ᤗᤢᤁᤠ 3:4-25

⁴ᤜᤧᤰᤁᤣᤗ᤹ᤖᤡᤰ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤁᤢᤛᤠᤵᤐᤴᤏᤥ ᤕᤢᤜᤢᤴᤏᤠᤖᤧ ᤁᤢᤕᤠ᤺ᤶᤒᤣᤀᤥ ᤛᤠᤵᤋᤧᤀᤠᤱ ᤐᤳ. “ᤂᤢᤏᤧ᤹ ᤀᤣ᤺ᤰᤛᤠᤍᤧᤴᤏᤥ ᤀᤰᤂᤣᤗ᤹ᤖᤡᤰ ᤁᤧᤀ᤺ᤰᤐᤠ ᤀᤡᤰᤗᤠᤖᤥ. ‘ᤍᤠᤱᤒᤠᤸᤗᤧ ᤁᤢᤔᤠᤖᤠᤶᤔᤡᤴ ᤕᤠᤖᤡᤵ ᤆᤥᤃᤧᤶᤔᤧ᤹ᤀᤠᤱ ᤁᤢᤗᤠᤶᤜᤠ᤹ ᤋᤥ᤺ᤴᤍᤥ᤺ᤴ ᤆᤥᤃᤧᤶᤔᤧ᤹᥄

⁵ᤁᤧᤖᤧᤰ ᤏᤧᤘᤠᤗᤠᤜᤠ᤹ ᤗᤢᤵᤛᤡᤱᤗ. ᤁᤥ᤺ᤰᤔᤠ ᤑᤠᤱᤈᤱᤜᤠ᤹ ᤋᤱᤅᤠᤱ ᤋᤧ᤺ᤶᤒᤣ ᤐᤥ᤺ᤱᤗ ᤜᤧᤰᤁᤩᤠᤱ ᤀᤡ᤺ᤗᤠᤶᤜᤠ᤹ ᤋᤥ᤺ᤴᤇᤡᤱᤗ ᤋᤠᤵᤑᤧ᤺ᤶᤒᤠ ᤗᤠᤶᤜᤠ᤹ ᤏᤢ᤺ᤒᤠ ᤐᤥ᤺ᤱᤗ॥

⁶ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤖᤢᤛᤡᤒᤠ ᤁᤢᤛᤧᤴᤗᤵᤐᤡᤴ ᤁᤧᤖᤧᤰ ᤔᤧᤴᤇᤠᤶᤃᤧᤴ ᤕᤠᤵᤔᤡᤜᤠ᤹ᤖᤧ ᤔᤧᤏᤡ᤺ᤛᤢ᤹ᤖᤥ॥’”

⁷ᤔᤏᤠᤜᤠ᤹ ᤕᤢᤜᤢᤴᤏᤠᤗᤠᤶ ᤒᤵᤋᤡᤛ᤻ᤔᤠ ᤐᤥ᤺ᤱᤛᤧ ᤂᤧ᤹ᤕᤥ ᤔᤧᤍᤩᤧ॥ ᤕᤢᤜᤢᤴᤏᤠᤖᤧ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖ ᤑᤧ᤺ᤰᤋᤢᤛᤡ. “ᤀᤛᤣ᤺ᤰᤛᤠᤛᤣ. ᤂᤡᤏᤡ᤹ ᤁᤴ ᤁᤧᤍᤠ᤺ᤒᤠᤖ ᤁᤧᤒᤵᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤄᤢᤶᤍᤡᤱᤗᤠᤶ ᤂᤧᤳᤇᤡᤱᤅᤧᤶᤔᤧ᤹ ᤑᤠ᤹ᤀᤠᤱ ᤜᤠ᤺ᤳᤗᤧ ᤁᤧᤔᤧᤳᤋᤡᤒᤣ᥅

