LUKU 3:4-25 - Luda yã takada kũ Bisã yão

LUKU 3:4-25

Click on verse(s) to share them!

⁴Lákũ à kú annabi Isaya takada gũn nà à pì: À baarukparii kòto ma dↄ gbárannan, àtɛn pi à zɛ́ kɛkɛ Dikirinɛ, à zɛ́ térerenↄ poronɛ súsu.

⁵Guvutɛ pínki ni tata, kpinↄ kũ sĩ̀sĩnↄ ni datɛ pínki. Zɛ́ kotinanↄ ni poro súsu, zɛ́ wókũwokũnↄ ni kpákũsũ,

⁶gbɛ̃ sĩnda pínki ni e lákũ Luda dì ń sura ba nà.

⁷Gbɛ̃nↄ dìgↄ̃ su a kĩnaa dasi ò da'itɛ kɛ, akũ àdi ońnɛ: Bisãsiri pitikonↄ! De mɛ́ à lɛ́ dàáwa à bàa sí pↄfɛ̃ kũ Luda ni kipaḿmanɛɛ?

⁸À nɛ̀sɛlitɛna yã kɛ, onigↄ̃ dↄ̃ kũ a litɛ. Kũ Ibrahĩ de á dizi ũ, àsungↄ̃ da kũ abirekũ mɛ́ ani á boro. Matɛn oárɛ, Luda ni fↄ̃ à gbɛ̀ dínↄ kɛ Ibrahĩ burinↄ ũ.

⁹Kpása ditɛna línↄi kↄ̀. Lí kũ àdi nɛ́ mana iro, Luda ni zↄ̃ à zu tɛ́ gũn.

¹⁰Gbɛ̃nↄ a là ò pì: Tó lɛmɛ, óni kɛ deraa?

¹¹À wèḿma à pì: Gbɛ̃ kũ à uta vĩ mɛ̀n pla, à a do kpá gbɛ̃ kũ à vĩroa. Gbɛ̃ kũ à pↄ́ble vĩ, à kɛ lɛ dↄ.

¹²Bɛ'ↄgↄsirinↄ sù da'itɛ kɛ, akũ ò a là ò pì: Dannɛri, óni kɛ deraa?

¹³À wèḿma à pì: Ásun bɛ'ↄgↄ síḿma de lákũ ò dìtɛ nàlaro.

¹⁴Sozanↄ a là: Ókↄ̃nↄ sↄ̃, óni kɛ deraa? À òńnɛ: Ásun gbãna mↄ gbɛ̃nↄnɛ à ń blero. À zɛ kũ fĩna kũ òdi boárɛo.

¹⁵Gbɛ̃nↄ wɛ́dↄina tɛn kara. Baadi pínki tɛn laasun lɛ́ a nɛ̀sɛɛ gũn Yahaya yãa, tó àkũmɛ Arumasihu ũ.

¹⁶Yahaya òńnɛ ń pínki à pì: Madì á da'itɛ kɛ kũ íomɛ. Ama gbɛ̃ke ni su a gbãna demala, mádi ká mà a kyate bobonɛro. Àkũ mɛ́ ani á da'itɛ kɛ kũ Luda Ninio kũ tɛ́o.

¹⁷À gbaka kũna kũ ani pↄ́ fão. Ani pↄ́blewɛ ká a dↄ̃̀n, ani a sàko ká tɛ́ kũ àdi garo gũn.

¹⁸Yahaya baaru nna kpannɛnaa gũn, à nàkaraḿma kũ yã pãndenↄo dasi.

¹⁹Akũ à yã kpã̀kɛ̃ kína Hɛrↄdui a vĩ̀ni nanↄ Hɛrↄdia yã musu kũ yã vãni pãnde kũ à kɛ̀nↄ pínki,

²⁰akũ Hɛrↄdu ɛ̀ra à yã vãni kɛ̀ dↄ, à Yahaya dà kpɛ́siran.

²¹Kũ Yahaya tɛn gbɛ̃nↄ da'itɛ kɛ ń pínki, à Yesu da'itɛ kɛ̀ se. Gↄrↄ kũ Yesu tɛn adua kɛ, ludambɛ wɛ̃̀kↄ̃a,

²²akũ Luda Nini sùa à de lán potɛ̃nɛ bà. Akũ à kòto ke mà bona ludambɛ à pì: Mↄkↄ̃n ma Nɛ́ mɛ̀n do légelege yenyĩde ũ, kũ ma pↄ nnamma manamana.

²³Gↄrↄ kũ Yesu nà a zĩa, à kà wɛ̃̀ baraakuri taka. Òtɛn da Yusufu nɛ́'inaamɛ. Yusufu sↄ̃ Eli nɛ́mɛ,

²⁴Eli sↄ̃ Matata nɛ́mɛ, Matata sↄ̃ Levi nɛ́mɛ, Levi sↄ̃ Mɛlɛki nɛ́mɛ, Mɛlɛki sↄ̃ Yanai nɛ́mɛ,

²⁵Yanai sↄ̃ Yusufu nɛ́mɛ, Yusufu sↄ̃ Matatia nɛ́mɛ, Matatia sↄ̃ Amↄsi nɛ́mɛ, Amↄsi sↄ̃ Naumu nɛ́mɛ, Naumu sↄ̃ Ɛsɛli nɛ́mɛ, Ɛsɛli sↄ̃ Nagai nɛ́mɛ,