Luk 24:3-19

³kɔ ŋambɛrɛ, mba ŋanabəp fɛ fure fa Yesu.

⁴Ntɛ tes tatɔkɔ teŋciyanɛ ŋa mɔ, kɔ arkun mɛrəŋ ŋawurər ŋa, ŋabɛrnɛ yamos yomotər-motər.

⁵Kənesɛ kəŋan disrɛ, kɔ ŋaŋcəp cəro fəp faŋan dəntɔf; mba kɔ afum aŋɛ mɛrəŋ ŋayif ŋa: «Ta ake tɔ nəntɛnɛ wətɔfi afi dacɔ-ɛ?

⁶Eyi fɛ dɛ! Ɛyɛfɛ afi dacɔ! Nəcɛm-cɛmnɛ tɔkɔ ɛnalok’un ntɛ nənayi kɔ nkɔn atɔf ŋa Kalile mɔ.

⁷Ntɛ oŋc-loku: ‹Mɛnɛ palɛk Wan ka fum pabɛr kɔ aciya dəwaca, ŋacaŋ kɔ dəkətɔk ka defi, pəyɛfɛ defi tataka tɔn ta maas.›»

⁸Kɔ ŋaŋcɛm-cɛmnɛ toloku ta Yesu tatɔkɔ.

⁹Kɔ ŋayɛfɛ dəndo dəkufu kəkɔ-loku ti asom a Yesu aŋɛ wəco kɔ pin, kəbəp ka afum aləpəs akɔ.

¹⁰Mari Madelɛn, Yohanna, Mari wəka Sak kɔ aran alɔma; aŋɛ ŋananəŋk sɔ mes mamɔkɔ mɔ, ŋaloku sɔ tin tayi asom a Yesu.

¹¹Mba moloku mamɔkɔ mɛnayi ŋa pəmɔ ntɛ abəc ŋandelok-lokər ŋa mɔ, ŋanalaŋ fɛ moloku ma aran akakɔ.

¹²Kɔ Piyɛr ɛyɛfɛ, k’ɛyɛksɛ kəkɔ nde dəkufu. Ntɛ ontulnɛ kəmɔmən mɔ, ɛnəŋk fɛ daka o daka mɛnɛ mopol ma kəloto mɔkɔ mɛnafəntərɛ dəntɔf mɔ; k’ɛyɛfɛ k’ɔŋkɔ ndɔrɔn, pəciyanɛ kɔ tɔkɔ ɛnəŋk mɔ.

¹³Dɔsɔk din dadɔkɔ, acɛpsɛ a Yesu darəŋ mɛrəŋ ŋac-kɔ dare dɔlɔma ndɛ aŋc-we Emayus mɔ, dare dɛnayi, ndɛ dɛnabɔlɛnɛ Yerusalɛm kəkɔt ka dec mɛrəŋ mɔ.

¹⁴Afum akaŋɛ mɛrəŋ ŋac-lokɛnɛ mes mɔkɔ meŋcepər mɔ fəp.

¹⁵Ŋayi kəlokɛnɛ mes mamɔkɔ, ŋac-gbɛkəlɛnɛ, kɔ Yesu ɔlɔtərnɛ ŋa, kɔ ŋasol.

¹⁶Mba paka pɔlɔma pɛŋc-yaməs ŋa kənɛpəl kɔ.

¹⁷Kɔ Yesu eyif ŋa: «Ake moloku mɔ nəyi tantɛ nəŋkɔ mɔ?» Kɔ ŋaŋcəmɛ, kɔ dis dɛndɛŋcɛ ŋa.

¹⁸Kɔ wəkin wəkɔ aŋc-we Kəleyopas mɔ, oloku kɔ: «Məna sona gboŋ, məna eyi mɔkɔ Yerusalɛm nwɛ ɔntɔcərɛ ntɛ teŋcepər mata mamɛ mɔ?»

¹⁹K’eyif ŋa sɔ: «Ake?» Kɔ akakɔ ŋaloku kɔ: «Ntɛ teŋcepər teta Yesu wəka Nasarɛt, nwɛ ɛnayɔnɛ wədəŋk wəka Kanu wəpɔŋ mɔ; ɛnamentər ti dəmɔyɔ kɔ dəmoloku, fɔr ya Kanu kiriŋ, kɔ nnɔ afum ŋayi mɔ.