LUKU 24:3-19

³Kɛ̀ aↄ̃ gɛ̃̀, aↄ̃ↄe Dii Yesu gɛ̀ ero.

⁴Aↄ̃ↄ kú bídi guu, ben gↄ̃gbɛ̃ gↄ̃ↄn plaa kenↄ bↄ̀ wà mↄ̀ńzi kↄ̃n pↄ́kãsãa kɛ̀ èe tɛ́ kɛɛnↄo dana.

⁵Vĩa ń kũ aↄ̃ ń mì nàɛ, ben gↄ̃gbɛ̃ pìnↄ bèńnɛ: À kɛ̀ dia ée gbɛ̃ bɛ̃ɛ wɛtɛɛ gɛ̀nↄ tɛ́ɛ?

⁶À kú kɛ̀ro, à fɛ̀ɛ. À tó yã kɛ̀ à òare gurↄↄ kɛ̀ à kú Galili dↄagu

⁷à bè, séde wà Gbɛ̃ntee Nɛ́ kpá durunkɛrinↄa aↄ̃ à pá lía, à gurↄ aagↄ̃dee zĩ eé fɛɛ.

⁸Ben à yã pì dↄ̀ńgu.

⁹Bↄna mira kiia, aↄ̃ gàa wà yã pì baaru kpà zĩ̀ri gↄ̃ↄn kuri awɛɛdoonↄnɛ kↄ̃n gbɛ̃ kpaaanↄ.

¹⁰Mariama Magadalɛni kↄ̃n Yoanao kↄ̃n Yemisi da Mariamao kↄ̃n nↄgbɛ̃ kpaaa kɛ̀ aↄ̃ↄ kúńyonↄ bé wà yã pì ò zĩ̀ri pìnↄnɛ.

¹¹Ben nↄgbɛ̃ pìnↄ yã pì kɛ̀ńnɛ lán fàadi yã bà, aↄ̃ↄe síro.

¹²Ben Pita fɛ̀ɛ à bàa sì à gàa mira pì kiia. Kɛ̀ à wɛ́ɛ kpàɛ mira pìn, èe pↄ́ke ero, sé táaru bisanↄ, ben à lìara à tà laasuu guu, yã pì à kũ̀ gbãa.

¹³Gurↄ dↄ̃nkↄ̃ pì zĩ Yesu ìba gↄ̃ↄn plaa kenↄ e gaa lakutu kɛ̀ wè be Ɛmausi. À zã̀ kↄ̃n Yerusalɛmuo lán kiloo kuri awɛɛdoo bà.

¹⁴Aↄ̃ↄe yã kɛ̀ kɛ̀ píngi fàadi bookↄ̃nɛ,

¹⁵ben gurↄↄ kɛ̀ aↄ̃ↄe à fàadi boo aↄ̃ↄe à laasuu lɛɛ, Yesu ń lé zɛ́n, ben aↄ̃ↄe táa oo lɛdo.

¹⁶Ben ń wɛ́ɛ sìsi aↄ̃ↄe à dↄ̃ro.

¹⁷Ben à ń lá à bè: Bↄ́ yãn á tɛ́ ée oo kↄ̃o? Ben aↄ̃ zɛ̀ uuo sisina.

¹⁸Aↄ̃ gbɛ̃ doo kɛ̀ wè benɛ Keleopa wèàla à bè: Mmↄn nibↄn n ũ ndo Yerusalɛmu gwɛɛ, kɛ̀ nɛ́ɛ yã kɛ̀ kɛ̀ gurↄplaa kɛ̀a dↄ̃roo?

¹⁹Ben à ń lá à bè: Yã kparemɛ? Aↄ̃ wèàla wà bè: Yesu Nazarɛti yãmɛ. Annabi ìsimɛ. Baade píngi dↄ̃ kɛ̀ à yãkɛna kↄ̃n à yã'onao bↄ̀ Luda kiiamɛ.