Lucas 3:4-25

⁴Jabi Juán acai ca yoati tsi Isaías yamabo chaniniquë ja quënëni cato ó no. Jabi siri tsi ja quënëni ca tsi xo naa: “Xabacha xo tsi quënaxëhi quiha. Quënahax, ‘Rohahuahacacana, Ibo johai ca quëshpi na’ ixëhi quiha. ‘Bahi mëstë ca acana ja bax coti.

⁵Rëahacaxëti quiha quini bo. Michorohacaxëti quiha tëmachi bo. Mëstëhuahacaxëti quiha yoro ca iti bo. Parahuahacaxëti quiha bahi yoi cabo. Toca tsi rohahuahacaxëti quiha mato shinana ra, Ibo johai ca quëshpi na.

⁶Jasca, Dios xabahamati quinia jisxëhi quiha carayanabo ri, naa nohiria tëquë’ nëcaxëhi quiha”. Jabi nëca tsi Isaías yamabá quënëni quiha Juan yoati na.

⁷Jatsi huëstima ca nohiria Juan qui bëcaniquë ashimahacaxëna. Jato ja yoani ca tsi xo naa: —Quiaxëni caba xocobo xo mato ra. Tsëquëti basima tsi xo nohiria qui Dios caxahai ca bari ra. ¿Tsohuë mato yobani, Dios caxa quima ax jabati?

⁸¿Mato jocha quima Dios quiri ma bësoha pa? No tsayano. Jariapari tsi jabi paxa ca ma jismaxëti xo. “No xabahamahacaxëti xo, Abraham yamaba chahitaxocobo no nori quëshpi na” iyamatsicana. Mato mëbiti mëtsama xo Abraham yamabo ra. Tsayacahuë. Naa maxax bo biti mëtsa xo Dios, Abraham xocobo yoi bo axëna iquia ra.

⁹Jatsi quiniacaxëcahuë. Mato copipaimaria xo Dios ra. Bimi jia ca pi jihuí saihuayamano tsi toa jihui rëraxëhi quiha ibo. Rëraxo tsi chihi qui niahi quiha. Jatsi jabi paxa ca ma saihuaxëti xo —nëa tsi nohiria bo qui Juan nëcaniquë.

¹⁰Jatsi, —¿Jënahuaxëhi ni noa ra? —i Juan qui nohiria niquë.

¹¹Jatsi Juán jato quëbiniquë: —¿Dos ca sahuëti jaya ni mato? Dos ca pi jayaquí tsi noitiria ca qui huësti ca acana. ¿Huëstima ni mato oriquiti? Huëstima pi jayahi tsi huëtsa bo ya xatënacana —i quiha jato qui Juan niquë.

¹²Jatsi impuesto bicanaibo, naa nohiria qui anoma cabo bëcaniquë ashimahacaxëna. —¿Jënahuaxëhi ni noa, maestró? —i Juan qui jaca niquë jato ri.

¹³Jatsi, —Gobierno qui nohiriá mëati ca parata roha bicana. Huino ca biyamacahuë —i jato qui Juan niquë.

¹⁴Jatsi soldado bá nicaniquë: —¿Jënahuaxëhi ni noa ra? —iquiina. Jato ja quëbiniquë: —Nohiria roayamacana parata bixëna. Mato sueldo quëshpi tsi ranicana —iquiina.

¹⁵Toatiyá tsi Xabahamati Ibo ó nohiria bo pasohi ini quiha. Ja quëshpi tsi jato Cristo Juan iqui ca ja quëscahuajahuacani quiha.

¹⁶Japi jato tëquë qui Juan nëcaniquë: —Jënë́ tsi mato ashimaquia. Jama, joxëhi quiha ëa oquëria cato ra. Ea tsi xo oquë yama cato. Espíritu Santó tsi, naa chihi iquiria cató tsi mato ashimaxëhi quiha.

¹⁷Joxo tsi jahuë́-na bo tsëcaxëhi quiha, ja otohai ca qui ja jicocano iquish na. Jama, trigo xaca jascaria tsi nocatimaxëni ca chihi qui yoixëni cabo niaxëhi quiha mëshoxëna —nëa tsi Juán nëcaniquë Jesu yoati na.

¹⁸Dios Chani yoapama tsi huëstima tsi nohiria Juán yobaniquë, Dios quiri ja bësocano iquish na.

¹⁹Jasca, chama Herodes pasomaha Juán chanipaoniquë, jahuë noma ahui ja bini iqui na. Jabi jahuë noma ahuini, naa Herodías icanai ca ja bini quiha, jahuë ahui iti. Jasca, huëstima ca yoi ca Herodés ani quiha. Jahuë jabi quiha.

²⁰Jatsi pë preso qui Herodés Juan nanëniquë. Anoma toa joni iniquë ra.

²¹Nohiria tëquë ashimahacayoquë tsi quiha Jesu ashimahacaniquë jaa ri. Bëhoxjano tsi quiha nai japëquëniquë.

²²Jatsi ja qui Espíritu Santo botëniquë; boto jisiria ja nori. Jatsi, —Noho Baquë yoi xo mia. Mia noiquia. Ea ranihuaqui mia ra —i quiha naipá ca joi niquë.

²³Jabi treinta año bo quiha Jesú jayaniquë, jahuë yonoco ja chitahëhuaquë no. Jabi José baquë ja nori ca quëscahua nohiria bá huaniquë.

²⁴José jahëpa Elí iniquë. Elí jahëpa Matat iniquë. Matat jahëpa Leví iniquë. Leví jahëpa Melqui iniquë. Melqui jahëpa Jana iniquë. Jana jahëpa José iniquë.

²⁵José jahëpa Matatías iniquë. Matatías jahëpa Amós iniquë. Amós jahëpa Nahum iniquë. Nahum jahëpa Esli iniquë. Esli jahëpa Nagai iniquë.