Luk 24:3-19

³ne bungina diluxu, dibagu Toxoratamona Yesu sangganoa te.

⁴Dahatumhatum mana, baing hata sibuna li lipu luwa disau imangdi disina bila bilikbiliga, dili haxek manadi.

⁵Dimaxuwa sibuna binabu digung kiding tuxundi mari, saing dituru mari titia. Ne lipuadi ba tang daharua nadi ba, “Ang gasai mana lipu walingam mana long matiama baru?

⁶Wa la li te. Mesa muli ba! Ahatumia muli harua baru bungina wauyu ranguang titia Galili:

⁷‘Lipua Ma Rangua Urana bagula dita lipu kubolu dianamdi rimadingia bu dung mati xai balingamia, saing mana xaidap tuwa bagula mesa muli.’ ”

⁸Baing ina naga, dahatumia haruanganoa muli.

⁹Digoxoya guha gobagobia ma, baing dibaxanga axadi li na Lipu 11 xaung na lipu teladi disu mana.

¹⁰Hainggadi ba dibaxanga na aposeldi bing Maria Magdalam, Yoana, Yems bauna Maria, dingtung digabu teladi.

¹¹Ne dahatum haringina mana haingdi haruangadinga te, namua na dahatum ba haruanga kakahana.

¹²Ning Pita mesa saing luki mala guhia gobagobia. Nenia maluxu, saing bagu imang xaidi disaku mana ba duwa olang. Baing goxoya ma saing hatumhatum mana baraxinta sok ba.

¹³Mana xaidapka baguba dingia luwa tang dila mana long tela duxu ba Imeas, wa hasoya monga mana long sabangga Yerusalem, bila 11 kilomita.

¹⁴Tang dahangixaya liwe mading mana baraxinta disok ba.

¹⁵Tang dahaxa malau, dahangixayau, baing Yesu ing sibuna sok rangua dingtang saing gabudi dahaxa mala,

¹⁶ne axamang tela soxautidi bu dibagu daxabia te.

¹⁷Xusunga dingtang ba, “Tang gahangixaya mana baraxinta bungina ahaxa mala?” Tang dili mua, ramramodingdi ayangading.

¹⁸Dingia tela, yanoa Kliopas, xusunga ba, “Si, ung Yerusalem lobuam taininau ung ganim uxabia baraxinta sok la ba mana xaidapkadi bagudi li te?”

¹⁹Xusunga ba, “Baraxintadi?” Tang dahaxuya ba, “Axadi disok mana Yesu Nasaretiam. Ina Urana lipuxing suxunguxunguam tela ba, ina haruanganoa xaung kuboluna, daharing haringing sibuna mana Urana xaung lipudi maxadingia.