⁸ᤗᤠᤕᤥᤗᤠᤶ ᤁᤧᤜᤡᤴᤍᤡᤒᤠ ᤐᤠ᤺ᤴᤏᤡᤴ ᤀᤥᤛᤣ᤺ᤴᤍᤠᤱ ᤆᤥ᤺ᤰᤛᤧ ᤏᤢ᤺ᤒᤠ ᤕᤠ᤺ᤶᤒᤰ ᤆᤥᤃᤧᤶᤔᤧ᤹ᤀᤥ॥ ᤀᤠᤏᤡᤃᤧᤃ ᤀᤒᤪᤠᤜᤠᤔᤖᤧ ᤁᤢᤛ᤻ᤛᤠ᤺ᤛᤡᤃᤧ. ᤂᤧᤸᤗᤧ ᤆᤥᤃᤢᤸᤗᤧ ᤂᤢᤶᤍᤡᤱᤗᤠᤶ ᤂᤧᤳᤇᤡᤱᤔᤠ ᤛᤢᤰᤋᤡᤃᤧ᤹ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤀᤡ᤺ᤳᤋᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤃ ᤁᤴ ᤗᤢᤱᤜᤠ᤹ᤀᤠᤱ ᤀᤒᤪᤠᤜᤠᤔᤖᤧ ᤁᤢᤛ᤻ᤛᤠ᤺ ᤆᤥ᤺ᤰᤔᤠ ᤛᤢᤰᤋᤢᤛᤡ᤹ᤖᤥ॥

⁹ᤀᤠᤸᤗᤥᤛᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤄᤠᤛᤧᤴᤏᤡᤸᤗᤧ ᤋ᤺ᤴᤍᤡᤱᤃ ᤛᤡᤱᤒᤢᤱᤔᤥ ᤂᤠ ᤆᤢᤰᤔᤠ ᤀᤡ᤺ᤳᤋᤧᤀᤠᤱ ᤘᤠ᤹॥ ᤏᤢ᤺ᤒᤠ ᤛᤡᤱᤛᤣ᤹ ᤔᤧᤴᤎᤥ᤺ᤰᤔᤏᤠᤒᤠ ᤛᤡᤱᤒᤢᤱᤜᤠ᤹ ᤁᤧᤖᤧᤰ ᤋᤠᤱᤔᤠᤀᤠᤱ ᤔᤡᤀᤥ ᤗᤠᤵᤑᤢᤔᤠ ᤐᤥ᤺ᤱᤗᤥ॥”

¹⁰ᤔᤏᤠᤜᤠ᤹ᤖᤧ ᤂᤢᤏᤧ᤹ ᤛᤣ᤺ᤴᤔᤧᤍᤥᤛᤢ. “ᤜᤧᤰᤁᤣᤃᤪ ᤀᤠᤸᤗᤥ ᤀᤠᤏᤡᤃᤧ ᤌᤣ ᤆᤥᤃᤢᤶᤒᤧᤒᤠᤒᤣ᥅”

¹¹ᤕᤢᤜᤢᤴᤏᤠᤖᤧ ᤏᤥᤃᤵ ᤐᤡᤖᤢᤛᤡ. “ᤜᤠ᤺ᤳᤗᤧ ᤏᤧᤳᤇᤡ ᤆᤠᤱ ᤁᤳᤋᤢ᤹. ᤂᤧᤸᤗᤧ ᤔᤧᤱᤃᤵᤔᤏᤠᤒᤠᤴ ᤗᤳᤇᤠ ᤐᤡᤖᤢᤖ. ᤜᤧᤰᤁᤩᤠᤱ ᤜᤠ᤺ᤳᤗᤧ ᤆᤠᤔᤠ ᤁᤳᤋᤢ᤹. ᤂᤧᤸᤗᤧ ᤆᤠᤔᤠ ᤔᤧᤱᤃᤵᤔᤏᤠᤒᤠᤴᤏᤢ ᤜᤠ᤺ᤛᤢ ᤆᤖ॥”

¹²ᤜᤧᤰᤁᤩᤠᤱ ᤀᤣ᤺ᤱᤕᤠᤱ ᤁᤧᤓᤥ᤺ᤱᤒᤠᤜᤠ᤹ᤀᤠᤱ ᤂᤧ᤹ᤕᤥ ᤒᤵᤋᤡᤛ᤻ᤔᤠ ᤐᤥ᤺ᤱᤛᤧ ᤔᤧᤍᤩᤧᤀᤠᤱ ᤕᤢᤜᤢᤴᤏᤠ᤺ᤴ ᤛᤣ᤺ᤴᤔᤧᤍᤥᤛᤢ. “ᤛᤡᤰᤛᤠᤶᤒᤣ. ᤀᤠᤸᤗ ᤀᤠᤏᤡᤃᤧᤃ ᤌᤣ ᤆᤥᤃᤢᤶᤒᤧᤒᤠᤒᤣ᥅”

