Lucas 3:4-25

⁴Tseno Juan willacunanpaqmi Diospa une profetan Isaias queno escribishqa carqan: “Tsunyaqchomi juc nuna qayaripa queno willaconqa: ‘Nänicunata derechar limpiaq cuenta prebinicuyë Teytata chasquiyänequipaq,

⁵feyu nänicunata parejaqno, jircacunata pampatsaqno, wicsu nänicunata derechaqno, rumi rumi nänicunata limpiaqno, prebinicuyë chasquiyänequipaq.

⁶Jinantin marcacunachomi llapan nunacuna musyayanqa, Diospita salbasion chämushqanta.’ ”

⁷Tsenam bautisacuyänanpaq nunacuna Juanman ewayaptin, waquincunata nerqan: —Ä, bibora cuenta nunacuna, ¿imanopataq allapa feyu castigupita salbacuyanqui!

⁸Jutsa rureniquicunata rasonpa jaqirïcur, allicunatana rurayë. Ama nicachäyëtsu: ‘Abrahampa castan canqantsicrecurmi castigupita salbacushun’ nir. Porqui niyaqmi: Diosqa que rumicunatapis Abrahampa castanqa ticraratsinmanmi.

⁹Imanomi juc nuna jachanwan mana wayücoq montita siquipita wallurir, ninacho ushacäratsin, tsenomi llapan mana alli ruraqcunapaqqa Dios listu quecan ushacäratsinanpaq.

¹⁰Tseno niptinnam, nunacuna tapuyarqan: —Tseno captenqa, ¿imatataq rurayäshaq? —nir.

¹¹Juannam nerqan: —Ishque camsequi cayäpushuptiqueqa, mana capoqta qoycuyë. Micunequicuna captinpis, mallaqecaqcunata qarecuyë.

¹²Impuestu cobraqcunanam Juanman witiyarqan bautisacoq, queno tapurnin: —Mayestru, ¿imatataq noqacunaqa rurayäshaq?

¹³Tsenam Juan nerqan: —Contribusionllata cobrayanqui. Ama mastaqa cobracuyanquitsu.

¹⁴Tsenollam soldaducunapis ewar, tapuyarqan: —Noqacunaqa, ¿imatataq rurayäshaq? Pecunatanam nerqan: —Ama nunacunapa imancunatapis malas qochiyanquitsu, ni ulicurcur lebantacuyanquitsu. Pagayäshushqequiwan conformi cayanqui.

¹⁵Tsenam nunacuna cushishqa quiquincunallacho queno niyarqan: —Shuyaconqantsic Dios Acrashqanchi pëqa —nir.

¹⁶Tsenam, Juan queno nerqan: —Noqaqa yacullawanmi bautisayaq; peru jucmi shamun noqapita mas puedeq. Noqaqa manam sirwïtsu qonqurïcur pepa llanqinpa watunta pascarillatapis. Pëqa ninano rupecaqwan bautisayäshurniquim, Santu Espiritunta qoyäshunqui.

¹⁷Ichicllanam pishin, imeca eracho triguta wauyaqno nunacunata pe acrananpaq. Trigutam wardacunanman wardanqa y pajatanam mana upeq ninacho cayeconqa.

¹⁸Tseno nirninnam, tuquilayapa nunacunata yachatserqan Diospa alli willaquininta.

¹⁹Tsepitanam mandacoq Herodista llapan mana alli rurenincunapita Juan piñaparnin nerqan: —Ama wauqiquipa warmin Herodiaswan wätanaquïtsu. ¡Tseqa manam allitsu! —nir.

²⁰Tseno niptinmi, mana alli ruranqancunapita mas mana allita rurar Herodis carselman Juanta llawiratserqan.

²¹˻Peru manaraq Juanta Herodis presu tsaritsiptinmi,˼ llapan nunacuna bautisacuyanqancho Jesuspis bautisacorqan. Tsechonam Diosman Jesus mañacuptin, sielupita

²²imeca palumano Santu Espiritu urämur, Jesusman chämorqan. Sielupeqnam Dios queno nimorqan: —Qammi cuyë tsurï canqui. Qamrecurmi allapa cushicü —nir.

²³Jesus quima chunca (30) watayoq quecarninnam, pepa willaquinincunata nunacunata willapar qallecorqan. Tsenam parlayarqan queno: “Jesusqa Josepa tsurinmi.” Joseqa Elipa tsurinmi.

²⁴Eleqa Matatpa tsurinmi. Matatqa Levipa tsurinmi. Leveqa Melquipa tsurinmi. Melqueqa Janaipa tsurinmi. Janaeqa Josepa tsurinmi.

²⁵Joseqa Matatiaspa tsurinmi. Matatiasqa Amospa tsurinmi. Amosqa Nahumpa tsurinmi. Nahumqa Eslipa tsurinmi. Esleqa Nagaipa tsurinmi.