Lucas 3:4-25

⁴Boidu ulita Chube gerua degaba unsuialin gerule kare, kwian Chube gerua ketanga kada Isaías chada degu Juan-Bautista giti, chada e gerule: “Nga gballage kwian gdaite kerua be suge kwian tanrege, ama be gerule: ‘Che Chugagwalla be chie, ba ulita kledale biale ama ngwange, ba mo ta gbadale biale trate no ama ngwange kwian kle jon lite trate biale chugagwalla ngwange kare.

⁵Kwian kle jon lite trate biale chugagwalla kweri gai ngwange no ama kle nga kegdere jonkare ulita gbe no trate dba kegata kare, kaire kle jwichuga, dbira gbe no trate dba kegata kare, kle jon itole lite tainkwli kle jon sugaskare lite trate. Ene kaire ba ulita mo ta gbadale no trate biale che Chugagwalla be chie gai ngwange no,

⁶Chube be ama kage gire kwian ulita be gwage amadi ama kwian ulita jwannga sieredi.’ ” Isaías nu chada degaba unsuialin gerule ene.

⁷Kwian tanre chku Juan-Bautista kle ngwadi, kwian e ulita takalin Juan-Bautista ama ulita ñe chiske, Juan-Bautista gerudu ama ulita ole: —Ba ulita kwian agenga me no me no, diali ba ta agekalin me no Chube dollale, ba ta me no molen. ¿Chema geru ketu bage ba mo ñeange chiske alin allabi me mo ta blite Chube ole, ene ba tien gitiru ji chugege ba agedu me no gdale?

⁸Me ene dale. Ba ta tienkalin gitiru ji chugege ba agedu me no gdale ba mo ta blitadale Chube ole mo ta gbe chage trate no Chube takalin kare, ene kwian gwage badi ulia ba mo ta blitu Chube ole. Ba me ñage tañachuge mau giti: “Cha enusulian oña Abraham oindalla, malen Chube me ñage ji gbe cha giti cha agedu me no gdale.” Ba me ñage tañachuge ene. Cha gerule ba ulita ole, ba me mo ta blite Chube ole ba me ña tien gitiru ji chugege ba agedu me no gdale. Ba Abraham oindalla agwa ba me kle age Chube takalin kare. Chube takalin ama ñage ke blite Abraham oindallale gire ke e joge blitaba kwianle, kwian e be age Chube takalin kare.

⁹Ba me mo ta blite ulia, ba salengwli gli me no kare, me gbachie no, gli ene alin gli mauña kle biale mochuga ole gli datagda, gli mauña be gli ene date guge ulita, ene kaire Chube kle biale ji gbe kwian me no giti bai kaire me mo ta blitakalin ulia Chube ole.

¹⁰Juan-Bautista gerudu ene kwian ulita ole gire kwian geru kadu amage: —¿Cha llema boadale gire cha ñage chage no Chube takalin kare?

¹¹Juan-Bautista jaindunga: —Ba camisa boke molen camisa gdaite ketadale kwiange kwian bai me camisa molen bitaite. Ba bligda molen bligda girabatadale kwian ole kwian bai me bligda molen sidri —Juan-Bautista gerudu ene kwian ole.

¹²Kaire kwian gweale igi ganga chugagwalla emperador nga Romamu alin chiu Juan-Bautista kle ngwadi mo ñeange chiske, ama geru kadu Juan-Bautistage: —Kwian tkanga tangle geruge, cha ulita igi ganga chugagwalla emperador nga Romamu alin, ¿cha llema boadale gire cha ñage chage no Chube takalin kare?

¹³Juan-Bautista jaindunga: —Ba igi gadale mangire batre ba chugagwalla gerudu kare, me igi gai ma gitikanga sidri mau alin —Juan-Bautista gerudu ene kwian igi ganga ole.

¹⁴Kaire guardia donga gweale geru kadu Juan-Bautistage: —Cha guardia donga, ¿cha llema boadale gire cha ñage chage no Chube takalin kare? Juan-Bautista jaindunga: —Ba lle boi ñanale igi keta bage, igi e alin ole ba ta chegedale no. Ba me lle jwennga kwian ngeru, ba me kwian oña boi lle gdale, ba me kwian gbe jiske geru me ulia giti.

