Iluk 24:3-19

³Atemeko, tum tem kawtem uneko, Kamok Fian Yesus em fom elo ka kel belei, ateminba kesiliw kale.

⁴Ateminba keko, ibolow tiaktiak kesomi, “Yesus em fom e nal kel be ya?”, ange ange kesiliw ding dim bakate, i ilim kais nam minggiko, ailbin filik falak so kunum alew mak mobiliwi, yetemsiliw kale.

⁵Yetemsiliw ding dim bakate, wanggel bi finganin fian mak kesomi, gatak wakas angeko, kawin dim elo kiin doung angsiliw kale. Angesomeliwi, kunum alew bi waneng biilo bokoyemomeliw: “Nimtew angom ete, finik so kunum beelo fomkamin dim kale kel fenem talbiliw a?

⁶Feinka! E kale kel binba be te. E iti baba teinko, mo kembe kasike! Yu Yesus em Galili aneng fian ka biliwi, yulo bakayemale weng be kilele ibolow fukunemoliwka!

⁷E yulo bokoyemomele: ‘Maka kawtiw i Kawtiw Aul nelo sili sili kukuw gelewkabiliw kawtiw im teing dim elo duyemiwi, i nelo ais dim sil biki konemokoliw te. Konemokoliw kate, alemsal kel ding dim kabalak e, ne iti baba teinoki te.’, yangse kasike!”, yangsiliw kale.

⁸Yangiwi, wanggel bi akalem suaem yangenale weng be ibolow fukuneko,

⁹fomkamin dim be koleweko, kanese eisneng be Yesus em guel kel gelewkabiliw kunum so, mali iso ka biliw kunum waneng iso, alik alik biilo bakayem unsiliw kale.

¹⁰Weng bakayem unsiliw mali wanggel biim wiin e kanekote: Mak u, Malia, Makdala abiw kayak waneng ute kale. Mak u, Yoana ute kale. Mak u, Malia, Sekow auk ute kale. Alemsal wanggel biso, mali waneng iso, alik alik bi uneko, kalan weng be Yesus em kalan kunum im fukun bakayem unsiliw kale.

¹¹I kalan weng be de unsiliw kate, Yesus em gelewkabiliw kunum bi waneng biim weng be kiliko, “Weng be sak weng kuw te! Fein bate!”, angsiliw kale.

¹²Angsiliw kate, Fita e yakoko, Yesus em fomkamin dim elo atebam unse kale. Uneko, tum tem beem abisom dim mewso unse ding dim bakate, e mul sukun angeko, tum tem kawtem elo kiin doung angeko, atemete: Yesus em falal kolewsiliw ilim kuw belei, e atemse kale. Atemeko, ibolow tiaktiak keko, iti akalem am elo unse kale.

¹³Beli, Yesus em gelewkabiliw kunum alew mak i Selusalem abiw mutuk fian koleweko, abiw fong mak em wiin e Emeus kalo unsiliw kale. Abiw be singam bate. Mewso te.

¹⁴Aso im Emeus em deiw ka unsiliw ding dim bakate, aso i Selusalem abiw mutuk em kanese weng alik alik beem dulum elo bokole bokole kem unsiliw kale.

¹⁵Bokolew bokolew kem unbiliwi, Yesus e aso im mutuk ka teleko, makuw unsiliw kale.

¹⁶Unbomi, Sunbin-Got e aso biim kiin net keyemei, i Yesus elo abelew kelewsiliw kale.

¹⁷Keko beli, Yesus e aso biilo bokoyemomele: “Yu nimtew weng mak bakam unbiliw a?”, yangse kale. Yangei, aso i dubuluw moko, sakik ibolow fian kesiliw kale.

¹⁸Kesomeliwi, mak kunum em wiin e Kiliofas e elo yan weng bokolewomele: “Eke! Kawtiw banban kuw Selusalem abiw mutuk fian kawtem elo uneko, ka em kanese eisneng be kilele kal kebiliw kate, kukalem ete kuw kanese sang be akokow kelewbelew sako?”, dangse kale.

¹⁹Dangei, Yesus e aso ilo dakalomele: “Nimtew eisneng mak kane kembe ya?”, yangei, aso i elo yan weng bokolewomeliw: “Nu Nasalet abiw mutuk fian kayak Yesus em sang bakam talbuluw te! E Sunbin-Got so, kawtiw so, alik alik num kiin dim e Sunbin-Got em bontem dim bakamin kunum wiin so kitil nam so kunum ete te.