¹³ᤕᤢᤜᤢᤴᤏᤠᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤖᤥᤔᤡ ᤌᤡᤶᤔᤥ ᤛᤠᤵᤋᤧᤀᤠᤱ ᤁᤧᤒᤵᤐᤠᤀᤠᤱᤎᤥ ᤔᤏᤠᤜᤠ᤹ᤗᤠᤶ ᤕᤖᤡᤰ ᤀᤣ᤺ᤅᤕᤠᤱ ᤔᤧᤓᤥ᤺ᤰᤂᤧᤶᤔᤡᤴᤏᤧ᤹॥”

¹⁴ᤜᤧᤰᤁᤩᤠᤱ ᤌᤰᤛᤢᤒᤠᤜᤠ᤹ᤀᤠᤱ ᤂᤧ᤹ᤕᤥ ᤔᤧᤍᤩᤧᤀᤠᤱ “ᤀᤠᤏᤡᤃᤧᤃ᥅” ᤑᤠ᤹ᤀᤠᤱ ᤛᤣ᤺ᤴᤔᤧᤍᤥᤛᤢᤖᤥ॥ ᤂᤧᤱᤜᤠ᤹ ᤕᤢᤜᤢᤴᤏᤠᤖᤧ ᤀᤰᤂᤣ ᤔᤧᤳᤋᤢᤛᤡ. “ᤂᤡᤏᤡ᤹ᤀᤠᤱ ᤘᤣ᤹ ᤔᤏᤠᤜᤠ᤹ᤗᤠᤶ ᤛᤠᤰᤁᤧᤸᤗᤧᤰ ᤏᤢ ᤀᤡᤱᤗᤧᤰᤗᤠᤶ ᤕᤠᤱ ᤔᤧᤓᤥ᤺ᤰᤂᤧᤶᤔᤡᤴᤏᤧ᤹. ᤁᤖ ᤁᤧᤄᤥ᤺ᤛᤢᤶᤒᤠ ᤑᤠ᤹ᤕᤠᤱᤅᤥ ᤂᤡᤏᤡ᤹ ᤏᤡᤱᤘᤠ᤹ ᤋᤠᤛᤧᤶᤔᤧ᤹॥”

¹⁵ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤒᤥ ᤋᤠ᤺ ᤗ᤹ᤖᤡᤰ ᤔᤧᤜᤠᤱᤄᤢᤖ ᤏᤡᤱᤛᤠᤱ ᤔᤧᤈᤥᤃᤢᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤱᤃ ᤒᤠ ᤁᤴ ᤔᤧ᤺ᤶᤒᤡ ᤑᤠ᤹ᤀᤠᤱ ᤂᤢᤏᤡ᤹ ᤏᤡᤱᤘᤠ᤹ᤒᤥ ᤔᤧᤔᤧᤳᤇᤡᤱᤗᤥ॥

¹⁶ᤕᤢᤜᤢᤴᤏᤠᤖᤧ ᤂᤧᤱᤜᤠ᤹ ᤁᤧᤖᤧᤰ ᤏᤥᤃᤵ ᤐᤡᤖᤢᤛᤡ. “ᤀᤡᤱᤃᤠ᤹ᤃ ᤂᤡᤏᤡ᤹ ᤆᤫᤠ᤺ᤳᤋᤡᤸᤗᤧ ᤒᤵᤋᤡᤛ᤻ᤔᤠ ᤐᤡᤏᤡᤱ. ᤁᤖ ᤀᤡᤱᤃᤠ᤹ᤏᤢ᤺ᤸᤗᤧ ᤔᤢᤰᤛᤠᤶᤛᤠᤒᤠᤎᤡᤰ ᤋᤠᤖ ᤐᤳ॥ ᤀᤡᤱᤃᤠ᤹ᤃ ᤕᤥ᤺ᤰ ᤁᤢᤀᤡᤛᤡ᤺ᤰ ᤁᤢᤗᤠᤱᤛᤢ᤺ᤵ ᤏᤠᤶᤜᤠ᤹ ᤑᤠ᤺ᤱᤔᤠᤀᤠᤱ ᤔᤧᤗᤠ᤹ᤀᤠᤴᤗᤥ॥ ᤂᤢᤏᤧ᤹ᤃ ᤛᤣᤛᤣᤔᤠᤱ ᤏᤢ ᤔᤡ᤺ᤸᤗᤧ ᤒᤵᤋᤡᤛ᤻ᤔᤠ ᤁᤧᤒᤡᤖᤡ᤹ᤖᤥ॥

