Lucas 24:3-19

³Ruriman yecurirnam, Teyta Jesuspa ayantaqa tariyarqantsu.

⁴Tsenam imano quetapis puediyarqantsu. Tseno quecayaptinnam, ishcaq nunacuna chipapëcaq bestishqa juclla yuripicuyarqan.

⁵Tsenam mantsaquewan tse warmicuna qoncuriquicuyarqan urcuncunapis patsaman chanqanyaq. Tse nunacunanam niyarqan: —¿Imanirtaq cawecaq nunata ashiyanqui wanushqacuna pamparäyanqancho?

⁶Manam quechonatsu; cawarimushqanam. ¿Manacu yarpäyanqui qamcunawan Galilea marcacho quecar, queno nishpa willayäshonqequita?

⁷‘Presisanmi Diospita Shamushqa Nunata jutsasapacunaman entregayänan cruscho wanutsiyänanpaq. Y wanushqanpitam quima junaqllata cawarimonqa’ nir.

⁸Tseta wiyarirninnam, warmicuna yarpäriyarqan Jesus tseno willacushqanta.

⁹Tsepita cutirirnam, chunca juc (11) apostolcunata y tsecho llapan quecaqcunata willayarqan sepulturacho ricayanqanta y wiyayanqanta.

¹⁰Tse apostolcunata willaqcunaqa cayarqan Maria Magdalenam, Juanam, Santiagupa mamänin Mariam y mas warmicunam.

¹¹Willacuyanqanta wiyarirninnam, apostolnincuna bufunadapaq churar creyiyarqantsu.

¹²Imano captinpis, Pedroqa sharcurmi coripa ewarqan Jesus pamparashqanman. Sepulturaman chärirnam, puctïcur qawecorqan y ricarerqan Jesus wancurashqan sabanasllatana. Tseta ricarirnam, yarpacachar wayiman mantsacashqa cuticorqan.

¹³Tse tardinam, ishcaq qatiraqnincuna euquicayarqan Emaus nishqan marcaman. Tse marcaqa Jerusalenpita pitsqa quilometruchomi carqan.

¹⁴Euquicarninnam, Jerusalencho llapan pasacushqancunata parlayarqan.

¹⁵Tseno parlar cäyitsinacur ewecayaptinnam, Jesus yurircur pecunawan juntu ewarqan.

¹⁶Peru riquecarpis, manam reqiyarqantsu Jesus canqanta.

¹⁷Tsenam Jesus taporqan: —¿Imata parlartaq euquicayanqui? —nir. Pecunanam llaquishqa shäcuriyarqan.

¹⁸Tsenam Cleofas jutiyoq caqna nerqan: —Qamllachi Jerusalencho quecar, ¿que junaqcuna imapis pasaconqanta musyanquitsu?

¹⁹Jesusnam nerqan: —¿Imataq pasacushqa? Pecunanam niyarqan: —Juc nunam carqan Nazaret marcapita Jesus jutiyoq. Pemi carqan Diosnintsicpa profetan. Rureninwanpis y parleninwanpis allapa puedeqmi carqan Diospa y nunacunapa nopancho.