Luk 24:3-19

³Euna age dunuh lein qa Jisas Tibud deweg ganac qee felein.

⁴Age dadanii tatawegin dana lecis lotoc senenec seeecca bahic wele cemenega tawesin.

⁵Odocob cucuiecca caja eu age jogoii maha mecidoin. Oodogin dana eu ale maadesin, “Age eetanu cal mec agena cudunna dana cebac bilia eu megegina?

⁶Uqa ene qee nijel. Uqa wele ceseli cajeia. Galili hatu ono bibili maadennu cisdoiga.

⁷‘Dana Melah uqa dana silailca ebenegana mecebil na babalecna tuitu qocobil cal migian. Odocob deel cijeddocna haun ceseli cajigian,’ aden,” adesin.

⁸Odocob caja eu age uqana jenu wawaga fogo don.

⁹Hatin onodec haun ceselimeig malogom 11-pela eu ageca lein. Odocob ceteh amagana fein eu dana cajaca cunug ha maadein.

¹⁰Caja age eu Maria Magdaladecca, Joana odocob Maria, Jems anag, eu age caja leihca ceteh eunu malogom maadein.

¹¹Euqa malogom caja age gad je madegina ec cisdoin. Odimeig agena jenu wawaga qee meleel. Euqa Pita cajimei guguli Jisas deweg ganac mudein heelna nuen. Uqa jogoimei ceteh oso qee fel qa Jisas deweg ganac jelein lotoc eu himec fen. Odimei uqa adi odon ec waug cacaden ceselen.

¹³Deel euna himec eu ale togca odi Emeas jobon belesin, uqana cecelac Jerusalemdec eu 11-pela kilomita eu odi.

¹⁴Odocob ale ceteh cunug calen eunu togodudu belesin.

¹⁵Saen ale je mamadesi togodudu bebelesin Jisas uqadodoc cemenela leceb osoben cocobi belein.

¹⁶Ale fesin qa uqa Jisas ec qee fogo alel.

¹⁷Odocob Jisas maalen, “Ale eetanu je togodudu belesina?” alen. Eu ale olanala gulucqecca tului tawesin.

¹⁸Odimesi oso uqa ijan Kliopas sisildon, “Acahna, hina cele dana eundec osoldih uqa ono Jerusalem ceteteh cali hon qila deel leih hedoia eu qee dolfo?” don.

¹⁹Odocob Jisas sisilalen, “Cel ceteteh?” alen. Odocob eu ale jejeg hewi madosin, “Ceteteh Jisas Nasaretdecnu calen eu. Dana eu uqa je hahun madec dana. Odocob uqa Anutca dana cajaca amagana cabi gagadic uu je gagadic mamadi cobon.