¹⁷ᤁᤢᤓ᤹ᤀᤣ᤺ᤳᤋᤡᤸᤗᤧ ᤛᤡ᤺ᤴ ᤀᤠ᤺ᤶᤔᤠ ᤑᤠ᤹ᤀᤠᤱ ᤂᤢᤏᤧ᤹ ᤕᤠᤖᤡᤵ ᤘᤠ᤹. ᤜᤧᤰᤁᤩᤠᤱ ᤂᤢᤏᤧ᤹ ᤋᤢᤃᤢᤖ ᤛᤢᤵᤛᤢᤀᤠᤱ ᤛᤡ᤺ᤴ ᤆᤠᤎᤥ᤺ᤰᤗᤠᤀᤥ ᤆᤡᤰᤂᤢ᤹ ᤜᤧᤰᤁᤩᤠᤱ ᤁᤢᤜᤰᤜᤠ᤹ ᤀᤠᤵᤑᤠᤸᤗᤧᤀᤠᤱ ᤔᤧᤴᤇᤡ᤺ᤔᤏᤠᤒᤠ ᤔᤡᤀᤥ ᤜᤠ᤺ᤴᤍᤢᤍᤣ᤺ᤛᤢ᤹ᤖᤥ॥”

¹⁸ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ ᤕᤖᤡᤰ ᤐᤖᤡᤰᤗᤧᤴ ᤛᤡᤰᤁᤢᤶᤍᤡᤱ ᤂᤠᤜᤢᤴᤜᤠ᤹ ᤐᤡᤖᤢᤛᤡᤖ ᤛᤢᤏᤠᤀᤡᤱ ᤀᤡᤱᤓᤴ ᤛᤧ᤺ᤛᤢᤖᤥ॥

¹⁹ᤁᤖ ᤕᤢᤜᤢᤴᤏᤠᤖᤧ ᤛᤢᤜᤠᤱᤃᤧᤶᤒᤠ ᤜᤧᤖᤥᤍᤧᤏ ᤑᤧ᤺ᤰᤋᤢ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤀᤅᤧ᤺ᤰᤔᤠ ᤜᤧᤖᤥᤍᤡᤕᤠᤛᤧᤴ ᤔᤣ᤺ᤰᤂᤡᤶ ᤔᤧᤳᤋᤢᤀᤠᤱ ᤘᤕᤧ. ᤜᤧᤰᤁᤩᤠᤱ ᤘᤣ᤹ ᤕᤖᤡᤰ ᤑᤧᤴ ᤕᤠ᤺ᤶᤒᤰᤜᤠ᤹ᤀᤠᤱ ᤆᤥᤃᤢᤀᤠᤱ ᤘᤕᤧᤖᤥ॥

²⁰ᤜᤧᤖᤥᤍᤖᤧ ᤕᤢᤜᤢᤴᤏᤠ᤺ᤴ ᤐᤢᤱᤗᤠᤜᤡᤶᤔᤥ ᤛᤠᤰᤋᤢᤀᤠᤱ ᤀᤠᤸᤗᤛᤠᤱ ᤕᤖᤡᤰ ᤑᤧᤴ ᤕᤠ᤺ᤶᤒᤰᤁᤡᤴ ᤕᤥ᤹ᤖᤢᤖᤥ॥

²¹ᤌᤡᤰᤕᤧᤴ ᤁᤠᤰ ᤔᤏᤠᤜᤠ᤹ ᤒᤵᤋᤡᤛ᤻ᤔᤠ ᤔᤧᤒᤥ᤺ᤰᤂᤧᤸᤗᤧ ᤕᤧᤛᤢ᤺ᤴᤏᤠᤱ ᤒᤵᤋᤡᤛ᤻ᤔᤠ ᤐᤥ᤺ᤰᤂᤧ॥ ᤜᤧᤰᤁᤩᤠᤱ ᤂᤢᤏᤧ᤹ ᤋᤢᤘᤠ ᤆᤥᤃᤢᤖ ᤐᤳᤇᤧᤸᤗᤧ ᤋᤠᤱᤛᤠᤰᤐᤧᤴ ᤜᤖᤧᤀᤠᤱ

