San Lucas 3:4-25

⁴Ziꞌchi caa loh xchihtsi guehtu Isaías, tuhbi daada nin guñiꞌ xchiꞌdxyi Dxiohs, hasta rñiꞌn: Jweersi rooꞌ zihn raꞌ bwiinn tuhbi rsiaaꞌha loh dahan: “Gulguiꞌhnn zaꞌca xneziuh Dxiohs, nee gulgasanchii za xneziuh Ñiꞌh laꞌn lastoꞌ tu.”

⁵Garaa raꞌ hasta naa bataaꞌha loh neziuh chi gadxyiiꞌhin, neezaa dahan cun lohmwiꞌhn raꞌ dxiahca tubilohon, neezaa neziuh raꞌ hasta naa liinguu ganchii raꞌn, garaa raꞌ loh neziuh dxaaba dxiahca tubiloh raꞌn;

⁶ya garaa bwiinn guidxyiyuh zwaꞌha raꞌ ba laꞌh daada nin guixeꞌhla Dxiohs guhldaꞌh laꞌh raꞌ ba loh duhlda.

⁷Chin bwaꞌha Jwahn cagadiaaꞌha ziahan roo raꞌ bwiinn tin guroꞌbañihsa ba laꞌh raꞌ ba, chiꞌchi rahbi Jwahn loh raꞌ ba: ―¡Laꞌh tu bwiinn naxihn raꞌ, nin naa zigazi bweꞌlda ñalaaꞌdzi! ¿Chyulla gudxixteeꞌ loh tu tin gulluꞌn tu loh xjwiisi Dxiohs nin gueꞌdu gaca?

⁸Gulgachaꞌh ziga nabahan tu tin gaaldaa tu loh xquelrnabwaꞌ Dxiohs. Ayi guunn tu lligaaba lasahca duxa tu pur naa tu llahga guehtu Abrahn. Rñiꞌn loh tu sidela ziꞌchi ñahca ziꞌchiza ñuhnn Dxiohs lligaaba hasta dxiah raꞌ ñuhnn Ñiꞌh llahga Abrahn,

⁹laasii laꞌh dxiꞌbayahga naꞌ liistu la tin chyuuga garaa yahga nin ayi xcah ñinahxi zaꞌca loh Ñiꞌh, garaa niꞌchi chyuuga tin guicaꞌdxihin.

¹⁰Ya chiꞌchi gunaabadxyiꞌdxyi raꞌ bwiinn loh Jwahn, rahbi raꞌ ba: ―Nahaxchiꞌh, ¿xa niꞌca guidiꞌhnn nuꞌh?

¹¹Chiꞌchi rahbi Jwahn loh raꞌ ba: ―Nin nuu chiohpa nehza xahba ñiꞌh gudiꞌhi ba tuhbi nehzan laꞌh bwiinn nin ayi xi nahpatiiꞌ, tin gacu ban; neezaa bwiinn nin nuu xi rahw ñiꞌh chiꞌhzi ban cun bwiinn nin ayi xi nahpatiiꞌ gahw.

¹²Neezaa nuhn bwiinn nin rusadxihlli impweestu badzihn raꞌ loh Jwahn tin guroꞌbañihsa Jwahn laꞌh raꞌ ba. Chiꞌchi gunaabadxyiꞌdxyi raꞌ ba loh Jwahn, rahbi raꞌ ba: ―Mwehsu, ¿xa guidiꞌhnn chiꞌh nu nnah laꞌhnu?

¹³Chiꞌchi rahbi Jwahn: ―Ayiru gusadxihlli tu guyahlli laꞌh raꞌ bwiinn; sola nahpa guunn tu zigachiꞌh canabwaꞌ lehyi.

¹⁴Neezaa nuhn suldahdu gunaabadxyiꞌdxyi raꞌ ba loh Jwahn, rahbi raꞌ ba: ―Ya laꞌhaxchiꞌh nu, ¿xa guidiꞌhnn nu? Chiꞌchi rahbi Jwahn: ―Ayi cweꞌlluꞌh tu mweeyi loh bwiinn lajweersi, neezaa ayi gudziiꞌba tu duhlda yihca bwiinn nin ayi xi ruhnn, neezaa dxiaꞌhan tu cunjoorma cun zigachiꞌh ruhnn tu gahn.

