SAN LUCAS 3:4-25

⁴Atea, Ʉmʉreco Pacʉ yee quetire wede jʉgueri majʉ Isaías o biro cʉ̃ ca ĩi owaquĩricarore birora biiupa: “Ca yucʉ maniri yepapʉre jĩcʉ̃, o biro ĩi acaro bui wedemi: ‘Añuro tʉgoeñarique mena Wiogʉre yueya,’ Wiogʉ cʉ̃ ca eaparo jʉguerore, cʉ̃ ca doopa maare díámacʉ̃ maa cʉ̃ja ca queno yuerore birora, mʉja cãa, mʉja yerire añuro cʉ̃re queno yueya.

⁵Upa coraari bʉcʉ ca nii ñaajãa duwi waarije cõrorena, jita mena maa jãa dado queno peoticãrique niirucu. Ʉ̃tã yucʉ, ca emʉari buurori ca niirije cõrorena, coa queno cũu peoticãrique niirucu. Upa beto maari ca niirijera, díámacʉ̃ maari queno cojorique niirucu. Docuori maari ca niirijera, añuri maari quenorique niirucu.

⁶Bojoca ñañarije cʉ̃ja ca tiirijere Ʉmʉreco Pacʉ cʉ̃ ca ametʉenerijere bojoca niipetirã ĩarucuma,” ĩi owaquĩupi Isaías.

⁷Paʉ bojoca cʉ̃re ca uwo coe dotirã earãre, o biro cʉ̃jare ĩiupi Juan: —Añaa punaa ¿“Ñiru, Ʉmʉreco Pacʉ ñañaro cʉ̃ ca tiipe ca cõña doorijere mʉja duti majicãrucu,” mʉjare cʉ̃ ĩijãri?

⁸Díámacʉ̃ra ñañarije mʉja ca tiirucurijere tii yerijãa tʉgoeña yeri wajoari, Ʉmʉreco Pacʉ peere mʉja ca tʉo nʉnʉjeerijere ĩñorã, ĩa majiricarora añuro niirique cʉti ĩño niiña. Mʉja majuropeera: “Jãa, Abraham pãramerã jãa nii,” ĩi tʉgoeñaticãña. Ʉmʉreco Pacʉa, ate ʉ̃tãgaarirena Abraham pãramerã cʉ̃ja ca niiro tii jeeñocã majimi.

⁹Mee comea, yucʉgʉʉrire ca queti paga, tee nʉcõripʉre paa pua tuuricaga tuja yerijãa. Yucʉ añurije ca dica cʉtitiri yucʉ cõrorena quetiri, pecamepʉ paa jude joerique niirucu —cʉ̃jare ĩi wedeupi.

¹⁰To biro cʉ̃ ca ĩiro tʉorã, o biro cʉ̃re ĩi jãiñaupa: —¿To docare ñee jãa tiigajati? —ĩiupa.

¹¹To biro cʉ̃re cʉ̃ja ca ĩi jãiñaro: —Pʉaro jutiro ca cʉogʉ, ca cʉotigʉre jĩcãro tiicojoya. Baarique ca cʉorã cãa, ca cʉotirãre ecaya —cʉ̃jare ĩi yʉʉupi Juan.

¹²Jĩcãrã Roma maquẽre wapa jee bojari maja cãa, uwo coe dotirã earã, o biro ĩi jãiñaupa Juan're: —Buegʉ, jãa pea ¿ñee jãa tiigajati? —ĩiupa.

¹³To biro cʉ̃re cʉ̃ja ca ĩi jãiñaro: —Mʉjare cʉ̃ja ca wapa jãi dotiricaro ametʉeneropʉ wapa jãiticãña —cʉ̃jare ĩi yʉʉupi Juan.