²²ᤛᤣᤛᤣᤔᤠᤱᤅᤡᤴ ᤐᤢᤳᤋᤢ᤺ᤰᤁᤣ ᤜᤧᤰᤁᤣ ᤕᤧᤀᤠᤱ ᤂᤢᤏᤧ᤹ ᤁᤢᤛᤶᤍᤠᤱ ᤆᤢᤰᤋᤧ. ᤜᤧᤰᤁᤩᤠᤱ ᤛᤠᤱᤃᤪᤠᤶᤐᤣᤍᤠᤱᤅᤥᤗᤠᤶ ᤀᤡᤰᤗᤠᤎᤡᤰ ᤕᤧ. “ᤂᤧᤏᤧ᤹ ᤀᤡᤱᤃᤠ᤹ ᤀᤠᤔᤡ᤺ᤶ ᤀᤠᤛ᤻ᤛᤠ᤺ᤏᤧᤖᤥ॥ ᤂᤧᤏᤧ᤹ᤏᤢ ᤀᤡᤱᤃᤠ᤹ ᤛᤠ᤹ᤖᤡᤰ ᤛ᤺ᤳᤋᤠᤱᤅᤠᤱ ᤘᤠ᤹ᤀᤠᤖᤥ॥”

²³ᤀᤠᤸᤗ ᤕᤧᤛᤢᤖᤧ ᤔᤠᤱᤛᤣᤘᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤜᤣ᤺ᤰᤋᤢᤸᤗᤧ ᤂᤢᤏᤧ᤹ ᤋᤱᤒᤣ ᤛᤢᤶᤒᤥ᤺ᤱ (᥉᥆) ᤁᤧᤖᤧᤀᤠᤱ ᤘᤕᤧ॥ ᤂᤢᤏᤧ᤹ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤔᤧᤀᤡ᤺ᤳᤋᤢᤒᤠ ᤁᤢᤀᤡᤛᤡ᤺ᤰ ᤕᤢᤛᤢᤑᤖᤧ ᤁᤢᤛ᤻ᤛᤠ᤺ ᤘᤕᤧᤖᤥ॥

²⁴ᤕᤢᤛᤢᤑᤧᤴ ᤜᤧᤗᤡᤖᤧ ᤁᤢᤛ᤻ᤛᤠ᤺. ᤜᤧᤗᤡ᤺ᤴ ᤔᤋᤠᤋᤖᤧ ᤁᤢᤛ᤻ᤛᤠ᤺. ᤔᤠᤋᤠᤋᤧᤴ ᤗᤧᤒᤡᤖᤧ ᤁᤢᤛ᤻ᤛᤠ᤺. ᤗᤧᤒᤡ᤺ᤴ ᤔᤧᤸᤆᤡᤖᤧ ᤁᤢᤛ᤻ᤛᤠ᤺. ᤔᤧᤸᤆᤡ᤺ᤴ ᤈᤴᤏᤤᤖᤧ ᤁᤢᤛ᤻ᤛᤠ᤺. ᤈᤴᤏᤤ᤺ᤴ ᤕᤢᤛᤢᤑᤖᤧ ᤁᤢᤛ᤻ᤛᤠ᤺ ᤘᤕᤧᤖᤥ॥

²⁵ᤕᤢᤛᤢᤑᤧᤴ ᤔᤳᤋᤠᤌᤡᤕᤠᤛᤖᤧ ᤁᤢᤛ᤻ᤛᤠ᤺. ᤔᤳᤋᤠᤌᤡᤕᤠᤛᤧᤴ ᤀᤠᤔᤥᤛᤖᤧ ᤁᤢᤛ᤻ᤛᤠ᤺. ᤀᤠᤔᤥᤛᤧᤴ ᤏᤠᤜᤢᤔᤖᤧ ᤁᤢᤛ᤻ᤛᤠ᤺. ᤏᤠᤜᤢᤶᤔᤡᤴ ᤀᤡᤛ᤻ᤗᤡᤖᤧ ᤁᤢᤛ᤻ᤛᤠ᤺. ᤀᤡᤛ᤻ᤗᤡ᤺ᤴ ᤏᤃ᤻ᤃᤠᤀᤡᤖᤧ ᤁᤢᤛ᤻ᤛᤠ᤺.