Luka 3:4-25

⁴Wo kɛra iko Nabi Esayi ka a sɛbɛ ɲa mɛn ma ko: «Mɔɔ do ri na a kan nabɔ wula kɔndɔ ka a fɔ mɔɔilu yɛ ko alu ye sila ba rabɛn Maari yɛ, ka ban ka sila denni bɛɛ latelen a yɛ.

⁵Dinban kɔndɔla bɛɛ ye lafa. Koyinkɛ ni tindi bɛɛ ye rakanya. Sila rakundunilu ye latelen. Sila juu ye rabɛn ka nunku.

⁶Wo wa kɛ, adamadenilu bɛɛ ri Alla la kisi ko yen.»

⁷Jama tɛrɛ ye nala Yaya ma sun ji rɔ kanma. A ka a fɔ doilu yɛ ko: «Aileilu fɔnfɔnni, yon ka Alla la kititɛɛ ɲafɔ ai yɛ?

⁸Ai ye kewali kɛ ikomin jiri den mɛn da yiraka ko ai tubini. Ai kana a fɔ ai jɛrɛ yɛ ko ‹Iburahima ye an fa le ri.› Baa n ye fɔla ai yɛ ko Alla ri se kaba ɲin kɛla Iburahima denilu di.

⁹Sisen, tɛɛran da wuli jiri lulu tɛɛ kanma. Jiri mɛnilu tɛ den ɲuma kɛla, woilu ri tɛɛ ka lafili ta rɔ.»

¹⁰Mɔɔilu ka Yaya maɲininka ko: «An ye nfen de kɛ wo rɔ?»

¹¹Yaya ka ie jabi: «Duruki fila ye mɛn bolo, wo ye fɛriyatɔ sɔ duruki kelen na. Damunun fen tii, wo fanan ye mɔɔ sɔ wo ɲa ma.»

¹²Nisɔnkɔmirala doilu fanan nani sun ji rɔ kanma. Alu ka Yaya maɲininka ko: «Karanmɔɔ, an ye nfen de kɛ wo rɔ?»

¹³A ka a fɔ ie yɛ ko: «Ai ka kan ka jate mɛn mira mansa yɛ, ai ye dan wo ma. Ai kana foyi la wo kan.»

¹⁴Sorodasi doilu fanan nara a maɲininka ko: «Andeilu don? Andeilu ka kan ka nfen de kɛ wo rɔ?» A ka ie jabi: «Ai kana mɔɔ bolofen si mira a la fanka la. Ai kana maborili kɛ wuya la fanan. Ai ye ai wasa don ai sara rɔ.»

¹⁵Alu bɛɛ tɛrɛ ye imirila ie jusu rɔ ko: «Alla la Mɔɔ Ɲenematɔmɔnin mɛn ko fɔni, Yaya le wo ri wo rɔ wa?» Baa, mɔɔilu tɛrɛ ye wo kisiba makɔnɔla.

¹⁶Ka bɛn ie miriya wo ma, Yaya ka a fɔ ie yɛ ko: «Nde ye ai sunna ji rɔ, kɔni dɔgbɛrɛ natɔ n kɔ, mɛn fanka ka bon n ta ri. Hali ka n birin ka a la sanbara julu fuli a yɛ, wo ka bon nde ma. Ale natɔ ai sunna Alla la Nin Sɛniman dɔ, a ni ta!

¹⁷A la fɛrɛ ye a bolo, a ri a la sɛnɛ suman bu ni a fofo ni a kisɛ bɔ a ɲɔɔn dɔ fɛrɛ mɛn na. A wa wuli wo baara kanma, a ri suman kisɛ ni a bu bɔ ɲɔɔn dɔ. A ri suman kisɛ kɛ bondon kɔndɔ, ka ban ka bu bɛɛ janin ta la. Ta wo ye ta sabali ri, mɛn tɛ ban habadan.»

¹⁸Yaya ka fen siyaman fɔ ie yɛ, ka ie kawandi, ka Alla la kibaro ɲuma lase ie ma.

¹⁹Yaya ka jamanatii Herodi jalaki fanan, ka a masɔrɔn a tun da a kɔrɔcɛ muso Herodiyasi mira a la. Yaya ka Herodi jalaki kojuu siyaman dɔ.

²⁰Jalakili wo gbara Herodi la, foo ka Yaya mira ka a bila kaso la. Herodi ka kojuu kɛ wo rɔ, ka wo fanan la a la kojuu tɔilu bɛɛ kan.

²¹Mɔɔilu ye nala sun ji rɔ kanma tuma mɛn na, Isa fanan nara a sun diya ji rɔ. Ka Isa to Alla matarala sun ji rɔ diya ye, sankolo lakara.

²²Alla la Nin Sɛniman ka kanba fari ɲɔɔn ta ka jii Isa kan. Kuma kan do bɔra sankolo rɔ ka a fɔ ko: «N ninkan dencɛ le i ri. I duman n yɛ kosɛbɛ!»

²³Isa bɔra sun ji rɔ diya ka a la baara damira. Wo ka a tɛrɛn a ra san bisawa ɲɔɔn sɔrɔn. Mɔɔilu tɛrɛ a jatela Yusufu dencɛ le ri. Yusufu tɛrɛ Heli den de ri.

²⁴Heli tɛrɛ Matati den de ri. Matati tɛrɛ Lebi den de ri. Lebi tɛrɛ Mɛlɛki den de ri. Mɛlɛki tɛrɛ Janayi den de ri. Janayi tɛrɛ Yusufu den de ri.

²⁵Yusufu tɛrɛ Matatiyasi den de ri. Matatiyasi tɛrɛ Amɔsi den de ri. Amɔsi tɛrɛ Nahɔmu den de ri. Nahɔmu tɛrɛ Esili den de ri. Esili tɛrɛ Nakayi den de ri.