San Lucas 24:3-19

³Orzeꞌ guꞌ dem gyeegy ni baa zeꞌ. Orzeꞌ bzaac dem nu sacaꞌ cuerp ni Shuaan na Jesuuz.

⁴Orzeꞌ pcan shcab ni dem yuꞌm. Orzeꞌ wagad lagy dem lac gyicy mi. Orzeꞌ sij la bruu zac cyup mbecy. Orzeꞌ gusu dey garee lom. Zeꞌ zu dey negy cacy iily la.

⁵Tonaꞌ la gudzib dem. Orzeꞌ gusab tiily la dem gal lo yu la. Orzeꞌ de mbecy zeꞌ nay rab yu dem: ―¿Lagu ryub der tub biñ mbañ lat de añ ii?

⁶Gun mi zeꞌ sacaꞌm ii, sinu bi byabañ mi. Bicy der nu gyezaꞌ lagy der de coz nu mniim lat nu gusam Galilea.

⁷Mniim nu rlagy ñi nu guꞌ dey ub mi, biñ nu byac mbecy, yaa de mbecy cyi. Orzeꞌ de yu zeꞌ rlagy ñi caa dey mi lo cruuz. Orzeꞌ nu zaꞌ dzi chon, orzeꞌ gyabañ mi, nam ―na de mbecy shab cacy zeꞌ.

⁸Orzeꞌ gazeꞌ nu de mi zeꞌ byezaꞌ lagy dem de riidz nu mnii Jesuuz.

⁹Orzeꞌ bruu dem ruꞌ baa zeꞌ bish cya dem yam. Orzeꞌ byoo dem rishlo de trotub de aposht, gal nu lo deꞌ zir mbecy de coz nu guc.

¹⁰De biñ nu bya too riidz zeꞌ, mi zeꞌ Li, biñ nu bruu Magadán, nu Wan, gal nu Li ñaa Santiag, gal nu deꞌ zir de biñ mñaa. Orzeꞌ mnii dem riidz zeꞌ lo de aposht.

¹¹Tees de yu zeꞌ guzii dey nu riidz ton ziꞌl rnii dem. Orzeꞌ wancheña lagy dey.

¹²Orzeꞌ mas ni, tees Bed gush yu carer zay ruꞌ baa ni Jesuuz. Na ornu bruꞌñay na, orzeꞌ bgüiiy nañ gyerbaa zeꞌ. Orzeꞌ bzaac yu se sab ziꞌl nim mbish ñi. Orzeꞌ bish cyay yay par yuꞌ. Nunu za nu la ic yu nu nac de coz nu guc.

¹³Orzeꞌ laab dzi zeꞌ cyup de yu nu rsyaꞌ lom za dey tub gyedz nu la Emaés. Gyedz zeꞌ riñ tub nu rnii trotub miily metr nu ruun Jerusaleeng ruꞌñan gyedz zeꞌ.

¹⁴Na nez nu za dey, orzeꞌ ro dey riidz nu nac dela coz nu guc.

¹⁵Na lat nu ro dey riidz na, orzeꞌ laab Jesuuz bechaꞌm lo dey. Orzeꞌ gazeꞌ nu za num dey tublaazh.

¹⁶Orzeꞌ mas bzaac dey mi, tees wangyuꞌ lo dey mi.

¹⁷Orzeꞌ nam rab mi dey: ―¿La riidz ro der yad ru? ―nam. Orzeꞌ guca dey nu ricy shniy.

¹⁸Orzeꞌ tub yu nu rsyaꞌ lom zeꞌ lay Cleofas. Orzeꞌ nay rab yum: ―¿A tub zi la ru mbecy nu pcyiiñ Jerusaleeng nu wagad lagy de coz nu sa guc zeꞌ? ―nay.

¹⁹Orzeꞌ na gaꞌ Jesuuz: ―¿La coz guc? ―nam. Orzeꞌ na gaꞌy: ―De coz ni Jesuuz, biñ nu bruu Nazaret. Mi zeꞌ guc mi tub biñ nu rnii por cuen ni Ñgyoozh. Ñgyoozh, gal nu dela mbecy bicy dey Jesuuz par tub mbecy nu tonaꞌ la coz ily ricy nunu tonaꞌ la coz ily rnii.