SAN LUCAS 24:3-19

³Nɛ 'bex bi yʉrpʉ mbo, pɛ him bi dįm bʉ rá ją'i ra Jesús.

⁴Nɛ nu'bʉ mi 'bäpʉ nɛ din 'yomfɛ̨ni 'bɛ'a bin ja, 'bex bim 'bähmbʉ yoho yʉ́m 'bɛhni Oją, mi he yʉ́ pahni di fɛxni.

⁵Nɛ nu'ʉ yʉ xisu, ɛ̨mmɛ bin su nɛ bi hyɛ̨'t'ʉ yʉn 'yohʉ. Nɛ bi 'yɛ̨mp'ʉ: ―Hanja gní hyomhbʉ ua n'da ran 'yohʉ i 'bʉi, guecua ja ran 'yägui.

⁶Nu'a guí homhbʉ, bi ndants'a, njo'o ua a. Nde'bʉ guim bɛ̨mhbʉ a bi xi ahʉ 'bʉ gám 'bʉhmbʉ bʉ ja ra häi Galilea.

⁷Ngue bi ma jatho da nu ran ʉnbi, nɛ da mba ma dä bʉ 'bʉh yʉ ts'om'bäi, nɛ da du bʉ ja ra pont'i, nɛ nu'bʉ ná hyu pa da dąmbɛ̨ni, bi 'yɛ̨n'ahʉ, bi 'yɛ̨n'ʉ yʉ́m 'bɛhni Oją.

⁸Nɛ nu'ʉ yʉ xisu bi bɛ̨m bʉya 'bɛ'a xí man'a ra Jesús.

⁹Nɛ bi nɛxpʉ ja ran 'yägui, bi mba bʉ 'bʉ'ʉ 'dɛ'ma'da yʉ́ xädi ra Jesús nɛ'ʉ gätho mi'da, nɛ bi xi'ʉ 'bɛ'a bin ja bʉ ja ran 'yägui.

¹⁰Nɛ nu'ʉ yʉ xisu, ra María Magdalena a n'da, nɛ ra Juana a man'da, nɛ ra María rá mbe ra Jacobo a man'da, nɛ'ʉ mi'da min 'yohʉ gue' ʉ bi xi'ʉ yʉ́ xädi a ra Jesús 'bɛ'a bi nu bʉ ja ran 'yägui.

¹¹Pɛ nu'ʉ yʉ́ xädi, him bi 'yɛ̨c'yɛi 'bɛ'a bi man yʉ xisu, nɛ bi 'yɛ̨mbi bi bɛ̨nsɛ 'bɛ'a bi man'ʉ.

¹²Pɛ nu'a ra Pedro, bi mba n'dihi bʉ ja ran 'yägui nɛ bi nu bʉ mbo. Nɛ bi nu mi 'bøntho bʉ ra 'bø't'e má mbant'i ra Jesús. Nɛ bi mbeng bʉ ja rá ngu bʉya, bi hyonya thoho 'bɛ'a bin ja.

¹³Nɛ gue'a ra pa bi mba yoho yʉ 'yɛ̨c'yɛi bʉ ja ra hnini Emaús ngue hinga yatho, hyu ora tho ná 'yo.

¹⁴Nɛ i mam bʉ ní mba 'bɛ'a bin ja bʉ Jerusalén.

¹⁵Nɛ gätho ná yą'ʉ, bi zʉpʉ 'yu a ra Jesús nɛ bin 'yohʉ.

¹⁶Nɛ nu'ʉ bi nu a, pɛ him bi bądi to'o a.

¹⁷Nɛ nu'a ra Jesús bi 'yän'dʉ: ―'Bɛ'a guí mammi. Nɛ nu'ʉ yoho bim 'bäpʉ bʉya, nɛ ɛ̨mmɛ tu yʉ́ mbʉi.

¹⁸Nɛ nu'a n'da í Cleofas bi dąti, bi 'yɛ̨na: ―Masque høn'a zɛhɛ hin guí pądi 'bɛ'a bin ja bʉ Jerusalén yʉ pa i ja bʉya, bi 'yɛ̨mbi.

¹⁹Nu'a ra Jesús bi 'yänni: ―'Bɛ'a bin ja bʉ. Nɛ bi xih pʉya 'bɛ'a bin ja, bi 'yɛ̨mbi: ―Nu ra Jesús, ra mɛngu Nazaret, n'da rá pøngahyą Oją ɛ̨mmɛ mi ja rá ts'ɛdi, bi 'yøt' yʉn t'øt'e nuįxte nɛ bi hoc yʉn zäman'ʉ. Nɛ bi 'yøt' ran ho bʉ na nu Oją, nɛ nu yʉ ją'i bi numansu a.