¹⁵Kwian ulita kle Juan-Bautista keruchuge chegu tañachuge mo tale Juan-Bautistadi: “¿Ama Cristo? Sbali Chube gerudu be kwian jwannga siere kage che ulita alin, ¿ama e Chube gerudu kare o me?” Kwian ulita chegu tañachuge ene manade Juan-Bautista be age mine ama ulita gwa giti ene chke uñale amage Juan-Bautista amaña Cristo o me.

¹⁶Kwian ulita kle tañachuge ene mo tale gire Juan-Bautista gerudu kwian ulita ole: —Cha me Cristo, agwa kwian gdaite be chie cha nate, ama Cristo, ama ma kira molen chage, ama be ñage age ma no kwian alin chage, ama be Chube Oña gbe kwian tale, ene diali kwian be chage Chube Oña ole, Chube Oña be kwian ta gbe age no diali Chube takalin kare. Cha ñage kwian ñe chiske alin, agwa cha me ñage Chube Oña gbe kwian tale kwian ta blite age Chube takalin kare. Ulia kwian gdaite be chie cha nate ama ma no ma kweri ulita chage, cha me ñanaske ama chudaboangale ni ama zapatolla jwennga ama serage.

¹⁷Kwian gdaite be chie cha nate kle biale kwian chage no Chube takalin kare jwen sugekare kwian me noge, kwian no be toi no Chube ole diali, agwa kwian me no be toi sugekare diali Chubege ji chuge chui tangle, kwian mi ñage joge siere ji chuge ege. E salengwli kwian kle trigo kwara batenga kare, trigo tagla no alin chege sugekare trigo kwara me noge, trigo tagla ogakle no agwa trigo kwara gugakle jitaske. Malen cha gerule ba ulita ole ba tienkalin gitiru ji chugege ba mo ta blitadale Chube ole.

¹⁸Juan-Bautista gerudu ene Cristo chie chuia giti, kaire chagedu geru na no Chubenu Cristo giti trage kwian ulita ole.

¹⁹Chui gbaite Juan-Bautista gerudu kwian nga Galileage ulita chugagwalla rey kada Herodes ole, Juan-Bautista ka bo Herodes ole: —Herodes, ba kle age tanre me no, ba kle toi muinga kada Herodías ole, ama me ba muiralla, ama ba daballa kada Felipe muiralla, me no ba kle age ene, kaire ba lle na tanre me no boabale, ba ta jwlitedale age nganake ba kle agege nege kare.

²⁰Juan-Bautista ka bo ene Herodes ole, agwa Herodes me Juan-Bautista keru talladu, Herodes skochiu, kaire Herodes lle na me no bo, ama mo ta gbu Juan-Bautista tke skage Juan-Bautista ka bo ama ole kle age giti gdale.

²¹Juan-Bautista bebi tka skage gire ama kledu kwian ulita mo ta gbu Chube ole ñe chiske, e suiale Jesu kaire chku Juan-Bautista kle ngwadi mo ñeangale chiske Juan-Bautistage. Juan-Bautista Jesu ñeu chiske Jesu gau ngaña chigage gire Jesu gerudu Chube ole. Jesu kle gerule Chube ole gire nga ngaña giti nga tigedunga,

²²Chube Oña chku dba Jesu giti beusi kare, gire Chube kerua sugedu Jesuge gerule nga ngaña giti, Chube gerudu Jesu ole: “Ba cha Kirolla, cha no no ba ole, nga suga noare chadi ba giti.” Kwian kledu enige Chube kerua sugedu ene gerule no mo Kirolla Jesu ole.

²³Jesuge chura treinta chku gire ege gwangerugu Jesu lle bo kwian gwa giti gwangea Chube alin kwianske. Kwian ulita tañachugu Jesu José kirolla. José Elí kirolla,

²⁴Elí Matat kirolla, Matat Leví kirolla, Leví Melqui kirolla, Melqui Jana kirolla, Jana José kirolla,

²⁵José Matatías kirolla, Matatías Amós kirolla, Amós Nahúm kirolla, Nahúm Esli kirolla, Esli Nagai kirolla,