¹⁴Ñucã jĩcãrã uwamarã cãa: —Jãa pea, ¿ñee jãa tiigajati? —cʉ̃re ĩi jãiñaupa. To biro cʉ̃re cʉ̃ja ca ĩi jãiñaro: —Jĩcʉ̃ ʉno peerena ĩi uwiori, cʉ̃ja ca cʉorijere jĩcã wãme ʉno peerena cʉ̃jare ẽma, cʉ̃ja ca tiitiriquerena wedejãa, tiiticãña. Mʉja ca wapa taaro cõrora cʉoya —cʉ̃jare ĩi yʉʉupi Juan.

¹⁵Bojoca pea, “Do biirije peti to ca biicãro,” ĩi yue niirã, niipetirãpʉra cʉ̃ja majurope: “¿‘Juan, Mesías doorucumi,’ cʉ̃ja ca ĩiquĩricʉra cʉ̃ niicã tiimiti?” ĩi jãiñaupa.

¹⁶To biro cʉ̃ja ca ĩiro, Juan pea niipetirãre o biro ĩiupi: —Yʉa oco mena mʉjare yʉ uwo coe. Ména, doorucumi jĩcʉ̃, yʉ ametʉenero niipetirijepʉre ca doti tutua majuropeegʉ. Yʉa, cʉ̃ dʉpo jutire jiarica daari cãare ca popio cotepʉ méé yʉ nii. Cʉ̃a, Añuri Yeri mʉjapʉre cʉ̃ ca ñaajãa nʉcã earo tiiri, ñañarije manirã mʉja ca tuaro tiirucumi.

¹⁷Trigo quejerire cʉ̃ ca maa mʉene batepa tabere ami doomi, ca quejerire jee dica woo, ca ape peera teere queno cũurica tabepʉ queno cũu, tiirʉgʉ. Tee quejeri peera pecame ca ʉ̃ʉ yatitiri pecamepʉ joe batecãrucumi —ĩiupi.

¹⁸Ate mena, ñucã apeye paʉ wãmeri mena cʉ̃jare wede majiori, añurije quetire bojocare wedeupi Juan.

¹⁹Apeyera ñucã, Herodes're cʉ̃ yee wedegʉ Felipe nʉmo Herodías're cʉ̃ ca nʉmo cʉtirije jʉori, ñucã apeye niipetirije ñañarije cʉ̃ ca tiirique jʉori, cʉ̃re tuti bojoca catiomiupi.

²⁰Herodes pea niipetirije ñañarije cʉ̃ ca tii niirije watoara, Juan're cʉ̃re tia cũu nemocãupi ñucã.

²¹Jĩcã rʉmʉ bojoca niipetirã Juan're cʉ̃ja ca uwo coe doti niiri tabere Jesús cãa, cʉ̃re uwo coe ecoupi. Uwo coe eco yapano, cʉ̃ ca juu bue niiri tabera ʉmʉreco quejero ca pãa nʉcãro,

²²Añuri Yeri pea buare biigʉ bau duwi doo, bii ñaapea eaupi Jesús'pʉre. To biro cʉ̃ ca biiri tabera, ʉmʉreco tutipʉ: —Mʉ mʉ nii yʉ Macʉ̃, yʉ ca maigʉ; mʉ mena bʉaro yʉ ʉjea nii —ĩi wedeoupe.

²³Jesús, treinta cʉ̃mari cʉogʉ, cʉ̃ paderiquere tii jʉoupi. Cʉ̃ja ca ĩirucuropʉra niijata, Jesús, José macʉ̃ niiupi. José, Elí macʉ̃ niiupi.

²⁴Elí pea, Matat macʉ̃ niiupi. Matat pea Leví macʉ̃ niiupi. Leví pea Melqui macʉ̃ niiupi. Melqui pea Jana macʉ̃ niiupi. Jana pea José macʉ̃ niiupi.

²⁵José pea Matatías macʉ̃ niiupi. Matatías pea Amós macʉ̃ niiupi. Amós pea Nahúm macʉ̃ niiupi. Nahúm pea Esli macʉ̃ niiupi. Esli pea Nagai macʉ̃ niiupi.