¹⁵Ya gaduhbi riidxyiistoꞌ raꞌ bwiinn chi cayuhnn raꞌ ba lligaaba pwehda Jwahn naa Crixtu nin guixeꞌhla Dxiohs guidxyiyuh nin guhldaꞌh laꞌh raꞌ nuꞌh loh duhlda,

¹⁶chiꞌchi rahbi Jwahn loh raꞌ ba: ―Guchiin nin rñiꞌn loh tu, naꞌh ruroꞌbañihsahn bwiinn cun ñihsa, per ziꞌ stuhbi bwiinn nin guunn mas cohsa rooꞌ. Zuroꞌba ñihsa ba laꞌh bwiinn cun Spíritu Saantu nee neezaa cun bwehla. Ayi lasahcaꞌhn para bwiinn nin dxiꞌ chi, hasta para gacaꞌhn mooza nin cweꞌhe tahba ba ñaaꞌ ba ayi lasahcaꞌhn.

¹⁷’Laasi laꞌh pahla nuu liistula naa ba tin gahxu ba trihgu tin cweꞌhe ba dxihlli lohon, chiꞌchi gutiaaꞌha ban hasta riuꞌchaꞌyin; ya dxihlli chi gucaꞌdxyih ban ayi dxuꞌyitiiꞌrun.

¹⁸Cun dxyiꞌdxyi raꞌ riiꞌ neezaa ziahanru guelruuꞌyidxyiꞌdxyi bwiiꞌyidxyiꞌdxyi Jwahn tin baluuꞌyi ba dxyiꞌdxyi cuubi laꞌh raꞌ bwiinn.

¹⁹Ya neezaa gudxihldxinee dxyiꞌdxyi Jwahn laꞌh Herodes laasii guleꞌlluꞌhu Herodes laꞌh Herodías nin naa cheꞌhla bwihtsi ba nin laa Felipe, neezaa gudxihldxinee dxyiꞌdxyi Jwahn laꞌh Herodes laasii ziahanrooꞌ cosa dxaaba nin bwiꞌhnn Herodes.

²⁰Niꞌchin bidxyiꞌchi Herodes basieꞌw ba laꞌh Jwahn. Ya luulchimatiiꞌ bwiꞌhnn ziahan Herodes snuhn raꞌ dziꞌn dxaaba nin bwiꞌhnn ba.

²¹Chin nagahdxi gaca deeꞌ cagaroꞌbañihsa Jwahn ziahan bwiinn, neezaa Jesuhs gurohbañihsa, ya gaduhbi cabwihdxi-canaaba Jesuhs loh Dxiohs, billaala dxibaaꞌ,

²²chiꞌchi biehta Spíritu Saantu yihca Jesuhs zigazi tuhbi palohmmwiꞌhn, bihn raꞌ ba tuhbi rsiaaꞌha guñiꞌ Dxiohs nez dxibaaꞌ: ―Yiꞌh naa luꞌh lliiꞌnahn nin nadziiꞌhihn, nee riahxi duxaꞌhn pur Yiꞌh.

²³Galda bitsiꞌh yihza nuu Jesuhs chin guzoꞌbaloh Ñiꞌh cayuhnn Ñiꞌh dziꞌn nin badiꞌhi Xtaada Dxiohs Ñiꞌh guunn Ñiꞌh. Garaa raꞌ bwiinn gwachiistoꞌ raꞌ ba naa Jesuhs lliiꞌn Joseh ya Joseh guhca lliiꞌn Elih.

²⁴Elih guhca lliiꞌn Matat. Matat guhca lliiꞌn Levih. Levih guhca lliiꞌn Melqui. Melqui guhca lliiꞌn Jana. Jana guhca lliiꞌn Joseh.

²⁵Joseh guhca lliiꞌn Matatías. Matatías guhca lliiꞌn Amohs. Amohs guhca lliiꞌn Nahum. Nahum guhca lliiꞌn Esli. Esli guhca lliiꞌn Nagai.