LUKA 3:4-25

⁴Woona mwalebeliwiwa muniivuruni na madhu a namavuhulela Ezaya: “Ndhu nnakuwa mwiiddeddereni: ‘Sasanyedhani rampa a Nabwiya, moogolele dila yaaye.

⁵Maddiba mateene evuheleliwe, mwango dhatedhene ni thuthuma dhiliganelihiwe dila dhokoromana dhineere woogoliwa. Muli magologodha muliganelihiwe.

⁶Athu ateene eneere woona ovulumusa wa Mulugu!’”

⁷Anamwinji yodhowa wi yabathiziwe. Zhuwawu oowoga, eeraga: “Nyo mulogo wa dhivili! Wuwaaddelileni ottawa owali wa Mulugu onafuna odha baani?

⁸Mvahe dhoovaha dhebaribari dhowoneyiha otthwaruwa. Muhambeele owoga wekiinyu: ‘Nihikanna baba eehu Abarahamu.’ Miyo ginowuwaaddelani wi Mulugu onowanda, osaddula mabwe alena wi ekale ahima a Abarahamu.

⁹Vano badho ehimala osasanyedhiwa, eli vati va mithanko. Mithanko dhatedhene dhihinavaha dhoovaha dhapama dhineere okakathiwa wi dhivokedhiwe omunddoni.”

¹⁰Nuwindo anamwinji yahimukohaga, yiiraga: “Nneere hiyo ddi?”

¹¹Zhuwawu ahaakulaga, eeraga: “Ole winna malaya meenddi, amvahe nimohi ole ohinna. Ole winna yooja, eerena emodha-modhave.”

¹²Yahifiyaga anamakoha-musoko wi ebathiziwe. Yomukohaga, yiiraga: “Namasuuziha, ki nneerege ddi?”

¹³Ahawaakulaga, eeraga: “Naari kamwenjedhedhe okwaranyiha mwaaddeleliwinyu.”

¹⁴Teto anyakoddo yahimukohaga, yiiraga: “Ki hiyo, nneerege ddi?” Oliye ahawaakulaga: “Kammwakege muthu korowa dhaaye momuthusa, kammurathelege muthu. Mudhiveliwege ni yoliveliwa yeenyu.”

¹⁵Mudhidhi oyene athu yomujejihedha Muthikitheliwi, yowikoha weekiwa akala Zhuwawuya daali Muthikitheliwi.

¹⁶Zhuwawu ahawaakulaga ateene: “Miyo, epaddi yaaga, ginowubathizani ni mahinje, mbwenye onodha oowodha onagikwaranya miyo naari kagifwanele otapula migoyi dha sapatho dhaaye. Oliye Oneerege wubathizani ni Muneba Woweela ni munddo.

¹⁷Etelo yaaye eli mmadani amvethena tirigu wi amuhele vatatani, makataya aapahe ni munddo wohuthima.”

¹⁸Nuwindo, oolaleya muselu wapama alibihaga ni madhu majinjene.

¹⁹Vano Zhuwawu agamusumulule namathonga a murudda, Heroddi ole mwaha womutela Heroddiya, mwadha ddibile ni dhabure dhimohi dheeriliyena,

²⁰Heroddi ahenjedhedha dhabure dhimohi vomuhela Zhuwawu mukaambura.

²¹Dhahipadduwa athu ateene ebathiziwaga, teto ahibathiziwa Yesu. Alobelaga odhulu wahithuleya.

²²Muneba Woweela wahikitela va Oliye ni mooneyelo a kangayiwa. Vano wahiiweya ndhu odhulu neerilege: “We Oli Mwaanaga; odhivela aaga, mwa we ginodhiveliwa.”

²³Yesu, aganna yaaka dhowaakwana makumi maraaru, ahambeela mabasa aaye. Aali, woona mweerelisu, mwaana a Zhuuze, mwaana a Heli,

²⁴Heli mwaana a Mathati, Mathati mwaana a Levi, Levi mwaana a Meliki, ola di mwaana a Yannayi, mwaana a Zhuuze,

²⁵Zhuuze mwaana a Matathiya, Matathiya mwaana a Amosi, Amosi mwaana a Nahumu, ola di mwaana a Esili, mwaana a Nagayi,