SAN LUCAS 24:3-19

³Quiaj tajmeliw majawüw. Teat Jesús ngo majlüy quiaj niüng tapiiberan.

⁴Nejiw nómban mbayajow, ngo majawüw cuane apmarangüw. Quiaj majawüw ijpüw monxey alembemoj niüng ajlüyiw nejiw, xowüy lalitlit apixaw nejiw.

⁵Quiaj mbayatoj xeyay, taxequiw tiüt omalüw. Condom ajcüwa monxey tasajüw nejiw: ―¿Neol, cuane temeyamban ningüy niüng amiüraad mondeow? cos aaga Teat Naxey almapac.

⁶Nej ngo majlüy ningüy cos lapac alinomb. Ich leaam imeajtsan leaw tasaj icon wüx altiül Galilea.

⁷Cos tapiüng, aaga Teat Naxey apmajmel teowixaw nipilan monrang ngo majneaj, apmambiyaw nej wüx cruz. Condom wüx er nüt apmapac alinomb, aw ―ajüw nejiw.

⁸Nejiw quiaj leaad omeajtsüw wüx aaga poch tasaj nejiw Teat Jesús.

⁹Wüx tandilileaw imiünüw niüng ajlüy oxiüt, quiaj tambüw masajüw ajcüwa gajpanop (11) miapóstoles Teat Jesús, maquiiüb alacas leaw andüüb nej.

¹⁰Ajcüwa monamb monsaj miapóstoles Teat Jesús, ajcüw ayaj nop María Magdalena, alinop Juana, alinop María mimüm Jacobo, at alacas montaj.

¹¹Nejiw apóstoles tapiüngüw atnej nechachiw montaj tandeacüw a poch quiaj; ngome tapiüngüw aag ayaj naleaing.

¹²Condom teat Pedro witiüt tamb acuiür andüy niüng ajlüy oxiüt. Almapeay quiaj talech onic majaw tiül oxiüt, tajaw ngo majlüy nicuajind, áagan apix Teat Jesús nawincharan tiül alquiaj. Quiaj a nganüy tandilil mbayánan, ngo majaw cuane najlüy.

¹³Aaga nüt quiaj ijpüw minipilan Teat Jesús aleambüw tiül tiiüd, laambüw andüyiw tiül noic cambaj nenüt Emaús. Ajiür coen gajpanoic (11) kilómetros naw Jerusalén.

¹⁴Ajcüwa nipilan quiaj tenguial mandeacüw wüx meáwan leawa tajlüy.

¹⁵Nejiw tenguial mandeacüw wüx aag ayaj, quiaj tatüch nejiw Teat Jesús, tajüyiw nóiquian maquiüjpüw.

¹⁶Naleaing atnej aleaic nexot nej oniüjcüw, ngo majawüw jane.

¹⁷Condom quiaj tatün manguiay nejiw Teat Jesús: ―¿Cuane wüx temendeacan tenguial ijüyiün tiül tiiüda? ¿Neol xeyay amix imeajtsana? ―aw.

¹⁸Quiaj tasaj nej nop nenüt Cleofas, tapiüng: ―¿Neol ngwüy, íquian quiaj iltiül Jerusalén aaga nüt cam, pero ngo mejaw cuane tajlüy quiaja? ―aj nej.

¹⁹Quiaj tasaj nejiw: ―¿Neol, cuane najlüy quiaja? ―aj nejiw. Quiaj tasajüw nej: ―¿Ngo menguiay leaw tajlüy wüx Teat Jesús naw Nazarete? Nej nop nendeac andeac Teat Dios, cuajantanej alndom marang, aton najneajay andeac wüx Teat Dios manguiay nipilan.