Luk 3:4-25

⁴Eu odi weleca je hahun madec dana Aisaia uqana bukna jaqen Jon uqa odi toodu odon: “Dana jejeg oso uqa wadauna bibili utai maadena, ‘Tibudna jic saciadoiga. Uqana jic tutuc mudeiga.

⁵Asou cunug age wa wewel tahaloqagan. Aluh benbenca aluh nagnagca eu cunug qetecebil ni tutuc migian. Jic gongin eu cunug sosolaig muduqagan. Odocob jic toni tobi eu jocosaig muduqagan.

⁶Odocob dana cajaca cunug age Anutna cahahaadec eu foqagan!’ adena,” en.

⁷Odocob dana am mati bahic age Jon wa joadigiannu uqaca hoin. Odocob uqa maaden, “Age man sononec nag me qee! In Anutna gemag bec jawe hugia odona euna age busaleiga ec maadeia?

⁸Agena silailnu mele bahic culimeig tului falicdumeig Anutna je qee tefacdoginanufi me odoc oso odoiga eu ihacteiga. Euqa ija mele maadigina, Anut uqa meen ene nijegina cedimei Ebraham talacul euna madecnu ihoc. Eunu age cain sanan mimi madowain, ‘Ebraham ege asige. Eunu Anutna gemag bec egeca qee hoiaun,’ owain.

⁹Sapol na gug qetecnu wele taweia. Na cunug aig me qee qona age qetimeig jana heloqagan,” aden.

¹⁰Odocob dana cajaca am age sisildoin, “Eunu ege eeta odeqan?” doin.

¹¹Odocob uqa jejenega hewi maaden, “In oso uqa lotoc lecisca uqa dana oso eundecca qee lotoc oso utigian. Odocob in oso sabca bilina uqa dana sabca qee eundec uqana sab cesawiadaga,” aden.

¹²Odocob takis cedec dana leih ageha wa joadecnu hoin. Odimeig age sisildoin, “Iwalgec, ege eeta odeqan?” doin.

¹³Odocob uqa jejenega hewi maaden, “Age um gauc cain cedowain. Age Rom agena loo je gadacna himec cedeiga,” aden.

¹⁴Odocob han dana ageha sisildoin, “Egenu eu adi? Ege eeta odeqan?” doin. Odocob uqa jejenega hewi maaden, “Age cain uhuli um aaqi meen qaig cawaladowain. Agena cabi ameg ogina eu ihoc ec cisdoiga,” aden.

¹⁵Odocob dana cajaca age saen euna Anutna Krais eu hugia agena cisdoc bibilen Jonnu geh bahic cisdoin. Odocob age Jonnu wawagana madein “Anutna Krais eu uqafa?” ein.

¹⁶Odocob Jon uqa cunug je maaden, “Ija age wana wa joadigina qa oso hib tooti hona, uqana gagadic odoc ijana gagadic odoc wooldona. Uqa dana ben meca bahic. Ijaqa uqana jaih tacec halu cufalitocnu dana me bahic ihoc qee. Uqa age Kis Gunnaca janaca wa joadigian.

¹⁷Uqa sawolca hona. Sawol euna wit aig cunug eeldocnuca, wit aig uqana jo bisna mecnuca hona. Euqa uqa witna tetec ja qee cafulina euna manigian,” aden.

¹⁸Odocob jic mati bahicna Jon uqa dana cajaca me jena wawaga huhuni maaden.

¹⁹Euqa saen euna Herod gabman ilo uqa waliag aideg, Herodias, on. Odocob Jon uqa Herod galac mudi madon, “Hina walin aideg om. Hina cahuldom,” don. Uqa ceteteh me qee mati bahic odon eunu Jon uqaha galac mudi madon.

²⁰Odocob eu toodocob uqa me qee odoc ben oso haun odon. Uqa Jon gihacdoc jona tacen.

²¹Odocob Jon uqa dana cajaca cunug wa joadi hedumei uqa Jisasha wa jouden. Saen euna Jisas Anut inondodon sao ohis jic cebec huden.

²²Odocob Kis Gun cuhudid fecwe nimei Jisasca bilen. Odocob jejeg oso sao ohisdec camas mi madon, “Hina ija melami nalunin migina. Ija hinanu wawi ben ceelena,” don.

²³Odocob Jisas uqana cabi sanan men saen euna uqana cabi gel gadac eu 30 odi. Dana age odi cisdoin uqa eu Josef melah. Josef uqa Hilai melah.

²⁴Hilai uqa Matat melah. Matat uqa Liwai melah. Liwai uqa Melkai melah. Melkai uqa Janai melah. Janai uqa Josef melah.

²⁵Josef uqa Matataias melah. Matataias uqa Emos melah. Emos uqa Neam melah. Neam uqa Eslai melah. Eslai uqa Nagai melah.