Lucas 24:3-19

³Zee mzeeb re me leen baa per nanguzhalt xkwerp Jesús lo re me.

⁴Zee mnabdizh re me lo wechxinn me nu nzhé me: —¿Xomod ngok kwaane? Zee mlu chop xaabyi, xaa nak ler rus kwaan nla xni doo lo re me.

⁵Mzheb doo re me ta mwii re me naz lo yo. Zee lee rop xaabyi zee nzhé lo re me: —¿Chozhiin kakwaan gu xaa mban lo re xaa ngut?

⁶Wii gu nyent xaa nee; lee xaa mrobanla. ¿Che nanzetla gu kwaan né xaa lo gu leezha nzoka xaa yizhyo Galilea?

⁷Leezha né xaa lo gu: “Lee na nak Xaa Mzhin Ngok Myet, nu zaa xaa na lo re myet xaa nzeb jwalt, zee kee re xaa na lo krus per lee mbizh yon lee na roban stub welt”.

⁸Zeera mzelazh re me kwaan nzhé Jesús leezha mbanaka xaa.

⁹Gorna mbare re me ngwa me roo baa, zee mzaa me kwent cheen re kwaane lo chiibtub xaa mseed lo Jesús nu lo re stub naz myet.

¹⁰Snee le re me: Mari me yezh Magdala, Juan, nu Mari xnaa Chag. Nu noka stub naz re ngwnaa me nzhi baa mzaa kwent cheen kwaane lo re xaa mkayaa yalnabeyy lo Jesús.

¹¹Lee re xaa nzhé lo re wechxinn xaa: —¡Nzhak naxen re ngwnaa ne! Nu nanlet re xaa krer kwaan nzhé re me.

¹²Nu gorzee nguxso Pér nu mrexonn xaa ngwa xaa roo baa. Nu gorna mzhin xaa mkichyek xaa mwii xaa leen baa per nebse ler kwaan mchaal xaa Jesús myun lo xaa. Zeesi mdedyall xaa nya xaa, gorna ngulo ngune xaa kwaane.

¹³Leeka mbizh ba mroo chop xaa mseed lo Jesús naz Jerusalén nu nzha xaa yezh kwaan le Emaús, kwaan nzhi kan chiibtub kilómetro.

¹⁴Nzhaze rop xaa nu nzhayadizh rop xaa re kwaan ngok.

¹⁵Nu gorna nzhayadizh rop xaa nu leeka gorzee lee Jesús nzhaze kwaan rop xaa,

¹⁶per nzho tub kwaan mleya zee namzeent rop xaa cho xaa nak xaa.

¹⁷Zee lee Jesús nzhé lo rop xaa ba: —¿Cho xaa kazet gu? Zee lee rop xaa mlaz chep nu nales doo nzhak lextoo rop xaa.

¹⁸Tub xaa le Cleofas nzhé lo xaa: —¿Che naleet naz Jerusalén mroo lu? ¿Che zer gon lu re kwaan ngok re mbizh ne?

¹⁹Lee xaa mnabdizh lo rop xaa: —¿Cho kwaan ngok? Lee rop xaa mkeb nzhé: —Kawdizhno nu kwent cheen Jesús xaa yezh Nazaret. Lee xaa ne ngok tub xaa non doo nu mzaa xaa kwent kwaan nzhé Dios lo lee xaa. Dios mxaal xaa zee mle xaa re kwaan gro doo nu mdiizh xaa duzna kwaan yalnabeyy zee mdedyall doo re myet mwii lo xaa.