiz kit sunkana pɨnkɨhta para: “Mazane pul sukis ka tɨnta paranazi: ‘Au Anpatpa mi watsaninnanaka, nil sanapa.

⁵Mi pil piwail kirɨkane, pil winnazi. Wan ɨnkalkas wan ɨzakas sak sanazi. Kailsa mikas nil sanazi. Kwash mikas sak sanazi. Awa wan mi nil sashiana minñamtukas, Diosne wan awaruza wat namninnashimtu.

⁶Wan awane Dios ɨnintamikasha, watsat mɨlmumikasha, izanazi.’ ”

⁷Akkwan awane Juanpakin puzara, us usparuza munnanapa. Usne usparuza ka kiznara: “Une kamta kwalkana mai. Dios uruza ilna akane, une ɨkkainsachi.

⁸Wat tɨne wat pippain wamtu. Kawarain kwail kirɨt aizpa maiztumikane, paiña kwail chɨhkamtumikane, awa iztukin wat kinazi, awa us maiztɨt piankamanapa. Uruzpain ka minman: ‘Aune Abrahampa kwal makpas, Dios uruza wat kinat kit sappanapa.’ Nane uruza watcha kaiznamtus. Dios pashpa kawirashimtune, kal chi. Usne sun ukkasa Abrahampa pashpa namninnashina.

⁹Mɨnpazha mujtɨt tɨ kwalta pialpinkasa kwanapainsarɨt. Tɨ wat pippa wamtukine, kwat kit ĩnta kiakpɨnnazi. Une sun tɨkana mai. Diosne u minñamtu aizpa kaninnazi. Sunkanane Diosne kwail kirɨt aizpa chɨhkamtuchiruza ilnashinazi.”

¹⁰Suasne, akkwan awane ussa mɨmaara: —¿Aune chima kianapai? kizara.

¹¹Juanne usparuza sɨnkanara: —Paas kamisha mɨjmikane mamaz mɨjchimikasha mɨlatpa. Kumira mɨjmikane mɨjchimikasha nail kit kwintawa.

¹²Roma gobiernowa pial sapmuruzne ussa ɨara, Juan usparuza munninnanapa. Juanta mɨmaat kit kaizara: —Aune ¿Chima kianapai? kizara.

¹³Juanne usparuza sɨnkanara: —Gobierno ɨninta aizpa an muin puisaman.

¹⁴Mamaztuzkas suldaruruzkas ussa mɨmaara: —Aune ¿chima kianapai? kizara. Usne usparuza sɨnkanara: —Mɨnainkas walkuman. Mamazta pɨrail kaizman, us mɨj aizpa ukkana. Gobierno awa pial nua takane, sun pialkasa wat kultain.

¹⁵Wan awane chiwazha izna tɨriztu purazi. Sunkas usparuzpain mɨmat kit minñara: “¿Juanne Dios ɨnintamika sa?” minñara.

¹⁶Juanne wan usparuza sɨnkanara: “Nane uruza kwazikasa munnanash. Mazane nakin anza tɨnta anazi. Nane uskana watchish. Na paiña kiwainmikakas, nane an wat awa chish, ussa wat kiwainnapa piankamsachish. Sun amtumikane Diospa Sɨnam Izpulta ɨninnazi, ukasa tuanpa, uruza kiwainnanapa.

¹⁷Awaruzne chara pippakanain pura. Uspane chara ayakasa narɨt. Chara aya kihshkultawane, wat awane tɨmkasa ulpiannazi. Aya kihshkultukin pishkarawane, usne chara pippa wantat kit mamaz yalta watsanazi. Usne chara ayara impaktanazi. Sun ĩnne kwikain,” kiznara.

¹⁸Sunkana Juanne awaruza kurunnat kit kamtanat kit Dios watsal pit kaiznara.

¹⁹Uskas Herodesta, ɨninmikasha, kaizta: “Nune kwail kirai, aimpihshpa ashampara mɨltɨt akwa. Nukas an akkwan kwail kirai,” ussa kaizta.

²⁰An wan kwail kimtuasmin, usne mamaz kwail kirɨt. Usne kwizta Juantakas kajchira sɨpninta.

²¹Mane akkwan awara munnarawane, Juanne Jesústakas munta. Jesús Diosta paikumtuasmin, chiyura kai izta.

²²Chiyuras Diospa Izpulne utkurukana iztɨt. Jesústa kihshta. Mazane chiyuras kaizta: —Nune ap painkul i. Nua nat kit pashimtus, nu na kishit aizpa kimtu akwa, kizta.

²³Jesúsne treinta año panapain. Suasne usne kamtanamɨzta. Awane ka “Jesúsne Joséwa painkul azi” minñara.

²⁴Joséne Elíwa painkul azi. Usne Matatpa painkul azi. Usne Levíwa painkul azi. Usne Melquiwa painkul azi. Usne Janawa painkul azi. Usne Joséwa painkul azi.

²⁵Usne Matatíaspa painkul azi. Usne Amóspa painkul azi. Usne Nahúmpa painkul azi. Usne Esliwa painkul azi. Usne Nagaiwa painkul azi.