Luke 3:4-25

⁴Awa engo matu peroveta Isaiah mi gagurisina: “Embo abu damodamoda aorogateira, ‘BADARI da begata dave ewo pepeta are.

⁵God mi yai agata igata berari butu piari visido inono aina, edo peji pamopimo berari kapari wotedo bereya aina. God mi begata ogegembari awa kapari dambu daraina, edo kokoturo awa daedo butu piari visido ududugaina.

⁶Edo embomai yai berarida ami God da tonembari jisimi gara.’”

⁷Ango edo embomai jisijisi, John mi bapataito arate idegedo ainda yai gupero, awamanede sisina, “Embo imomane garibé awa tena, jitoma ingege! God mi rirowa piain siya eira awa, nane imomane bapataito ano awa daginegawa ango kotembetewa?

⁸Imomane bapataito anate jipapa edo gido, itomane be dave awa piewo gane. Edo ami awa imomane do wareregetewa ango goteiano gumbave. Edo imomane akuta ge mina tara engo eove, ‘Abraham awa mamo natokare, awatedo, God natokare yai rirowa piainyae.’ Nane imondemane tena awa, God mi ganuma itera eiwa inono tari wasiri budo Abraham da maiunji teteka ara.

⁹Edo iji borokobé emi, God embomai ainkain jimbo bebegaeda dodo wareregae era awamaneda yai rirowa piaina. Awa engo, embo otomi ni be dave ekae era berari awa tutuda tai kapari durudo mumuya aro kundo niyaoda augaina.”

¹⁰Edo ango tesiri embomai ami John de tedogositera, “Awatedo, nakare nongo ari?”

¹¹Edo awamanede mina sisina, “Imo aimi ombari tote (2) isira gido awa, embo nei ombari itae ainde da (1) pieyo! Edo imo aimi indari isira gido awa, dá ango embo nei indari itaede pieyo!”

¹²Iji angode tax kumbari embobo, awamane daedo John mi bapataito arate guputera, ami tedogositera, “Atopatari, nakare nongo ari?”

¹³Edo John mi awamanede sisina, “Imomane tega nonda bawate aodarida tari isira, ainda akuta buwo, ata daginegeove!”

¹⁴Edo daedo itoro embobomi John de tedogositera, “Edo nanekaremi awa nongo ari?” Embo ami awamanede sisina, “Embomainda ganu bain engega eove ko bekumba ge pitawa embomainde teove! Edo itomane buro edo ewa ainda tau awa dubodavede buwo!”

¹⁵Iji angode embomai awa bé gain eite edo awamane berari do mi, “John awa Keriso rita?” ango kotembesitera.

¹⁶Awa embo, John mi embomai berari ainde sisina, “Na imomane un mi bapataito ena. Ata embo nato amboda gumaina awa na ango ae. Embo awa bajina edo na dave ae. Nane ainda tai woru teugari tao ae. Ami imomane Asisi Kotopu ae niyao demi bapataito aina.

¹⁷Embo awa dagi bajina ainda ipami jido kundo gumaina. Ami vedari wheat be buya edo wotari jimundo kundo ainda beurida piaina, ata oen berari jimundo augari niyao matawa aveite isira ainda awaina.

¹⁸Edo John mi begata jiwaebéda gemi embomai kondade eite God da bino dave awamaneda yai dengoro baiari piedo esisina.

¹⁹Ata ainda amboda John mi Daotari Herod de ge okain sisina, aindabé, embo awa ainda namejida aro ipuda jipusina edo wasiri bebegae nenei esisina.

²⁰Edo daedo Herod wasiri beyaebé awa ami tesiri John bundari oroda pipisitera.

²¹Ango edo John embo berari bapataito eiri, Yesu daedo gumbiri bapataito esisina. Edo Yesu God de ge siri utu pirigesisina.

²²Edo Asisi Kotopu kariwa ni ribo ango ainda yai wotesiri ge yavi utuda edo gundo sisina, “Imo awa nato dubobari Mai. Nato dubodave ari bé ito yai.”

²³Ango edo Yesu imo akuta awa duberi 30 ango esiri, ainda buro tuturo esisina. Edo embo awa Joseph da mai, embomi ango kotembesitera. Edo Joseph awa Heli da mai,

²⁴edo Heli awa Matthat da mai, edo Matthat awa Levi da mai, edo Levi awa Melchi da mai, edo Melchi awa Janna da mai, edo Janna awa Joseph da mai,

²⁵edo Joseph awa Mattathiah da mai, edo Mattathiah awa Amos da mai, edo Amos awa Nahum da mai, edo Nahum awa Esli da mai, edo Esli awa Naggai da mai,