Luka 24:3-19

³Basi, wengira njonga mure, fala mwiri wa Mwenye Insa awasingane.

⁴Ewo, pawashangire kuhusu vikunire vire, simpunde nkulu wanawalume wawiri wawemira karibu yawo, wâvala nguwo nyelupa vú!

⁵Wanawaka ware wakisusuka, wakinamira pansi, fala wanawalume ware wakiwadairi javi: “Mbana munsakula ka wafwi munu hai?

⁶Iye aapo‑mu, kafufuka! Amukumbukira vyaâkwambireni Galileya?

⁷Amukumbukira kuwa iye kâsema kuwa Binadamu wa Binguni ajuzi aperekiwe mmakono mwa wamádambi wangomezere, na suku ya tatu afufuke?”

⁸Newo wakikumbukira usemi wake ure.

⁹Basi, wakilawa nkaburi mure, wakiludira kawákiwa mawalii kumi na mmoja kure pamoja na wenziwawo, wakiwambira piya vikunire.

¹⁰Kweli, wanawaka ware wákiwa Mariyamu Madalena, Zuwana, Mariyamu mamaye Yakobu, na wengine tena. Ewo wakiwambira mawalii ware vikunire vire,

¹¹fala mawalii ware awaminire. Wawona kuwa vyawereze wanawaka vire vyauzozo.

¹³Noyo suku‑yo, wanu wawiri wafulati wa Insa wakuka kaya moja yakwitiwa Emau, kiyasi ca kilometuru kumi na mmoja na Yerusalemu.

¹⁴Munjira, wakipita wakipakanira kuhusu vikunire vire piya.

¹⁵Wakati wawakipakanira kuno wakikaidiyana, Insa mwanyewe akilawirira munjira mure, akifunga nawo nkonjo.

¹⁶Fala ewo wafungiwa maso, awakimmanyira kuwa ndiye.

¹⁷Insa akiwadairi: “Mwankupita, mukipakanira kinani?” Ewo wakimira, wakibaki wakuzizimiriwa wawenye.

¹⁸Ikisa mmoja wakwitiwa Keleopa akimwambira: “Nowe‑we tu basi ndi myeni ubakire sawijiwa cikunire Yerusalemu suku za mwinsho‑zi?”

¹⁹Iye akiwadairi: “Cikuna kinani?” Ewo wakinjibu: “Vinkunire Insa wa Nazareti. Iye ákiwa nabii, akitendanga maajuza a kutajabisa na akisowera kwa uwezo mbere ya Mwenyezimungu na wanu piya.