Luke 3:4-25

⁴Sei di ago niyo amiye Isaiah di bukari bura resi niyo kana: “Amiye yokoi di goroka bi gagani autu sanari raka nido, ‘Varika amiye di ida dogo resi ini dibo ida moi rorobo rifa.

⁵Soku tau moi vata baegedi, omuna tora tora ma omuna keika keika tau bi nomu nigo. Ida kevo sana moi rorobo risi giyo ida bi amuta nigedi.

⁶Amiye tau yaku vegedi, Sei di vava gokai amiye moi vegu rigo mina!’”

⁷Amiye tau gade John rofu babatiso reyainedi baegamadiri, ina vene rofu niyo, “Ya bi aruma di mida mida kana, kaere yaku ya niyo, ‘Sei di gubuyo baego, mina rofu ori digedi’?

⁸Mina dada, vegu no feresi moi etagae rina vegu di vegu iniye yabo meko rama rena kana moi ogau rifa. Ma ya kaya nigi ga kora refa, ‘Abraham bi uni tutubena.’ Adina ya vene rofu nida, Sei ina diba mina fore dudu Abraham di tutubena rigo!

⁹Viro bi yabo daruri sena ka aeyadi, ma yabo neinei meko buni de varededi bi nu makusi ita fafau you bogedi.”

¹⁰Amiye tau gade yaku nikaitesi niyadi, “Ma una bi beika regifa?”

¹¹John yaku nikabai resi niyo, “Kaere ini varuka remanu bi kaere varuka de rofu bi yokoi mago. Ma kaere iruku nufa bi, rau re.”

¹²Fore butu rededi vene be ka babatiso moigedi bi bosi nikaiteyadi, “Oteimana amiye, ma una bi gokai regifa?”

¹³Ma nikabai resi niyo, “Ago gira nido kana maka moifa, moi tora bi ga refa.”

¹⁴Iya rededi vene be ka ina rofu nikaitesi niyadi, “Una bi gokai regifa?” Ma niyo, “Amiye rofu fore moi tavoi ga refa, ma ofa sina dudu ina rofu ago ga nifa. Ma yi moimai dudu, gokaisanu moisa bi, kaini ada refa.”

¹⁵Gua amiye tau di uka mokena moi vau reyadi, dada mokena deda moisi niyadi, “John bi Keriso mini ba?”

¹⁶Kamini ina yaku mina amiye tau rofu nikabai resi niyo, “Na yaku koru dudu ya babatiso reida, idu baedo amiye ini vava yaku nai vava ebu reyo, ye na bi rorobo de ini yuka ro di maena younegida. Mina amiye bi Vima kikifa ma ita dudu ya babatiso rego.

¹⁷Ini witi fotaka utei resi koka rena di fodiya bi ini vanari moi gira resi ini rama bi dobeka gutuna makusi yareyo mina ini yavari aego, idu ini sanika bi kafena de itari ori kamu rego.”

¹⁸Ina yaku ago tauri amiye rofu Ago buni nioteimaro.

¹⁹Idu John yaku, Herod, kaere bi Galilee di ourefeidena amiye, di no moi negau rigamo. Ini adina bi ini dubuini di rema Herodias meyo. Berou bi ini vegu no tau tora reyo, mina ninegau reyo.

²⁰Mina vegu regasa ini no dudusa moi tora risi John dibura yavari aeyo.

²¹Amiye tau babatiso marori, bi Iesu ka babatiso reyo. Usa usa nigamori, oma ekeyo

²²ma Vima kikifa bi pune erena kana roaita dudu desi ina fafau rou riyo. Ma goroka yokoi oma gutuna degasa niyo, “Ya bi nai uka maida mida; ada tora gade ya rofu reida.”

²³Ini vata niyo lagani bi 30 kanari mamo ini moimai reyo. Amiye yaku mokegamadi bi Iesu bi Joseph di rumana mida. Joseph bi Heli di rumana mida.

²⁴Heli bi Matthat di rumana mida. Matthat bi Levi di rumana mida. Levi bi Melchi di rumana mida. Melchi bi Jannai di rumana mida. Jannai bi Joseph di rumana mida.

²⁵Joseph bi Mattathias di rumana mida. Mattathias bi Amos di rumana mida. Amos bi Nahum di rumana mida. Nahum bi Esli di rumana mida. Esli bi Naggai di rumana mida.