Lukas 24:3-19

³Usisa no aipapo umaso ama uga, weramu unanta Amisy Yesus anasino kopa raije ramu,

⁴weti wananepabe. Naije kobe vatane jirum aya ansune mamo mpope ntumbe rave, isyaiyo matavon.

⁵Wanya umaso ujani dave, weti wo awa vukane ranteter muno wo mansamune rangkukuv no mine von. Umba vatane jirume umaso yo raura yare, “Aipapo mamo vatano ugwenen to obo mantuna rai, weti wabeanimaibe wapo vatano kove akani no aipapo rai?

⁶Naisoamo norije ramu, yara kovakato to! Wasaemeno Apa ana po raura wasai no Galilea raijoe rai,

⁷purairive pare, ‘Risy, Arikainyo Vatan, indati inaunanto vatano ukakainoanive maneme rai. Wo inauseo sawa no inyo kapite rai, weramu masyote mandei umba ikovakato.’ ”

⁸Umba wanya umaso maemeno Yesus apa ana daura umawe rai.

⁹Weti unajivo aipapo raora, wakata wo ana umaso raura tenambe no Yesus apa arakovo abusyinara eane intabo mai, muno Apa arakovo kaijinta mai tavon.

¹⁰Naije Maria wanya Magdalena me, Yohana me, Mariajo Yakobusa apa akoya me, muno wanya kaijinta utavono mai tavon. Wenao tenambe wakare wo ana umaso raura nanto Yesus apa arakovo abusyinara eane intabo umawe mansai.

¹¹Weramu wo ratantona ware wanya sonawamo waumandivea, weti wanave ramu.

¹²Weramu Petrus seo tet, pansanan to no Yesus apa aipapo rai. Umba benanto peravo aipapo ama uga raito, po ansune vasye mpopero veano Yesus anasino kopa rakepane obo raeno ntamiji. Weti Petrus nantoive irati apa ana po raene umaso rai, umba nin ti pakato.

¹³Masyoto napije kobe, Yesus apa arakovo javondi aije ruruma yurija no munije inta ama tame mi Emaus. Munijo Emaus ti nde no Yerusalem ama waravainye ma kilometer abusyinara eane intabo.

¹⁴Arono yanya, yayao irati Yesus apa ana nande ai muno Apa kakaije rai.

¹⁵Weti yanya yayao ana umaso raive, umba naije Yesus taune de nande panya yatavon.

¹⁶Weramu maisyare ana inta nsosobe yami raije wemaisy, weti yantatukambe Ai.

¹⁷Umba Yesus po yanajo pare, “Animaisye mi ripanya ipayaube raije wato?” Umba isyai yanimaumbe.

¹⁸Vatane umaso inta apa tame mi Kleopas po Yesus anajo pare, “Winyamo nyo ana vatane wo rave no Yerusalem nandijawe ranaun dainya e? Vatano Yerusalem wo raen tenambe to.”

¹⁹Umba Yesus po raura akanande yai pare, “Animaisye mije?” Umba yo raura akananto Ai yare, “Ana nande Yesus vatano Nasaret ai. Opamo anawae pa, Apa ayaowe muno Apa ana dave mamo mbambunin dave, weti vatan tenambe manayanambe Ai muno Amisye anayanambe Ai tavon.